ރާއްޖެ – ޕާކިސްތާން ފުޓްބޯޅަ މެޗު ލ. ގަމުގައި

ދިވެހިރާއްޖެ އާއި ޕާކިސްތާނުގެ ގައުމީ ފުޓްބޯޅަ ޓީމު ކުޅޭ އެކުވެރިކަމުގެ މެޗު ލ. ގަމުގައި ކުޅެން ނިންމައިފި އެވެ.

މި މަހުގެ 21 ވަނަ ދުވަހު ކުޅޭ މި މެޗާ ބެހޭ ގޮތުން މިކަން ޕާކިސްތާނުގެ ފުޓްބޯޅަ ފެޑަރޭޝަނުން ޔަގީންކޮށްދޭއިރު ފުޓްބޯޅަ އެސޯސިއޭޝަން އޮފް މޯލްޑިވްސްއިން ވަކިއެއްޗެއްނުބުނެ އެވެ. އަދި ގައުމީ ޓީމުގެ ފަރިތަކުރުމެއް ވެސް ނެތެވެ. ނަމަވެސް ލ. އަތޮޅު ކައުންސިލްތަކުން ވަނީ މި މެޗު އިސްތިހާރު ކުރަން ފަށައިފަ އެވެ.

ލ. ގަމު ޒޯން ސްޓޭޑިއަމުގައި، މި މެޗު ކުޅޭ މައިގަނޑު އެއް ސަބަބަކީ ސަރުކާރުން އެ ރަށުގައި އަޅާފައިވާ ފުޓްބޯޅަ ދަނޑުގައި އިންޓަނޭޝަނަލް މެޗެއް ކުޅުމާއި އަތޮޅުތެރޭގެ ސަޕޯޓަރުންނަށް ގައުމީ ޓީމު ކުޅޭ މަންޒަރު ހަމަލޮލުން ބަލާލުމުގެ ފުރުސަތު ދިނުމެވެ. މިދިޔަ އަހަރު މި ދަނޑު 2021 ވަނަ އަހަރު ހުޅުވުމުގެ ރަސްމިއްޔާތުގައި މިކަން އިއުލާނު ކުރެއްވީ ކުޅިވަރާ ބެހޭ ވަޒީރު އަހުމަދު މަހުލޫފެވެ. މިއީ އައްޑޫ ފިޔަވައި އަތޮޅުތެރޭގައި ބައިނަލްއަގްވާމީ ފެންވަރުގެ މެޗެއް ކުޅޭނެ ފުރަތަމަ ފަހަރެވެ.  

މި މެޗަށް ޕާކިސްތާން ދަނީ ފޯރީގައި ފަރިތަކުރަމުންނެވެ. އެމީހުން ތައްޔާރުވަމުންދަނީ މި އަހަރުގެ މެދުތެރޭގައި ބާއްވާ ސާފް ޗެމްޕިއަންޝިޕާއި އޭގެ ފަހުން ކުޅެންޖެހޭ ވޯލްޑްކަޕް ކޮލިފައިންގެ މެޗުތަކަށެވެ. ޕާކިސްތާނުން ފުޓްބޯޅަ ޓީމު އަލުން ބިނާކުރަން ފަށާފައިމިވަނީ ގާތްގަނޑަށް ދޮޅު އަހަރު ދުވަހު ފީފާގެ ސަސްޕެންޝަނުގައި އޮތުމަށްފަހު މިދިޔަ އަހަރުގެ ފަހުބައިގައި އެކަމުން އަރައިގަތުމަށްފަހު އެވެ.

ޕާކިސްތާނާއި ރާއްޖެ އެންމެ ފަހުން އެކުވެރިކަމުގެ މެޗެއް ކުޅުނީ 2013 ވަނަ އަހަރު އެވެ.