އަރަބިއްޔާ ސްކޫލު ދަރިވަރުންނަށް ދެރަ ގޮތެއް ނުވާނެ ކަމަށާއި، އެ ސްކޫލް އުވާނުލާނެކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.

އަރަބިއްޔާ ސްކޫލްގެ ދަރިވަރުން އިއްޒުއްދީން ސްކޫލަށް ބަދަލުކުރަން ނިންމާފައިވާކަން އެޑިއުކޭޝަން މިނިސްޓްރީން އިއުލާނުކޮށްފައިވަނީ މި މަހުގެ 16 ވަނަ ދުވަހުއެވެ. މި ނިންމުމާއެކު ގިނަ އަދަދެއްގެ ބެލެނިވެރިން ދަނީ ހިތްހަމަނުޖެހުން ފާޅުކުރަމުންނެވެ. އަދި މިހަހުގެ 17 ވީ ހުކުރު ދުވަހުގެ ހަވީރު ބެލެނިވެރިންގެ މެދުގައި ބޭއްވި ބައްދަލުވުމަށްފަހު، ކޮންމެ ދުވަހެއްގެ ހަވީރު އަރަބިއްޔާ ސްކޫލު ދޮށަށް އެއްވެ ދަނީ މުޒާހަރާ ކުރަމުންނެވެ.

މައްސަލަ ގޯސްވެފައިވަނިކޮށް، އާދިއްތަ ދުވަހު މިނިސްޓަރު ވަނީ އަރަބިއްޔާ ސްކޫލަށް ވަޑައިގެން އަރަބިއްޔާގެ ޕޭރެންޓް ޓީޗަރސް އެސޯސިއޭޝަން (ޕީޓީއޭ)އާއެކު ބައްދަލުވުމެއް ބާއްވަވާފައެވެ.

މިބައްދަލުވުމަށްފަހު ނޫސްވެރިންނާ ވާހަކަދައްކަވަމުން މިނިސްޓަރު ވިދާޅުވީ، އިއްޒުއްދީން ސްކޫލަށް ބަދަލު ކުރުމާ ގުޅޭގޮތުން މަޝްވަރާކޮށްފައިވާ ކަމަށެވެ. ނަމަވެސް އިއްޒުއްދީން ސްކޫލަށް ބަދަލުކުރުމަށް ނިންމާފައިވާ ނިންމުން ބަދަލުނުކުރާ ކަމަށާއި، އަރަބިއްޔާ ސްކޫލުގެ ދަރިވަރުންނަށް ދެރަ ގޮތެއް ނުވާނެ ކަމަށް މިނިސްޓަރު ވިދާޅުވިއެވެ. އަދި މާލެއިން އަރަބިއްޔާއަށް ބިމެއް ހަމަޖެއްސުމުގެ މަސައްކަތް ކުރަމުންދާ ކަމަށާއި، މި ހަފުތާގެ ތެރޭގައި އެކަމަށް ހައްލެއް ލިބިގެންދާނެ ކަމަށެވެ.

ބެލެނިވެރިން "ސޭވް އަރަބިއްޔާ"ގެ ނަމުގައި ކެމްޕެއިންއެއް ކުރިއަށް ގެންދާތީ އެކަމަށް އިޝާރާތް ކުރައްވައި މިނިސްޓަރު ވިދާޅުވީ އަރަބިއްޔާ ސްކޫލު އުވާލުމަށް މަސައްކަތް ނުކުރައްވާކަމަށެވެ.

އިއްޒުއްދީން ސްކޫލަށް އަރަބިއްޔާ ދަރިވަރުން ނުފޮނުވާނެ ކަމަށް ބެލެނިވެރިން ބުނާބުނުމަށް ރައްދު ދެއްވައި މިނިސްޓަރު ވިދާޅުވީ، ދަރިވަރުން ސްކޫލަށް ނުފޮނުވުމަކީ ބެލެނިވެރިންނަށް އޮތް ޗޮއިސްއެއް ނޫން ކަމަށެވެ. އަދި އިއްޒުއްދީން ސްކޫލުގައި އަރަބިއްޔާގެ ދަރިވަރުން ކިޔަވަމުންދާނީ ވަކިން ކަމަށާއި، އެއްކޮށް ނުލާނެ ކަމަށެވެ. އެއް އިމާރާތެއް ވަކިން ކިޔެވޭނެ އިންތިޒާމު ހަމަޖެއްސުމަކީ މައްސަލައެއް ކަމަށް ދެކެވަޑައިނުގަންނަވާކަމަށް މިނިސްޓަރު ވިދާޅުވިއެވެ.

މިމައްސަލައާ ގުޅިގެން އަރަބިއްޔާ ސްކޫލުގެ ބެލެނިވެރިން ބުނެފައިވަނީ، އިއްޒުއްދީން ސްކޫލަށް ކުދިން ނުފޮނުވާނެ ކަމަށާއި، އަރަބިއްޔާގެ ދަރިވަރުންނަށް އިހުމާލުވެ މަގުމަތިކޮށްފައިވާ ކަމަށެވެ. އިނގިރޭސި މީޑިއަމަށް ކިޔަވައިދޭ ސްކޫލެއްގެ ތެރޭގައި އަރަބި މީޑިއަމްގެ ދަރިވަރުން ކިޔެވައިދެވޭނެ ކަމަށް ގަބޫލުނުކުރެވޭ ކަމަށާއި، އެކަމުގެ ސަބަބުން ދަރިވަރުންނަށް އުނދަގޫތަކާ ކުރިމަތިލާން ޖެހޭނެ ކަމަށެވެ. ނަމަވެސް އިއްޒުއްދީންގެ ދަރިވަރުން އެހެން ސްކޫލަކަށް ބަދަލު ކުރުމަށްފަހު އިމާރާތް އެއްކޮށް އަރަބިއްޔާއަށް ޚާއްސަކޮށްފިނަމަ ދަރިވަރުން ފޮނުވާނެކަމަށް ބެލެނިވެރިން ބުނެއެވެ.

ޖެނުއަރީ މަހުގެ 16ގައި ފަށާ ދިރާސީ އަހަރުގެ ދެ ވަނަ ޓަރމް ފެށޭއިރު، ދާއިމީ ހައްލެއް ލިބެންދެން "ސޭވް އަރަބިއްޔާ"ގެ ކެމްޕެއިން ކުރިއަށްދާނެކަމަށް ބެލެނިވެރިން ބުނެއެވެ.