ވިޒިޓް މޯލްޑިވްސް ކޯޕަރޭޝަންގެ އަގުވެއްޓި، ނަން ކިލަނބުވަމުންދާތީ އެމްބެސެޑަރުކަމުން ޓޫ އޮފް އަސް ސަސްޕެންޑްކޮށްފި

ދިވެހި ބޭންޑު، ޓޫ އޮފް އަސްއަށް ކުރެވޭ އެކި ތުހުމަތުތަކާއި އެ ބޭންޑާ ބެހޭ ގޮތުން ދައުރުވަމުންދާ ނޭދެވޭ ވާހަކަތަކުގެ އަސަރު ވިޒިޓް މޯލްޑިވްސް ކޯޕަރޭޝަން (ވީއެމްސީ)އަށް ފޯރައި ކުންފުނީގެ އަގުވެއްޓި، ނަން ކިލަނބުވަމުންދާތީ އެ ކުންފުނިން ޓޫ އޮފް އަސްއާ އެކު ހަދާފައިވާ އެމްބެސެޑަރޝިޕް ޕްރޮގްރާމް ވަގުތީ ގޮތުން މެދުކަނޑާލައިފި އެވެ.

ވިޒިޓް މޯލްޑިވްސްގެ އެމްބެސެޑަރަކަށް ޓޫ އޮފް އަސް ހަމަޖެއްސީ މިދިޔަ އަހަރު ޖުލައިގަ އެވެ. އެނގިފައިވާ ގޮތުގައި އެ ބޭންޑުގެ އެމްބެސެޑަރޝިޕް ސަސްޕެންޑް ކުރީ މިދިޔަ މަހު އެވެ. ސަބަބެއް ކަމަށް އެނގިފައި ވަނީ ފައިސާގެ ކަންކަމުގައި އެ ބޭންޑާ މެދު ފެތުރެމުންދާ ވާހަކަތަކުގެ ނޭދެވޭ އަސަރު ވިޒިޓް މޯލްޑިވްސް އަށް ކުރާތީ އެވެ. 

އަދި އެ އެމްބެސެޑަރޝިޕް ބާތިލުކުރިކަން އަންގައި މިދިޔަ މަހު 22 ގައި ވީއެމްސީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ، ޓޫ އޮފް އަސްގެ ލަވަކިޔުންތެރިޔާ އަހްމަދު އަދުހަމްއަށް ސިޓީއެއް ފޮނުވާފައިވާކަން ވަނީ އެނގިފަ އެވެ. ދައުރު ނޫހުގައި ޝާއިއު ކޮށްފައިވާ ހަބަރުގައި ވާގޮތުން އެއާ އެކު ސިޓީ ފޮނުވި ތާރީހުން ފެށިގެން ކޮށްގެން ނުވާނެ ކަންކަން ވެސް ވީއެމްސީން ވަނީ ޓޫ އޮފް އަސްއަށް އަންގާފަ އެވެ. 

އެގޮތުން ވިޒިޓް މޯލްޑިވްސްގެ ނަމާއި ލޯގޯ އައި ބްރޭންޑިންގ އަދި އެއްވެސް އިންޓެލެކްޗުއަލް ޕްރޮޕަޓީއެއް ބޭނުން ނުކުރުން، ވީއެމްސީއާ ގުޅޭ މުއާމަލާތްތަކާއި ޕްރޮމޯޝަންތަކާއި އެ ނޫނަސް އެއްވެސް ހަރަކާތެއްގައި ބައިވެރި ނުވުން އަދި ޓޫ އޮފް އަސް އަކީ ވިސިޓް މޯލްޑިވްސް ގެ އެމްބެސެޑަރު ކަމަށް ދައްކައިގެން ވެސް ނުވާނެ ކަމުގައި އެވެ. 

ފައިސާގެ ކަންކަން އޮޅުވާލާ ކަމުގެ ތުހުމަތުކޮށް އެ ބޭންޑުގެ ގިޓަރިސްޓު އަހްމަދު ޝަހީދު (ޝަހީދު ލެގަސީ) ބޭންޑާ ދުރަށް ދިޔައި މިދިޔަ މަހު އެވެ. ލީޑު ވޯކަލިސްޓް މުހައްމަދު ނަސޫހު ބިން ނަސްރުއްދީން އާއި އަހުމަދު ޖަޝީމް އާއި މުހައްމަދު ހިޝާމް ވަނީ މިދިޔަ އަހަރުގެ މެދު ތެރޭގައި ބޭންޑުން ވަކިވެފަ އެވެ. މިހާރު "2 އޮފް އަސް" ބޭންޑުގައި ތިބީ އަދުހަމްގެ އިތުރުން އަބްދުﷲ ޝަމްރޫހް އެވެ.

ޖަޝީމް، ހިސާމް އަދި ނަސޫހު ވެސް ބޭންޑުން ވަކިވެ ނެރުނު ބަޔާނުގައި ވަނީ ފައިސާގެ މުއާމަލާތްތަކުގެ ވާނުވާ ނޭނގުމާއި ބޭންޑުގެ މެމްބަރުންނަށް ބަރާބަރަށް ފައިސާ ނުދޭ ކަމުގެ ތުހުމަތެވެ.