ޑެންމާކުގެ ފުޓްބޯޅަ ތަރި ކްރިސްޓަން އެރިކްސަން މެންޗެސްޓަރ ޔުނައިޓެޑަށް ބަދަލުވާން އެއްބަސްވެއްޖެއެވެ.

މިދިޔަ ސީޒަންގައި ބްރެންޓްފޯޑަށް ކުޅުނު އެރިކްސަން ޔުނައިޓެޑަށް ގެންދިއުމުގައި އެޓީމުގެ ކޯޗު އެރިކް ޓެން ހާގްގެ ދައުރު ބޮޑެވެ. ޓެން ހާގް ވަނީ ދެފަހަރެއްގެ މަތިން އެރިކްސަންއާ ބައްދަލުކޮށް އޭނާގެ ޕްލޭން ކިޔައިދީފައެވެ. މިދިޔަ ސީޒަންގައި އަޔެކްސްއަށް ކޯޗުކޮށްދިން ޓެން ހާގް ޔުނައިޓެޑަށް ބަދަލުވީ މި ޓްރާންސްފަރ މާކެޓުގައެވެ.

އެރިކްސަން ޔުނައިޓެޑާ ގުޅެން ނިންމީ ތިން އަހަރުގެ އެއްބަސްވުމެއްގެ ދަށުންނެވެ. ކޮންޓްރެކްޓް މިހާރު ތައްޔާރުކޮށްފައިވާއިރު، މި ހަފުތާގެ ތެރޭގައި އެރިކްސަންގެ މެޑިކަލް ޓެސްޓުތައް ޔުނައިޓެޑްގައި ހަދާނެއެވެ. އަދި ރަސްމީކޮށް ޔުނައިޓެޑަށް ސޮއިކޮށް، މި ހަފުތާގެ ތެރޭގައި އެކަން ހާމަކުރާނެކަމަށް ރިޕޯޓުތައް ބުނެއެވެ.

ޔުނައިޓެޑުން މިހާރު ވަނީ ފަޔެނޯޑްއަށް ކުޅެމުންއައި ޓައިރެލް މަލާސިއާވެސް ޓީމަށް ގެންދަން ހުރިހާ ކަމެއް ނިންމާފައެވެ. ޔުނައިޓެޑުން އަންނަނީ މިއަންނަ ސީޒަން ފެށެންވާއިރަށް ކުޅުންތެރިން ހޯދުމުގެ މަސައްކަތް އަދިވެސް ކުރަމުންނެވެ. އެގޮތުން އަޔެކްސްއަށް ކުޅެމުން އަންނަ ލިސަންޑްރޯ މާޓިނޭޒްއަކީ ޔުނައިޓެޑުގެ އެންމެ ބޮޑު އެއް ޓާގެޓެވެ. އާސެނަލްއިންވެސް އަންނަނީ މާޓިނޭޒް ހޯދުމަށް މަސައްކަތް ކުރަމުންނެވެ. ނަމަވެސް އަޔެކްސްގެ ކުރީގެ ކޯޗު އެރިކް ޓެން ހާގް ޔުނައިޓެޑްގައި ހުރުމަކީ މި ޑީލް ޔުނައިޓެޑަށް ކާމިޔާބު ކުރަން އެންމެ ފަސޭހަވާނެ ސަބަބެވެ. މާޓިނޭޒްގެ އިތުރުން ބާސެލޯނާއަށް ކުޅެމުން އަންނަ ފްރެންކީ ޑިޔޯންގ ހޯދުމުގެ މަސައްކަތްވެސް ޔުނައިޓެޑުން އަންނަނީ ކުރަމުންނެވެ.