ރާއްޖެ އިސްތިހާރު ކުރުމުގެ އެމްބެސެޑަރަކަށް އަނެއްކާ ވެސް ފަބްރީޒިއޯ ރޮމާނޯ
6 ސެޕްޓެމްބަރު 2026 | އާދީއްތަ 04:46ވިސިޓް މޯލްޑިވްސް އާއެކު ސޮއިކޮށްފައިވާ އެއްބަސްވުން އައުކޮށްފައިވާ ކަމަށް ފަބްރީޒިއޯ ވަނީ އޭނާގެ ސޯޝަލް މީޑިއާގައި ހާމަކޮށްފައި. ވޭތުވެދިޔަ ދެ އަހަރު ވެސް އޭނާ ވަނީ، ވިސިޓް މޯލްޑިވްސް އާއެކު ރާއްޖެ އިސްތިހާރު ކުރުމަށް ގިނަ މަސައްކަތްތަކެއް ކޮށްފައި
އިޓަލީގެ ކުޅިވަރު ނޫސްވެރިޔާ ފަބްރީޒިއޯ ރޮމާާނޯ | ސޯޝަލް މީޑިއާ
ރާއްޖޭގެ އިސްތިހާރު ކުރުމުގެ އެމްބެސެޑަރަކަށް މަޝްހޫރު ކުޅިވަރު ނޫސްވެރިޔާ ފަބްރީޒިއޯ ރޮމާނޯ އަނެއްކާ ވެސް ހަމަޖައްސައިފި އެވެ.
ވިސިޓް މޯލްޑިވްސް އާއެކު ސޮއިކޮށްފައިވާ އެއްބަސްވުން އައުކޮށްފައިވާ ކަމަށް ފަބްރީޒިއޯ ވަނީ އޭނާގެ ސޯޝަލް މީޑިއާގައި ހާމަކޮށްފަ އެވެ. ވޭތުވެދިޔަ ދެ އަހަރު ވެސް އޭނާ ވަނީ، ވިސިޓް މޯލްޑިވްސް އާއެކު ރާއްޖެ އިސްތިހާރު ކުރުމަށް ގިނަ މަސައްކަތްތަކެއް ކޮށްފަ އެވެ. އެއްބަސްވުން އައުކުރުމަށް ފަހު ފަބްރީޒިއޯ ބުނެފައި ވަނީ، ރާއްޖޭގެ އެމްބެސެޑަރެއްގެ ގޮތުގައި އަނެއްކާ ވެސް ހުރުމުގެ ފުރުސަތު ލިބުމުން އުފާވާ ކަމަށެވެ.
އިޓަލީ އަށް ނިސްބަތްވާ އަދި މުޅި ދުނިޔޭގެ ވެސް މަޤޫބޫލުކަން ހޯދާފައިވާ ފަބްރީޒިއޯ ވަނީ ވޭތުވެދިޔަ ދުވަސްތަކުގައި އެތައް ފަހަރެއްގެ މަތިން ރާއްޖެ އައިސް، ރާއްޖެ އިސްތިހާރު ކުރުމަށް ގިނަ މަސައްކަތްތަކެއް ކޮށްފައި އެވެ. އެގޮތުން އޭނާ ވަނީ ރާއްޖޭގެ ބައެއް ޒުވާން ކުޅުންތެރިންނާ އެކު ވަގުތު ހޭދަކޮށް، އެ މަންޒަރުތައް ސޯޝަލް މީޑިއާގައި ވެސް އާންމުކޮށްފަ އެވެ.
އެންމެ ފުރަތަމަ ފަބްރީޒިއޯ ރާއްޖެ އައިސްފައި ވަނީ 2022 ވަނަ އަހަރު އެވެ. އެއީ އެ އަހަރު އޮތް މޯލްޑިވްސް ސްޕޯޓްސް އެވޯޑްސް ހަފްލާގައި ބައިވެރިވުމަށެވެ. އޭގެ ފަހުން އެކި ފަހަރު މަތިން އޭނާ ރާއްޖެ އައިސްފައިވާއިރު، ފަބްރީޒިއޯ ވަނީ ރާއްޖޭގެ ކުޅިވަރު ނޫސްވެރިންނާއެކު ވަގުތު ހޭދަކޮށް، ފުޓްސަލް މެޗެއް ވެސް ކުޅެފަ އެވެ.
ދުނިޔޭގެ އެކި ކަންކޮޅުތަކުގައި ފަބްރީޒިއޯ މަޝްހޫރުވެފައި ވަނީ ފުޓުބޯޅައިގެ ޓްރާންސްފާގެ ޚަބަރުތަކާއި މުބާރާތްތަކުގެ ޚަބަރުތަކުގެ އިތުރުން، ކުޅިވަރުގެ އެކި އެކި ޚަބަރުތައް ގެނެސްދޭ ނޫސްވެރިއެއްގެ ގޮތަށެވެ. ޚާއްސަކޮށް ބޭރުގެ ޓްރާންސްފާ މާކެޓުގެ ކަންކަން އެންމެ ބޮޑަށް ދިރާސާކުރާ އަދި އެންމެ އިތުބާރު ކުރެވޭ އެއް ނޫސްވެރިޔަކީ ވެސް އޭނާ އެވެ.
