ޑެންމާކް ބަލި، އެކަމަކު އެރިކްސަންގެ އެނބުރި އައުން އުފާވެރި!

ބައިނަލްއަޤްވާމީ ރަހުމަތްތެރިކަމުގެ މެޗެއްގައި ނެދަލެންޑްސް އަތުން ޑެންމާކް ބަލިވިޔަސް, އެރިކްސަންގެ އެނބުރި އައުން އުފާވެރިވެއްޖެއެވެ. މެޗުން ޑެންމާކް ބަލިވީ 4-2 ނެވެ.

މެޗުން ޑެންމާކް ބަލިވިޔަސް މެޗު އުފާވެރިވީ އެންމެ ފަހުން 2020 ވަނަ އަހަރު އޮތް ޔޫރޯގައި ޑެންމާކް ކުޅުނު ފުރަތަމަ މެޗުގައި ހިތުގެ މައްސަލައެއް ދިމާވެ, ކުޅުމާއި ދުރަށްދާން ޖެހުނު އެރިކްސަން ޤައުމީ ޓީމަށް އެނބުރި އައި މެޗަށް ރޭގެ މެޗު ވުމުންނެވެ. އަދި ކުޅެން ނިކުމެ ދެމިނިޓްގެ ތެރޭގައި އެރިކްސަން ގޯލް ޖެހުމެވެ. ޑެންމާކްގެ ދެވަނަ ގޯލް އެރިކްސަން ޖެހީ 47 ވަނަ މިނިޓްގައެވެ. މެޗުގައި ނެދަލެންޑުސްއިން ޖެހި ހަތަރު ލަނޑުގެ ތެރެއިން ދެލަނޑު ޖެހީ ބާގްވިންއެވެ, އަނެއް ދެލަނޑު ޖެހީ ނަތަން އަކޭއާއި, ޑިޕާއީއެވެ.

30 އަހަރުގެ މިޑްފީލްޑަރ މިހާރު ކުޅެނީ ޕްރިމިއަރ ލީގުގެ ބްރެންޓްފޯޑަށެވެ. އެރިކްސަން ބުނީ ލަނޑަކާއެކު އޭނާގެ ބައިނަލްއަޤްވާމީ ފުޓްބޯޅަ އަލުން ފެށުމަކީ އުފާވެރިކަމެއްކަމަށެވެ. ދެވަނަ ހާފްގައި އެރިކްސަން ކުޅެން ނިކުތުމުން ސަޕޯޓަރުންގެ ފަރާތުން އެރިކްސަންއަށް ބޮޑު ތަރުހީބެއް ލިބުނެވެ. އޭގެތެރޭގައި ނެދަލްނެޑްސް ކޯޗު ލުއި ވެންޚާލްވެސް ހިމެނެއެވެ.