ފްރެންޗް ލީގުގައި ހޮނިހިރު ދުވަހުގެރޭ ކުޅުނު މެޗުން ބްރެސްޓް އަތުން ޕީއެސްޖީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ 2-0 ގެ ނަތީޖާއަކުންނެވެ.

މި މެޗުގައި އާޖެންޓީނާގެ ތަރި ލިއޮނެލް މެސީ އާއި ބްރެޒިލުގެ ތަރި ނޭމާވެސް ކުޅެފައި ނުވާއިރު، މެޗުގައި ތަފާތު ދެއްކީ ފްރާންސްގެ ޒުވާން ތަރި ކީލިއަން އެމްބާޕޭއެވެ. އެގޮތުން މެޗު ފަށައިގެން 32 ވަނަ މިނެޓުގައި ޖިއޮޖީނިއޯ ވައިނަލްޑަމް ދިން ބޯޅައަކުން އެމްބާޕޭ ވަނީ ޕީއެސްޖީއަށް ލީޑު ނަގައިދީފައެވެ. މިއީ މި ސީޒަނުގެ ލީގުގައި އެމްބާޕޭ ކާމިޔާބުކުރި 10 ވަނަ ލަނޑެވެ. އަދި އޭނާ ވަނީ މި ސީޒަނުގެ ހުރިހާ މުބާރާތެއްގައި މިހާތަނަށް 19 ލަނޑު ހަމަކޮށްފައެވެ.

އޭގެ ފަހުންވެސް މި މެޗުގައި ޕީއެސްޖީން ގިނަ ހަމަލާތަކެއް އުފެއްދިއިރު، މެޗުގެ ދެވަނަ ހާފުގެ ކުރީކޮޅު އެ ޓީމުން ވަނީ ލީޑު ފުޅާކޮށްފައެވެ. މި ހާފު ފެށައިގެން އަށްވަނަ މިނެޓުގައި ޓަވަރޭސް މެންޑޭޒް ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ތިލޯ ކެރާއެވެ.

މި މޮޅާއެކު ތާވަލުގެ އެއްވަނައިގައި ޕީއެސްޖީ އޮތީ 11 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 21 މެޗުން ޕީއެސްޖީއަށް 50 ޕޮއިންޓް ލިބިފައިވާއިރު، ދެވަނައިގައި އޮތް ނީސްއަށް 21 މެޗުން ލިބިފައިވަނީ 39 ޕޮއިންޓެވެ. އަދި ޕީއެސްޖީ އަތުން ބަލިވި ބްރެސްޓް އޮތީ ތާވަލުގެ 13 ވަނައިގައި 21 މެޗުން 25 ޕޮއިންޓާއެކުއެވެ.