ޖެންޑަރ މިނިސްޓަރުގެ ފިރިކަލުން އިބްރާހިމް ޒާހިރު އަވަހާރަވެއްޖެ
އަވަހާރަވީ ހޯމަދުވަހުގެ ވަގުތެއްގައި
އިބްރާހިމް ޒާހިރު
ޖެންޑަރ މިނިސްޓަރ އައިޝަތު މުހައްމަދު ދީދީގެ ފިރިކަލުން އިބްރާހިމް ޒާހިރު އަވަހާރައްޖެއެވެ.
އިބްރާހިމް ޒާހިރު އަވަހާރަވީ ހޯމަދުވަހުގެ ވަގުތެއްގައެވެ. އަވަހާރަވީ ފުއްޕާމޭގެ ބައްޔަށް ފަރުވާ ހޯއްދަވަމުން ގެންދަވަނިކޮށް އިންޑިއާގައެވެ. އަނބިކަނބަލުންވެސް މިވަގުތު ހުންނެވީ އިންޑިއާގައެވެ. އަވަހާރަވިއިރު 4 ފިރިހެން ބޭފުޅުންނާއި ދެ އަންހެން ބޭފުޅުން ދުނިޔޭގައި އެބަތިއްބެވިއެވެ.
އިބްރާހިމް ޒާހިރު ބޮޑަށް މަޝްހޫރުވެފައިވަނީ ޔަންމާ ޒާހިރުގެ ނަމުންނެވެ. ޒާހިރަކީ ޓްރާންސްޕޯޓްގެ ސްޓޭޓް މިނިސްޓަރ އަހުމަދު ޒުހައިރުގެ ބޭބެއެވެ.
ޔަންމާ ޒާހިރުގެ ނަމުން މަޝްހޫރުވީ 1970ގެ އަހަރުތަކުގައި މަސްދޯނިފަހަރުގައި އިންޖީނުއެޅުން ތައާރަފުވުމާއި ޔަންމާ ސެންޓަރުތައް ރާއްޖޭގައި ގާއިމުވުމުގެ ތެރެއިން، ކަމާބެހޭގޮތުން ދިވެހީން ތަމްރީނު ކުރެއްވުމަށް އެއިރުގެ ސަރުކާރުން، ޖަޕާނުގެ ސަރުކާރާއި ގުޅިގެން ހިންގެވި ޕްރޮގްރާމްގެ ތެރެއިން، ޔަންމާ އިންޖީނާބެހޭ ތަމްރީނު ހެދުމަށް ޖަޕާނަށް، ސަރުކާރުން ފުރަތަމަ ފޮނުއްވި ޒުވާން ތައުލީމީ ހުނަރުވެރިންގެ ތެރެއިން، ތަމުރީނު ހޯއްދަވައިގެން، ޔަންމާ އިންޖީނުގެ މެކޭނިކެއް ނުވަތަ އިންޖިނޭރެއްގެ ގޮތުގައި މުޅިރާއްޖެއަށް މަޝްހޫރުވުމުގެ ތެރެއިންނެވެ.
އިންޖީނިއަރިން ދާއިރާއިން ގިނަ ޚިދުމަތްތަކެއް ކުރެއްވިއެވެ. ހުނަރުވެރި މަސައްކަތްތެރިއެކެެވެ. ހިންގުންތެރި ވެރިއެކެވެ. ރާއްޖޭގެ އެންމެބޮޑު ވިޔަފާރި ކުންފުނިތަކުގެ ތެރޭގައި ހިމެނޭ ވިލާ ކުންފުނީގެ ޑައިރެކްޓަރުކަން ކުރެއްވިއެވެ. މަޑުމައިތިރި މިޒާޖުގެ ހިތްހެޔޮ ހެޔޮލަފާ ބޭފުޅެކެވެ.
