ކަސެމީރޯ އާއި އެރިކްސަން އާއެކު ޔުނައިޓެޑަށް އިތުރު ހިތްވަރެއް ލިބޭނެ: ޓެން ހާގް

މެންޗެސްޓަރ ޔުނައިޓެޑަށް ކުޅެމުން އަންނަ ބްރެޒިލްގެ ކަސެމީރޯ އާއި ޑެންމާކުގެ ކްރިސްޓިއަން އެރިކްސަން އެނބުރި ޓީމާ ގުޅުމާއެކު އިތުރު ހިތްވަރެއް ލިބިގެންދާނެ ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.

އިނގިރޭސި ޕްރިމިއާ ލީގުގައި ހޮނިހިރު ދުވަހު އެވަޓަންއާ ދެކޮޅަށް ކުޅޭ މެޗަށް މި ދެ ކުޅުންތެރިން ފިޓުވާނެ އެވެ. އެރިކްސަން ހުރީ މިދިޔަ ޖަނަވަރީ މަހު ފަޔަށް ލިބުނު އަނިޔާއެއްގެ ސަބަބުން ކުޅުމާ ދުރުގަ އެވެ. ކަސެމީރޯ ހުރީ ހަތަރު މެޗުގެ ސަސްޕެންޝަނުގަ އެވެ. ނަމަވެސް މިހާރު އެރިކްސަން އަނިޔާ އިން ރަނގަޅުވެފައިވާއިރު، ކަސެމީރޯ ހުރީ ސަސްޕެންޝަނުން ސަލާމަތްވެފަ އެވެ. އެވަޓަން މެޗުގެ ކުރިން ވާހަކަ ދައްކަމުން ޓެން ހާގް ބުނީ، ވަރަށް ސާފުކޮށް ފެންނަން އޮތް ގޮތުގައި އެ ދެ ކުޅުންތެރިންނަކީ ޔުނައިޓެޑަށް ވަރަށް އަގު ހުރި ދެ ކުޅުންތެރިން ކަމަށެވެ. އޭނާ ބުނީ ޓީމުގެ މިޑްފީލްޑުގެ މުހިންމުކަން ކޮންމެ މީހަކަށް ވެސް އިނގޭނެ ކަމަށާއި، ފާއިތުވި މެޗުތަކުގައި މިޑްފީލްޑު ހަމަހަމަކޮށް ބޭއްވުމަށް ގިނަ ކަންކަން ކުރަން ޖެހުނު ކަމަށެވެ. ޓެން ހާގް ފާހަގަ ކުރި ގޮތުގައި ކަސެމީރޯ އާއި އެެރިކްސަން ނެތި އެއީ ކުރަން ޖެހުނު އުނދަގޫ ކަމެކެވެ.

މީގެ އިތުރުން އޭނާ ބުނީ ޔުނައިޓެޑު އޮތީ އެންމެ ރަނގަޅު ހިސާބުގައި ކަމަށާއި، މިހާރު މަސައްކަތް ކުރަނީ ގަދަ ހަތަރު ޓީމުގެ ތެރޭގައި ހިފެހެއްޓުމަށް ކަމަށެވެ. މީގެ އިތުރުން ޔޫރޮޕާ ލީގުގެ ކުއާޓާ ފައިނަލްގައި ވާދަކުރަން އޮތްއިރު، އެފްއޭ ކަޕްގެ ސެމީ ފައިނަލް މެޗު އޮތްކަން ވެސް އޭނާ ވަނީ ފާހަގަކޮށްފަ އެވެ. އޭނާ ބުނީ ކުރިއަށް ހުރި މުހިންމު މެޗުތަކާއެކު މުހިންމު ދެ ކުޅުންތެރިން ޓީމާ ގުޅުމުން ހިތްހަމަޖެހުން އޮތް ކަމަށާއި، ދެން ޖެހޭނީ ނަތީޖާ ނެރެން ކަމަށެވެ. އިތުރަށް ވާހަކަ ދައްކަމުން ޓެން ހާގް ބުނީ، މިހާތަނަށް އައިއިރު ޔުނައިޓެޑަށް ކަޕް ކާމިޔާބު ކުރެވިއްޖެ ކަމަށާއި، ދެން އޮތް ދެ މުބާރާތް ކާމިޔާބުކޮށް، ސީޒަނަކީ ކާމިޔާބު ސީޒަނަކަށް ހަދަން ބޭނުންވާ ކަމަށެވެ. އެކަން ހާސިލް ކުރުމަށް ބަލާއިރު، ޔުނައިޓެޑުގައި އޮތީ ވަރަށް ރަނގަޅު ސްކޮޑެއް ކަމަށާއި، ޓީމާއެކު ރަނގަޅު ހިސާބަކަށް ދިޔުމަށް އޭނާ ބޭނުންވާ ކަމަށް ވެސް ޓެން ހާގް ބުންޏެވެ.

ޕްރިމިއާ ލީގުގައި އެވަޓަންގެ ދަނޑުގައި ޔުނައިޓެޑުން އެ ޓީމާ ދެކޮޅަށް ނިކުންނާނީ ހޮނިހިރު ދުވަހުގެ ހަވީރު އެވެ.