ޤައުމީ ކޯޗު މޮރިއޭރޯ އަށް ދިހަ މަސް ދުވަހުގެ މުސާރަ ނުދޭ ކަމުގެ ތުހުމަތު!
މޮރިއޭރޯގެ އިތުރުން ބައެއް އެހެން ޓެކްނިކަލް މުވައްޒަފުންނަށް ވެސް މުސާރަ ނުދޭ ކަމުގެ މައުލޫމާތު ވަނީ ލިބިފައި
ގައުމީ ޓީމުގެ ފަރިތަކުރުންތަކުގެ ތެރެއިން ކޯޗު ފްރެންސެސްކޯ މޮރިއޭރޯ
ޤައުމީ ފިރިހެން ފުޓުބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯ އަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން މުސާރަ ނުދޭ ކަމުގެ ތަހުމުތު ކުރެއްވިއްޖެ އެވެ.
އެފްއޭއެމުން މޮރިއޭރޯ އަށް މުސާރަ ނުދޭ ވާހަކަތައް ދެކެވުނީ އިންޑިއާގައި މިހާރު ކުރިއަށްދާ ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެ އިން ބަންގްލަދޭޝްއާ ދެކޮޅަށް ކުޅުނު މެޗުން ބަލިވުމާއެކު އެވެ. އެފްއޭއެމުން އެ އިދާރާގެ މުވައްޒަފުންނަށް ވެސް މުސާރަ ނުދޭ ވާހަކަތައް ދޭތެރެއިން ފެންމަތިވެ އެވެ. ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި އެފްއޭއެމުން މޮރިއޭރޯ އަށް މުސާރަ ނުދޭތާ 10 މަސް ދުވަސް ވެއްޖެ އެވެ. މޮރިއޭރޯގެ އިތުރުން ބައެއް އެހެން ޓެކްނިކަލް މުވައްޒަފުންނަށް ވެސް މުސާރަ ނުދޭ ކަމުގެ މައުލޫމާތު ވަނީ ލިބިފަ އެވެ. އެކަން އެ އިދާރާގައި މަސައްކަތް ކުރާ ބައެއް ފަރާތްތަކުން ވަނީ މި ނޫހަށް ކަށަވަރު ކޮށްދީފަ އެވެ.
މިކަމާ ގުޅިގެން ރާއްޖެ އެމްވީ އިން އެފްއޭއެމްގެ ޖެނެރަލް ސެކްރެޓަރީ ޙުސެއިން ޖަވާޒް (ޖަވާ)އާ ސުވާލު ކުރުމުން ވިދާޅުވީ، އެއީ ދޮގު ވާހަތަކެއް ކަމަށެވެ. އަދި އެކަން ޔަގީން ކުރުމަށް ޤައުމީ ކޯޗު މޮރިއޭރޯއާ ސުވާލު ކުރުމަށް ވެސް ޖަވާ ވަނީ އެދިފަ އެވެ. ނަމަވެސް މިވަގުތު މޮރިއޭރޯ މީޑިއާތަކާ ވާހަކަ ދައްކާކަށް ބޭނުމެއް ނުވެ އެވެ. ސާފް ޗެމްޕިއަންޝިޕްގައި ބަންގްލަދޭޝް އަތުން ބަަލިވި މެޗަށްފަހު ވެސް މޮރިއޭރޯ ވަނީ ނޫސްވެރިންގެ ސުވާލުތަކަށް ޖަވާބު ދިނުމަށް ދެކޮޅު ހަދައިފަ އެވެ. އެ ޕްރެސްގައި މޮރިއޭރޯ ވަނީ އޭނާގެ ސްޓޭޓްމަންޓު ދިނުމަށްފަހު ޕްރެސް ދޫކޮށް ގޮސްފަ އެވެ. އެކަމާ ގުޅިގެން ގިނަ ބަޔަކު އަންނަނީ އޭނާ އަށް ފާޑު ކިޔަމުންނެވެ.
މިފަހުން ވެސް އެފްއޭއެމްގެ މާލީ މައްސަލަ ވަނީ ބޮޑުވެފަ އެވެ.
