މި އަހަރުގެ ގޯލްޑަން ގްލޯބްސް ގައި ރާއްޖެ!
މި އަހަރުގެ ގޯލްޑަން ގްލޯބްސް އެވޯޑްސްގެ ހަދިޔާ ދަބަހުގައި ރާއްޖޭގެ އެންމެ މަޝްހޫރު ތިން ރިސޯޓެއްގައި ޗުއްޓީ ހޭދަކުރުމުގެ ފުރުސަތު ހިމަނައިފި. ގާތްގަނޑަކަށް އެއް މިލިއަން ޑޮލަރު (ގާތްގަނޑަކަށް 15.4 މިލިއަން ރުފިޔާ) ގެ އަގުހުރި މި ގިފްޓް ބޭގް ދީފައި ވަނީ އެވޯޑް ހާސިލްކުރި ފަރާތްތަކަށް. "ދަ އަލްޓިމޭޓް ގިފްޓް ބޭގް" ގެ ނަމުން ނަންދީފައިވާ މި ހަދިޔާ ދަބަހުގައި ދުނިޔޭގެ އެކި ކަންކޮޅުތަކުގެ އެންމެ އަގުބޮޑު މަންޒިލްތަކަށް ދަތުރުކުރުމުގެ ފުރުސަތު ހިމެނޭ. އޭގެ ތެރެއިން އެންމެ ފާހަގަކޮށްލެވޭ އެއް މަންޒިލަކީ ދިވެހިރާއްޖެ.
2026 ވަނަ އަހަރުގެ ގޯލްޑަން ގްލޯބްސް ގިފްޓް ބޭގް - އެޓްލާސް ބެސްޕޯކްގެ ސިގްނެޗާ ޑަފަލް ބޭގް. | ނިއު ޔޯކް ޓައިމްސް
މި އަހަރުގެ ގޯލްޑަން ގްލޯބްސް އެވޯޑްސްގެ ހަދިޔާ ދަބަހުގައި ރާއްޖޭގެ އެންމެ މަޝްހޫރު ތިން ރިސޯޓެއްގައި ޗުއްޓީ ހޭދަކުރުމުގެ ފުރުސަތު ހިމަނައިފިއެވެ. ގާތްގަނޑަކަށް އެއް މިލިއަން ޑޮލަރު (ގާތްގަނޑަކަށް 15.4 މިލިއަން ރުފިޔާ) ގެ އަގުހުރި މި ގިފްޓް ބޭގް ދީފައިވަނީ އެވޯޑް ހާސިލްކުރި ފަރާތްތަކަށާއި އެވޯޑް ހަވާލުކޮށްދިނުމަށް ސްޓޭޖަށް އެރި މަޝްހޫރު ފަންނާނުންނަށެވެ.
"ދަ އަލްޓިމޭޓް ގިފްޓް ބޭގް" ގެ ނަމުން ނަންދީފައިވާ މި ހަދިޔާ ދަބަހުގައި ދުނިޔޭގެ އެކި ކަންކޮޅުތަކުގެ އެންމެ އަގުބޮޑު މަންޒިލްތަކަށް ދަތުރުކުރުމުގެ ފުރުސަތު ހިމެނެއެވެ. އޭގެ ތެރެއިން އެންމެ ފާހަގަކޮށްލެވޭ އެއް މަންޒިލަކީ ދިވެހިރާއްޖެ އެވެ.
މި ފަހަރުގެ ގިފްޓް ބޭގްގައި ރާއްޖޭގެ ތިން ރިސޯޓަކުން އަގުބޮޑު ޕެކޭޖްތަކެއް ވަނީ ހިމަނާފައެވެ. އެއީ:
- ހިލްޓަން މޯލްޑިވްސް އަމިންގިރި ރިސޯޓް އެންޑް ސްޕާ: މި ރިސޯޓުގެ "ދަ ރެޒިޑެންސް" (ހަ ކޮޓަރީގެ ވިލާއެއް) ގައި ތިން ރޭ ހޭދަކޮށްލުމުގެ ފުރުސަތު. މިއީ ގާތްގަނޑަކަށް 80،000 ޑޮލަރު (1.2 މިލިއަން ރުފިޔާ) ގެ އަގުހުރި ދަތުރެކެވެ. މި ޕެކޭޖް އެވޯޑު ލިބުނު ފަސް މީހަކަށް ލިބިފައިވެއެވެ.
- ކޮންރަޑް މޯލްޑިވްސް ރަންގަލި އައިލެންޑް: ދުނިޔޭގެ ފުރަތަމަ ކަނޑުއަޑީގެ ރެސިޑެންސް ކަމަށްވާ "ދަ މުރަކަ" ގައި ދެ ރޭ އަދި ރަންގަލި އޯޝަން ޕެވިލިއަންގައި ދެ ރޭ ހޭދަކޮށްލުމުގެ ފުރުސަތު. މި ޕެކޭޖުގެ އަގަކީ 70،000 ޑޮލަރު (1 މިލިއަން ރުފިޔާ) އެވެ. މި ޕެކޭޖް އެވޯޑު ލިބުނު ފަސް މީހަކަށް ލިބިފައިވެއެވެ.
- ވޮލްޑޯފް އެސްޓޯރިއާ މޯލްޑިވްސް އިތާފުށި: މި ރިސޯޓުގެ ގްރޭންޑް އޯވަރވޯޓަރ ވިލާއެއްގައި ތިން ރޭ ހޭދަކޮށްލުމުގެ ފުރުސަތު. މިއީ 26،000 ޑޮލަރު (400،000 ރުފިޔާ) ގެ އަގުހުރި ދަތުރެކެވެ. މި ޕެކޭޖް އެވޯޑު ލިބުނު ހަ މީހަކަށް ލިބިފައިވެއެވެ.
މި އަގުބޮޑު ހަދިޔާތައް ލިބޭ ފަރާތްތަކުގެ ތެރޭގައި ހޮލީވުޑްގެ އެންމެ މަޝްހޫރު ތަރިން ހިމެނެއެވެ. މިއީ ރާއްޖޭގެ ފަތުރުވެރިކަން ދުނިޔޭގެ އެންމެ މަތީ ފަންތީގެ ފަންނާނުންގެ މެދުގައި އިޝްތިހާރުވެ، މަގުބޫލުކަން އިތުރުވެގެންދާނެ ކަމެއްގެ ގޮތުގައި ބެލެވެ އެވެ.
ގޯލްޑަން ގްލޯބްސްގެ ގިފްޓް ބޭގްގައި ރާއްޖޭގެ ދަތުރުތަކުގެ އިތުރުން ނިއުޒީލެންޑާއި، ތައިލެންޑް އަދި އިންޑޮނޭޝިއާ ފަދަ ގައުމުތަކުގެ ދަތުރުތަކާއި، އަގުބޮޑު ޖަވާހިރު ވެސް ހިމެނެއެވެ.
ރާއްޖޭގެ ރިސޯޓްތަކުން ހުށަހަޅާފައިވާ ޕެކޭޖްތަކަކީ މި ދަބަހުގައި ހިމެނޭ އެންމެ އަގުބޮޑު އަދި އެންމެ ޝަރަފުވެރި ހަދިޔާތަކުގެ ގޮތުގައި ހިމެނޭއިރު މިކަމުގައި ވިޒިޓް މޯލްޑިވްސް ގެ (ކުރީގެ އެމްއެމްޕީއާރސީ) އެއްވެސް ބައިވެރިވުމެއް ނެތްކަން ފާހަގަކުރެވެ އެވެ.
