ގައުމީ ކޯޗު މޮރިއޭރޯއާއި މުވައްޒަފުންނަށް މުސާރަ ނުދެވޭކަމަށް އެފްއޭއެމުން އެއްބަސްވެއްޖެ!

ގައުމީ ފުޓުބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯއާއި އިދާރާގެ މުވައްޒަފުންނަށް މުސާރަ ނުދެވި ހުންނާނެ ކަމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

އެފްއޭއެމްގެ މުސާރައިގެ މައްސަލައަކީ އަބަދުމެ ފެންމަތިވަމުން އަންނަ މައްސަލައެކެވެ. ގައުމީ ކޯޗު މޮރިއޭރޯއަށް އެފްއޭއެމުން މުސާރަ ނުދީ އޮތްކަން ފެންމަތިވީ ދާދި ފަހުން އިންޑިއާގައި ނިމުނު ސާފް ޗެމްޕިއަންޝިޕް ފުޓުބޯޅަ މުބާރާތުގެ ތެރެއިންނެވެ. ނަމަވެސް އެކަމާ ގުޅިގެން އެފްއޭއެމްގެ ޖެނަރަލް ސެކްރެޓަރީ ހުސައިން ޖަވާޒް (ޖަވާ)އަށް ސުވާލު ދެންވުމުން އޭރު ވިދާޅުވީ އެއީ ދޮގު ވާހަކައެއް ކަމަށެވެ. އަދި އެކަމާ ގުޅިގެން އިތުރަށް ކަންކަން ސާފުކުރަން ބޭނުންވާނަމަ، ސީދާ ކޯޗާ ސުވާލު ކުރުމަށްވެސް ޖަވާ ވަނީ އެދިވަޑައިގެންފައެވެ. އޭގެ ފަހުން ވެސް މުސާރައިގެ ސުވާލުތައް އެފްއޭއެމަށް ކުރުމުން ވަނީ ޖަވާބު ދޭން ދެކޮޅު ހަދާފައެވެ.

އަންގާރަ ދުވަހު އެފްއޭއެމްގެ ރައީސް ބައްސާމް ބޭއްވެވި ނޫސްވެެރިންގެ ބައްދަލުވުމުގައި ބައްސާމް ވިދާޅުވީ ގައުމީ ކޯޗު މޮރިއޭރޯއަށް ނުދެވޭ މުސާރަ ހުންނާނެ ކަމަށެވެ. އޭނާ ވިދާޅުވީ ކޯޗުގެ މުސާރައަކީ ސްޕޮންސަރެއްގެ ދަށުން ހަމަޖެހިގެން އައި ކަމެއް ކަމަށެވެ. އެހެންކަމުން ފުރަތަމަ ތިން މަސް ދުވަހު ސްޕޮންސަރުންގެ ފަރާތުން އެ ފައިސާ ލިބުނު ނަމަވެސް، އޭގެ ފަހުން އެކަން ހުއްޓިފައި އޮތް ކަމަށެވެ. އެހާލަތުގައި އެފްއޭއެމަށް ވެސް ވަރަށް ބޮޑެތި އުނދަގޫތަކެއް ކުރިމަތިވި ކަމަށާއި، ސަބަބަކީ އެކަމަށް ސްޕޮންސަރެއް ހަމަޖެހުމާއެކު އެ ޚަރަދު އެފްއޭއެމްގެ ބަޖެޓުން ނުކުރަން ނިންމާފައި އޮތުމުން ކަމަށެވެ. އެކަމުގެ ތެރެއިން ކުރިމަތިވި "ތާށިކަމުގެ ތެރެއިން" ކޯޗަށް މުސާރަ ނުދެވުނު ނަމަވެސް، ސާފް ޗެމްޕިއަންޝިޕަށް ގައުމީ ޓީމާއެކު ކޯޗު ދިޔައިރު، މުސާރަައިގެ ބޮޑު ބައި ދީފައި ވާނެ ކަމަށް ބައްސާމް ވިދާޅުވިއެވެ. ގާތްގަނޑަކަށް ކޯޗަށް މުސާރަ ނުދެވި ފަހެއް ނުވަތަ ހަ މަސް ދުވަސް ވެފައިވާނެ ކަމަށާއި، ނަމަވެސް ކޯޗާއެކު ބާއްވާ ބައްދަލުވުމަށް ދިޔުމުގެ ކުރިން އެކަން ހަމަޖައްސަން މަސައްކަތްކުރާނެ ކަމުގައިވެސް އޭނާ ވަނީ ވިދާޅުވެފައެވެ.

އެ ހުރިހާ ކަމަކަށް މެދުވެރިވި ސަބަބަކީ އެފްއޭއެމަށް މާލީ ގޮތުން ދިމާވި މައްސަލަތައްކަން ފާހަގަކުރައްވައި ބައްސާމް ވިދާޅުވީ، މުވައްޒަފުންނަށް މުސާރަ ނުދެވިވެސް އޮންނާނެ ކަމަށެވެ. ބައެއް މުވައްޒަފުންނަށް މުސާރަ ނުދެވޭތާ ހަތަރު މަސްދުވަހަށްވުރެ ގިނަވެފައި ވާނެކަމަށާއި، ކުރިއަށް އޮތް ދެ ހަފުތާގެ ތެރޭގައި މުސާރައިގެ މައްސަލަ އެއްކޮށް ނިންމާނެ ކަމަށެވެ.

މީގެ އިތުރުން މުވައްޒަފުންގެ ޕެންޝަން ފައިސާއަށް ދިމާވެފައިވާ މައްސަލަ ވެސް ބައްސާމް ވަނީ ސާފުކޮށް ދެއްވާފައެވެ. އެގޮތުން 2017 ވަނަ އަހަރުން ފެށިގެން އެ މައްސަލަ ކުރިމަތިވި ކަމަށާއި، ނަމަވެސް އެއީ އިދާރީ މައްސަލައެއްގެ ތެރެއިން ދިމާވި ކަމެއް ކަމަށް އޭނަ ވިދާޅުވިއެވެ. ނަމަވެސް މިހާތަނަށް އައިއިރު، 2021 ވަނަ އަހަރާ ހަމައަށް ޕެންޝަނަށް ޖަމާކުރަންޖެހޭ ފައިސާ ޖަމާކޮށްފައިވާނެކަމަށް ބައްސާމް ވިދާޅުވިއެވެ. އަދި އެ ތާރީޚުގެ ފަހުން އެ އޮތް މުއްދަތަށްވާ ފައިސާވެސް ކުރިއަށް އޮތް ދުވަސްތަކުގެ ތެރޭގައި ދައްކަމުން ދާނެކަމަށް ބައްސާމް ވަނީ ވިދާޅުވެފައެވެ.