ކޮމަންޑޫގެ އައު އިންޖީނުގޭގެ ޚިދުމަތްދޭން ފަށައިފި
8 ޖެނުއަރީ 2022 | ހޮނިހިރު 16:41ކޮމަންޑޫގައި އަލަށް ގާއިމުކޮށްފައި ވަނީ 600 މެގަވޮޓްގެ ޖަނަރޭޓަރު ސެޓެއް
ކޮމަންޑޫގެ އައު އިންޖީނުގެ
ށ. ކޮމަންޑޫގެ އައު އިންޖީނުގޭގެ މަސައްކަތް ނިންމައި، އެތަނުން ޚިދުމަތްދޭން ފަށާފައިވާކަމަށް ފެނަކަ ކޯޕަރޭޝަން ލިމިޓެޑުން ބުނެފިއެވެ.
ކޮމަންޑޫގެ މީހުން ދިރިއުޅޭ ހިސާބުގައި ހުރި ބައު އިންޖީނުގެ ހުކުރުދުވަހު ނިއްވާލަދެއްވީ ރައީސް އިބްރާހީމް މުހައްމަދު ސޯލިހެވެ. އަދި އެއާއެކު ހުކުރުދުވަހު ހަވީރު، އައު އިންޖީނު ގެއިން ޚިދުމަތްދޭން ވަނީ ފަށައިފައެވެ.
ކޮމަންޑޫގައި އަލަށް ގާއިމުކޮށްފައި ވަނީ 600 މެގަވޮޓްގެ ޖަނަރޭޓަރު ސެޓެކެވެ. މިއާއެކު އެރަށުގެ ކަރަންޓުގެ ޖުމްލަ ކެޕޭސިޓީއަކީ 1.3 މެގަވޮޓެވެ.
އެރަށު ބައު އިންޖީނުގެއަކީ ވޭތުވެ ދިޔަ 32 އަހަރުވެސް އެ ރަށުގެ ރައްޔިތުންނަށް ކަރަންޓު ފޯރުކޮށްދިނުމަށް ބޭނުންކުރަމުން ދިޔަ އިންޖީނުގެއެވެ. އެ އިންޖީނު ގެ ހުންނަނީ ރަށުގެ މެދެއްހާ ހިސާބުގައެވެ.
ރަށްރަށުގެ އިންޖީނުގެތައް މީހުން ދިރިއުޅޭ ހިސާބުތަކާ ދުރަށް ގެންދިއުމަކީ ރައީސް ސޯލިހުގެ ވައުދުފުޅެކެވެ. އަދި ފެނަކައާއެކު ގިނަ ރަށްރަށުގެ އިންޖީނުގެތައް މިހާރު ވަނީ މީހުން ދިރިއުޅޭ ހިސާބުތަކާ ދުރަށް ގެންގޮސްފައެވެ.
