އައު އަހަރު އެކި ގައުމުތަކުން ރާއްޖެއަށް ޒިޔާރަތްކުރާ ފުރަތަމަ ފަތުރުވެރިންނަށް މަރުހަބާ ކިޔުން ފޯރިޔާއެކު ކުރިއަށް

އެކި ގައުމުތަކުން ރާއްޖެއަށް މިއަހަރު ޒިޔާރަތްކުރާ ފުރަތަމަ ފަތުރުވެރިންނަށް މަރުހަބާ ކިޔުން ފޯރިޔާއެކު ކުރިއަށް ގެންގޮސްފިއެވެ.

ރާއްޖޭގެ ފަތުރުވެރިކަމަށް 50 އަހަރުފުރޭ ރަންޔޫބީލް އަހަރުގައި ފުރަތަމަ ފަތުރުވެރިއަކަށް ރާއްޖެ އައިސްފައިވަނީ އިނގިރޭސިވިލާތުގެ ރައްޔިތެއްކަމަށްވާ ޖޯޖީނާ ކެނިންގ އެވެ. ޖޯޖީނާ އޭނާގެ ބައިވެރިޔާއާއެކު ރާއްޖެ އައިސްފައިވަނީ ގަލްފް އެއަރ ފްލައިޓް (ޖީއެފް144) ގައި ހޮނިހިރު ދުވަހުގެ ހެނދުނު 06:10 ހާއިރުއެވެ. މިއީ އޭނާ ރާއްޖެ އައި ދެވަނަ ފަހަރުކަމަށް އެމްއެމްޕީއާރްސީން މައުލޫމާތު ދެއެވެ.

ޖޯޖީނާއަށް މަރުހަބާ ކިއުމަށް ޚާއްސަ ހަފްލާއެއް ވެލާނާ އިންޓަރނޭޝަނަލް އެއަރޕޯޓުގައި ކުރިއަށް ގެންގޮސްފައިވާއިރު، ޓޫރިޒަމް މިނިސްޓްރީއާއި، އެމްއެމްޕީއާރްސީއާއި، އިމިގްރޭޝަން އަދި އެއަރޕޯޓްސް ކޮމްޕެނީގެ އިސްވެރިން އަހަރުގެ ފުރަތަމަ ފަތުރުވެރިޔާއަށް މަރުޙަބާ ކިޔުމުގައި ބައިވެރިވެ ވަޑައިގެންފައިވެއެވެ.

އެއަށްފަހު، އެކި ގައުމުތަކުން ރާއްޖެއަށް އައި ފުރަތަމަ ފަތުރުވެރިންނަށް މަރުހަބާ ކިއުން ވަނީ ކުރިއަށް ގެންގޮސްފައެވެ. އެގޮތުން އިޓަލީ، ޖަރމަނީ، ރަޝިއާ، ސްޕެއިން، އިންޑިއާ، ފްރާންސް، ސައުދީ، ޔޫކްރެއިން އަދި އެމެރިކާ ފަދަ ގައުމުތަކުން ރާއްޖެއަށް އައި ފުރަތަމަ ފަތުރުވެރިންނަށް މަރުހަބާ ކިއުން ކުރިއަށް ގެންގޮސްފައިވެއެވެ.

ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމަށް ވާ ތައްޔާރީތަކުގެ ތެރެއިން، ފަތުރުވެރިކަމުގެ ރަންޔޫބީލް، ރަން އަހަރުގެ ގޮތުގައި ބްރޭންޑްކޮށް، ޕްރޮމޯޓް ކުރުމަށް ރަންޔޫބީލް އަހަރަށް ޚާއްސަކޮށްގެން ލޯގޯއާއި ސްޓޭމްޕްވެސް ވަނީ ތައްޔާރުކޮށްފައެވެ.

ފަތުރުވެރިކަމުގެ ރަންޔޫބީލް އަހަރު ފެށިފައިވާއިރު، ޓޫރިޒަމް މިނިސްޓަރ ޑރ.މައުސޫމް ވަނީ ފަތުރުވެރިކަމުގެ ސިނާއަތުގެ އެންމެ މުހިންމު ހިއްސާދާރުންނަކީ އެސިނާއަތުގައި މަސައްކަތްކުރާ މުވައްޒަފުން ކަމަށާއި ސިނާއަތުގެ ރަންޔޫބީލް ފާހަގަކުރާއިރު، މުވައްޒަފުންގެ ހިނުތުންވުމަކީ މުހިންމު ކަމެއް ކަމަށް ވިދާޅުވެފައެވެ. އެހެން ކަމުން 2022 ވަނަ އަހަރު ފަތުރުވެރިކަމުގެ ރަން އަހަރުގެ ގޮތުގައި ފާހަގަކުރާއިރު، ރަން އަހަރަކަށް ވެގެންދާނީ ސިނާއަތުގެ މުވައްޒަފުންނަށް ހިނިތުންވުން ލިބިގެން ކަމަށް މިނިސްޓަރ ވިދާޅުވިއެވެ.