2 ކޮމަންޑޫ ގުޅާލުމުގެ މަޝްރޫއު ހުކުރު ދުވަހު ފަށަނީ
11 ޖެނުއަރީ 2022 | އަންގާރަ 18:23ރައީސް ވިދާޅުވީ ކޮމަންޑޫގެ ރައްޔިތުންނަށް ދިމާވެފައިވާ ބޯހިޔާވަހިކަމަށް އޮތް ހައްލަކީ މަތިކޮމަންޑޫއާއި ކޮމަންޑޫ ގުޅުވާލުންކަމަށް
މަތިކޮމަންޑޫ
ށ. ކޮމަންޑޫއާއި، ޖެހިގެން އޮތް މަތިކޮމަންޑޫ ގުޅާލުމުގެ އަމަލީ މަސައްކަތް ހުކުރު ދުވަހު ފަށާގޮތަށް ނިންމައިފިއެވެ.
އެކަމާގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ކޮމަންޑޫ ކައުންސިލްގެ ރައީސް މުހައްމަދު ސިނާން ވިދާޅުވީ އެމަޝްރޫއުގެ އަމަލީ މަސައްކަތް ފެށުމުގެ ރަސްމިއްޔާތު ހުކުރު ދުވަހު ބޭއްވުމުގެ ތައްޔާރީތައް ވަމުން އަންނަކަމަށެވެ.
ކޮމަންޑޫ ދާއިރާގެ ބައި-އިލެކްޝަންގައި އެމްޑީޕީން ވާދަކުރާ ކެންޑިޑޭޓް ރަސްމީކޮށް ތައާރަފްކުރުމަށް ކޮމަންޑޫގައި މިދިޔަ ހަފްތާގެ ހުކުރު ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވީ، ކޮމަންޑޫގެ ރައްޔިތުންނަށް ދިމާވެފައިވާ ބޯހިޔާވަހިކަމަށް އޮތް ހައްލަކީ މަތި ކޮމަންޑޫއާއި ކޮމަންޑޫ ގުޅުވާލުންކަމަށެވެ. އެއީ ސަރުކާރުން ވެފައިވާ ވައުދެއްކަމަށާއި ލަސްތަކެއް ނުވެ އެމަސައްކަތް ފެށިގެންދާނެ ކަމަށް ރައީސް ވިދާޅުވިއެވެ.
އެމަސައްކަތް ފަށާ ވާހަކަ ބުނުމުން، އެއީ ކެމްޕެއިނާ ދިމާކޮށް ދައްކާ ވާހަކައެއްކަމަށް ބަޔަކު ބުންޏަސް އެމަސައްކަތް ފަށައިގެން ކުރިޔަށް ގެންދާނެކަމަށެވެ. އެކަމުގެ ޕްލޭން މިހާރު ވަނީ ހަދައި ނިމިފައިކަމަށް ރައީސް ވިދާޅުވިއެވެ. ކުރިޔަށް އޮތް ހަފުތާތެރޭގައި އެކަމުގެ އަމަލީ މަސައްކަތް ފެށޭނެކަމަށް ރައީސް ވަނީ ވިދާޅުވެފައެވެ.
ދެކޮމަންޑޫ ގުޅާލުމުގެ ޕްލޭނަށް އާންމުންގެ ޚިޔާލު ހޯދުމަށް ކޮމަންޑޫ ކައުންސިލުން ވަނީ ހުޅުވާލާފައެވެ. އެކަމާ ގުޅޭގޮތުން ވާހަކަދައްކަވަމުން ސިނާން ވިދާޅުވީ، ދެކޮމަންޑޫ ގުޅާލުމަކީ ވަރަށް ކުރިއްސުރެވެސް ދައްކަމުންދާ ވާހަކައެއްކަމަށާއި ކުރީގެ ސަރުކާރުތަކުންވެސް ދެކޮމަންޑޫ ގުޅާލުމުގެ ވައުދުތައް ވެފައިވާކަމަށް ސިނާން ވިދާޅުވިއެވެ. އެހެންކަމުން ފުރިހަމަވާން އުޅެނީ ވަރަށް ކުރިއްސުރެ ރައްޔިތުން ދެކެމުން އައި ހުވަފެނެއްކަމަށް ސިނާން ވިދާޅުވިއެވެ.
ދެކޮމަންޑޫ ގުޅާލުމުގެ މަޝްރޫއުގައި ފުރަތަމަ ކުރާނީ ބިން ހިއްކުމުގެ މަސައްކަތެވެ. އެއަށްފަހު ބުރިޖަކުން ދެ ރަށް ގުޅާލުމަށް ވަނީ ހަމަޖައްސާފައެވެ.
