އދ. ދިގުރަށުގައި ފަތުރުވެރިންނަށް ޚާއްސަ ގޮނޑުދޮށަށް ނަޖިސް ބޭރުވާ މަންޒަރު ފެންނަ ވީޑިއޯ އަކަށް މިލިއަނުން ވިއުސް، އިދާރާތައް ހަނު!
އދ. ދިގުރަށުގެ ފަތުރުވެރިންނަށް ހާއްސަ ސަރަހައްދުން ނަޖިސް ބޭރުވާ ވީޑިއޯއެއް ސޯޝަލް މީޑިއާގައި ވައިރަލްވެ މިލިއަނުން ވިއުސް ލިބުމުން ރާއްޖޭގެ ފަތުރުވެރިކަމަށް ލިބުނީ ހުތުރު ނަމެއް. އެކަމަކު ސަރުކާރު ގެ އިދާރާތަކުން އެކަމަށް އެއްޗެއް ނުބުނެ ތިބުން ލަދުވެތި.
އދ. ދިގުރަށުގައި ފަތުރުވެރިންނަށް ހާއްސަކޮށްފައިވާ ގޮނޑުދޮށަށް ނަޖިސް ބޭރުވާ ވީޑިއޯ އެއް | ސޯޝަލް މީޑިއާ
އދ. ދިގުރަށުގައި ފަތުރުވެރިންނަށް ހާއްސަކޮށްފައިވާ ގޮނޑުދޮށުގައި ނަޖިސް ބޭރުވާ ވީޑިއޯއެއް ސޯޝަލްމީޑިއާގައި އާއްމުވެ އެތައް މިލިއަން ވިއުސް އެއް އެ ވީޑިއޯ އަަށް ވަނީ ލިބިފަ އެވެ. އަދި މުޅި ދުނިޔޭގެ ސަމާލުކަން އެ ވީޑިއޯއަށް ލިބިފައިވާ އިރު އެ ވީޑިއޯ އިން ފެންނަނީ ދިވެހިންގެ ފަތުރުވެރިކަމުގެ ރީތި ނަން ކިލަނބުކޮށްލާ ފަދަ ކަންތައްތަކެކެވެ.
ކެނެރީ އައިލެންޑްސް އަށް ނިސްބަތްވާ އިންފްލުއެންސަރ، ޑޭވިޑް ސެގޫރާ އޭނާ ގެ އިންސްޓަގްރާމް އެކައުންޓުން ކުރި ޕޯސްޓަށް 6 މިލިއަނަށްވުރެ ވިއުސް ވަނީ ލިބިފަ އެވެ. އެ ވީޑިއޯގައި އޭނާ ބުނެފައި ވަނީ މި ހުރެވުނީ ދުނިޔެމަތީ ސުވަރުގޭގައި ކަމަށް ހީވެދާނެ ކަމަށެވެ. ނަމަވެސް އެ ތަނަށް ނަޖިސް ބޭރުވަމުންދާ ކަން ފާހަގަކޮށް އޭނާ ވަނީ އެކަމަށް ވަރަށް ބޮޑަށް ފާޑު ކިޔާފަ އެވެ. އެ ވީޑިއޯ ނަގާފައިވާ ސަރަހައްދަކީ ދިގުރަށުގެ ފަތުރުވެރިންނަށް ހާއްސަ ކޮށްފައިވާ ސަރަހައްދެވެ.
މި މައްސަލަ ދިމާވުމާއި އެކު ރަށު ކައުންސިލުން ވަނީ މައްސަލަ ހައްލުކޮށްފަ އެވެެ. ވީޑިއޯއިން އެ ފެންނަ ގޮތަށް ނަޖިސް ބޭރުވާން ދިމާވީ ދިގު ރަށުގެ މޫދުން ބޭރުކޮށްފައި އޮންނަ ނަރުދަމާ ހޮޅި ފަޅައިގެން ދިއުމާއި ގުޅިގެންނެވެ.
މިއީ އާއްމުން އަޅާފައިވާ ނަރުދަމާ އެއް މީގެ ކުރިން ބޭނުން ކުރަމުން އައި ރަށެކެވެ. އެހެން ނަމަވެސް، މިދިޔަ ސަރުކާރުގެ ދުވަސްވަރު އެ ރަށުގައި ފެށި ނަރުދަމާގެ މަޝްރޫއު ނިމި ބޭނުން ކުރަން ފެށި އިރު ބައެއް ގޭގެ އަށް ނަރުދަމާ ގުޅިފަ އެއް ނެތެވެ. ކުރީގެ ނިޒާމްގައި ބޭނުން ކުރާ ހޮޅި ތަޅައިގެން ދިއުމާއި އެކު މީގެ ކުރިން ވެސް މިފަދަ ކަންކަން ދިމާވެ އެވެ.
މައްސަލަ ހައްލުކޮށް އެކަމަށް ކައުންސިލުން އެޓެންޑުވި ނަމަވެސް ކަމާއި ގުޅުން ހުރި ސަރުކާރުގެ އިދާރާތައް ތިބީ ހަނެވެ. ފަތުރުވެރިކަމުގެ ނަން ކިލަނބުވާ ގޮތަށް އެތައް ހާސް ބަޔަކު މި ވީޑިއޯ އަދިވެސް ހިއްސާކުރަމުންދާ އިރު އެކަމާއި މެދު ސަމާލުކަމެއް ބަހައްޓާނެ ވެރިއަކު މި ޤައުމަކު ނެތެވެ. ފަތުރުވެރިކަމާއި ބެހޭ ވަޒީރު ތޯރިގް އިބްރާހިމް އަށް ކަމެއް ވާހެން ވެސް ހި އެއް ނުވެ އެވެ.
ވިޒިޓް މޯލްޑިވްސް އާއި ފަތުރުވެރިކަމާއި ގުޅުން ހުރި އިދާރާތައް ޓެގްކޮށް ސޯޝަލް މީޑިއާގައި އާއްމުންގެ ފާޑުކިޔުންތައް އޮއްސާލި ނަމަވެސް އެ ކަންބޮޑުވުންތަކަށް ވެސް ސަރުކާރުގެ އިޖާބަ ދިނުމެއްް ނެތެވެ. ސަރުކާރުގެ ފަރާތުން ފެންނަނީ ވަރަށް ވަރިހަމަ އުސޫލެކެވެ. ފާޑުކީ ބައެއް ފަރާތްތަކުން ވަނީ ދާދި ފަހުން އިކޮނޮމިކް މިނިސްޓަރ ސައީދު ރާއްޖެ އަކީ ދުނިޔޭގެ އެހެން ޤައުމުތަކުގައި ތިބެފައި ޑިޕްރެސް ވުމުން ފަރުވާ އަކަށް ފުދޭ ތަނަކަށް ވިދާޅުވެފައިވާ އިރު މިހާރު މި ފެންނަ މަންޒަރާއި މެދު ސަރުކާރުން ޖަވާބުދާރީވާން ޖެހޭ ކަމަށް ބުނެފަ އެވެ.
ފާޑުކީ އިތުރު ފަރާތްތަކުން ބުނީ މިފަދަ ކަމެއް ހިނގުމުން ރާއްޖޭގެ ފަތުރުވެރިކަމުގެ ހިމާޔަތުގައި އިދާރާތަކުން ބަސް ނުބުނުމަކީ އިގްތިޞާދު އޮޔާދާން ދޫކޮށްލާފައިވާ މިންވަރު ދައްކުވައިދޭ ކަމެއް ކަމަށް ބުނެފަ އެވެ. މިނިސްޓްރީ އަކުން ވެސް ސަރުކާރުގެ އިދާރާއަކުން ވެސް އެ މައްސަލަ ހައްލު ކުރި ކަމާއި، މިއީ ރާއްޖޭގެ ހަގީގީ ތަސައްވުރު ނޫންކަން ދައްކުވައިދޭން އެކަށީގެންވާ މަސައްކަތެއް ކޮށްފައި ނުވާކަން އެ ފަރާތްތަކުން ފާހަގަކުރެ އެވެ.
