ކުލަބުގައި މަޑުކުރުމަށް އެދި ބްރެންޓްފޯޑުގެ ހުށައެޅުމެއް އެރިކްސަންއަށް
13 ޖޫން 2022 | ހޯމަ 04:46ކުލަބުގައި މަޑުކުރުމަށް އެދި ބްރެންޓްފޯޑުން ވަނީ އެރިކްސަންއަށް އެޅުމެއް ހުށައަޅާފައި
އެރިކްސަން
ބްރެންޓްފޯޑަށް ކުޅެމުން އަންނަ ޑެންމާކުގެ ކްރިސްޓިއަން އެރިކްސަން ކުލަބުގައި މަޑުކުރުމަށް އެދި އެ ޓީމުން އޭނާއަށް ހުށައެޅުމެއް ހުށައަޅައިފިއެވެ.
އުމުރުން 30 އަހަރުގެ އެރިކްސަން ބްރެންޓްފޯޑާ ގުޅުނީ މިއަހަރުގެ ތެރޭގައެވެ. އެއީ މިދިޔަ އަހަރު އޮތް ޔޯރޯ މުބާރާތުގެ ތެރޭގައި ހިތް ހުއްޓިގެން ދަނޑުން ބޭލިފަހުން، ފަރުވާއަށްފަހު އެރިކްސަން ކުޅުނު ފުރަތަމަ ޓީމެވެ. އޭގެ ކުރިން އޭނާ ވަނީ އިންޓަރ މިލާން އާއި ޓޮޓެންހަމްގެ އިތުރުން އަޔެކްސްއަށް ވެސް ކުޅެފައެވެ.
އެރިކްސަން ވަނީ ބްރެންޓްފޯޑަށް 11 މެޗު ކުޅެދީފައެވެ. އަދި އެ ޓީމަށް އޭނާ ވަނީ އެއް ލަނޑު ޖަހައިދީފައެވެ. މި ސީޒަނަށްފަހު އެރިކްސަން ހޯދުމުގެ މަސައްކަތް ބައެއް ކުލަބުތަކުން ކުރަމުން އަންނަ ކަމަށް މީޑިއާ ރިޕޯޓުތައް ބުނެއެވެ. ނަމަވެސް ބްރެންޓްފޯޑުން ބޭނުންވަނީ ކުރިއަށް އޮތް ސީޒަނުގައި ވެސް އެރިކްސަން އެ ޓީމުން ފެންނާށެވެ. އެ ޓީމުގެ ކޯޗު ތޯމަސް ފްރޭންކް ވެސް ވަނީ އެރިކްސަން އެ ޓީމުގައި ހުންނަން ބޭނުންވާ ކަމަށް ބުނެފައެވެ. ބްރެންޓްފޯޑުން މިހާރު ވަނީ އެރިކްސަން އަށް އިތުރު ހުށައެޅުމެއް ހުށައަޅާފައެވެ. ނަމަވެސް މިހާތަނަށް އަދި އޭނާ ވަކި ގޮތެއް ނިންމާފައެއް ނުވެއެވެ. އަދި ކުރިއަށް އޮތް ދުވަސްތަކުގައި ކުރިމަގާ މެދު އޭނާ ގޮތެއް ނިންމާނެއެވެ.
