ގައުމީ ޓީމު އެކުލަވާލުމުގެ މަސައްކަތް ދަނީ ކުރަމުން: މޮރިއޭރޯ

ގައުމީ ފުޓްބޯޅަ ޓީމު އެކުލަވާލުމުގެ މަސައްކަތުގައި މިހާރު ކުރިއަށްދާ ޕްރެޒިޑެންޓްސް ކަޕުގެ މެޗުތަކާއި ޓީމުތަކުގެ ފަރިތަކުރުންތައް ބަލައިގެން ކުރިއަށްގެންދާ ކަމަށް ގައުމީ ފުޓްބޯޅަ ޓީމުގެ ކޯޗު އިޓަލީގެ ފްރެންސެސްކޯ މޮރިއޭރޯ ބުނެފިއެވެ.

މިދިޔަ އަހަރުގެ އޮކްޓޯބަރު މަހުގެ ތެރޭގައި ގައުމީ ޓީމުގެ ކޯޗުގެ މަގާމާ މޮރިއޭރޯ ހަވާލުވިއިރު، އޭނާގެ އިރުޝާދުގެ ދަށުން ގައުމީ ޓީމު ކުޅުން ފުރަތަމަ މުބާރާތަކީ ސްރީ ލަންކާގައި ނޮވެމްބަރު މަހު ބޭއްވި މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) އެވެ. އެކަމަކު އެ މުބާރާތުގެ ފައިނަލަށް ނުގޮސް ރާއްޖެ ކެޓިއިރު، އެ މުބާރާތުގައި ރާއްޖެ އެއްވެސް މެޗަކުން މޮޅުވެފައެއް ނުވެއެވެ.

ރާއްޖޭން ބޭރުގެ ނޫހަކަށް ދިން އިންޓަވިއުއެއްގައި މޮރިއޭރޯ ބުނީ ގައުމީ ޓީމާއެކު އޭނާގެ ފުރަތަމަ މަސައްކަތް ކަމަށްވާ ފޯ ނޭޝަންސް ކަޕުގައި ކުޅުންތެރިން ކުރި މަސައްކަތް ފާހަގަކުރާ ކަމަށެވެ. އަދި އެ ފަހަރު ނަތީޖާ ނުނެރެވުނީ އޭނާއަށްވެސް އެކަށީގެންވާ ވަގުތު ނުލިބުމުން ކަމަށާއި، ވަގުތު މަދު ކަމުގައިވިޔަސް ރާއްޖޭގެ ފެންވަރަށް ބަލާއިރު، އެއަށްވުރެ ރަނގަޅު ނަތީޖާއެއް އެ މުބާރާތުގައި ނެރެވެން ޖެހޭނެ ކަމަށްވެސް ބުންޏެވެ. އެކަމަކު އޭރު އޮތް ސްކޮޑަކީ އެއްކޮށް އޭނާގެ ބައިވެރިވުމާއެކު ނެގުނު ސްކޮޑެއް ނޫން ކަމަށްވެސް ވަނީ ބުނެފައެވެ.

މޮރިއޭރޯ ބުނީ މިހާރު ޓީމު ނަގާ އިސްމީހެއްގެ ހައިސިއްޔަތުން އޭނާ އަންނަނީ ޕްރެޒިޑެންޓްސް ކަޕުގެ މެޗުތަކާއި ޓީމުތަކުގެ ފަރިތަކުރުންތައް ބަލަމުން ކަމަށެވެ. އަދި ޕްރެޒިޑެންޓްސް ކަޕަކީ އިޓަލީގައި ކުރިއަށްދާ ކޮޕަ އިޓާލިއާ ފެންވަރުގެ މުބާރާތެއް ކަމަށްވެސް މޮރިއޭރޯ ބުންޏެވެ. މޮރިއޭރޯ ބުނީ ޕްރެޒިޑެންޓްސް ކަޕުގައި ޓީމުތަކަށް ގިނަ މެޗުތަކެއް ކުޅެން ލިބުމުން އޭނާއަށް ސްކޮޑް ނެގުމުގައި ފަސޭހަތަކެއް އެބަހުރި ކަމަށެވެ. އަދި ފެންވަރު ހުރި މޮޅު ގިނަ ކުޅުންތެރިންތަކެއް މި މުބާރާތުގައި ފެނިގެންދާ ކަމަށްވެސް ވަނީ ބުނެފައެވެ.

ރާއްޖޭގެ ފުޓުބޯޅައިގެ ހާލަތާ ބެހޭ ގޮތުން މޮރިއޭރޯ ބުނީ ރާއްޖެއަކީ ފެންވަރު ރަނގަޅު ކުޅުންތެރިންތަކެއް ތިބި ގައުމެއް ކަމަށާއި، އެކަމަކު ވަސީލަތްތައް ހުރި ފެންވަރު މަތިކުރުމުގެ އިތުރުން ކުޅުންތެރިންގެ ވިސްނުން ފުޓްބޯޅައިގެ ތެރޭގައި ހަރުދަނާ ކުރެވޭނެ ބަދަލުތަކެއް ގެންނަން ޖެހޭ ކަމަށެވެ.

މޮރިއޭރޯގެ އެދުމާ އެއްގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މިދިޔަ ޑިސެމްބަރު މަހު ވަނީ ގައުމީ ފުޓްބޯޅަ ޓީމުގެ އެސިސްޓަންޓް ކޯޗަކަށް ޕޯޗުގަލުގެ ކޯޗު ސިމާއޯ ކޮސްޓާ ހަމަޖައްސައިފައެވެ. މޮރިއޭރޯ އާއި ސިމާއޯ އަންނަނީ ޕްރެޒިޑެންޓްސް ކަޕުގެ މެޗުތައް ބެލުމުގެ އިތުުރުން މެޗުތަކުގައި ރަނގަޅަށް ކުޅޭ ކުޅުންތެރިންގެ މައުލޫމާތު އެއްކުރަމުންނެވެ. ގައުމީ ޓީމާއެކު މޮރިއޭރޯ އެއްބަސްވުން ހަދާފައިވަނީ އެއް އަހަރުގެ މުއްދަތަކަށެވެ.