2020 ވަނަ އަހަރުގެ ޔޫރޯ ފުޓްބޯޅަ މުބާރާތުގައި ޑެންމާކް ކުޅުނު ފުރަތަމަ މެޗުގައި ހިތުގެ މައްސަލައެއް ކުރިމަތިވެ, ކުޅުމާ ވަކިވާން ޖެހުނު މިޑްފީލްޑަރ ކްރިސްޓިއަން އެރިކްސަން ޤަތަރު ވޯލްޑް ކަޕް ސްކޮޑްގައި ހިމަނައިފިއެވެ.

ފިންލޭންޑާ ދެކޮޅަށް ކުޅެނިކޮށް ހާޓް އެޓޭކެއް ޖެހި ހިތް ހުއްޓިގެން ހަ މަސްދުވަހަށްވުރެ ގިނަ ދުވަހު ކުޅުމާއި ދުރުގައި ހުރުމަށްފަހު މިހާރު އޭނާ ކުޅެމުން އަންނަނީ މެންޗެސްޓަރ ޔުނައިޓެޑަށެވެ. އެނބުރި އައިސް ބްރެންޓްފޯޑްގައި ދެއްކި މޮޅު ކުޅުމާ އެކު ޔުނައިޓެޑުން ލިބުނު ހުށަހެޅުމުން އެ ކްލަބަށް ބަދަލުވެ ފުރަތަމަ އެގާރައިގައި އޭނާ އަންނަނީ ކުޅެމުންނެވެ. އެރިކްސަން ކުޅެމުން އަންނަނީ އައިސީޑީ, ޑިވައިސްއެއް ލައްވައިގެންނެވެ. ވޯލްޑް ކަޕަށް ދާ 21 ކުޅުންތެރިންގެ ސްކޮޑްގައި 30 އަހަރުގެ އެރިކްސަން ވަނީ ހިމަނާފައެވެ. އެކަމަކު ފައިނަލް ސްކޮޑް ފީފާ އަށް ފޮނުވަން ޖެހެނީ މިމަހުގެ 13 ވަނަ ދުވަހުގެ ނިޔަލަށެވެ. ޑެންމާކްގެ ކޯޗު ކެޝްޕާ ހުލްމަންޑް ބުނީ 26 ކުޅުންތެރިންގެ ސްކޮޑް ފައިނަލް ކުރާނީ ޔޫރަޕްގައި އަދި ކުރިއަށް ހުރި ކްލަބް މެޗުތަކަށް ފަހުކަމަށެވެ. ފަސް ކުޅުންތެރިންގެ ޖާގަ އަށް 12 ވަރަކަށް ކުޅުންތެރިން ވާދަކުރާކަމަށް އޭނާ ބުންޏެވެ.

ޑެންމާކްގެ ފުރަތަމަ މެޗުގައި މިމަހުގެ 22 ވަނަ ދުވަހު ވާދަކުރަން ޖެހޭނީ ޓިއުނީޝިޔާއާއެވެ.