މައިޒާން އިބްރާހިމް މަނިކު އަވަހާރަވެއްޖެ

ސަރުކާރަށް ގިނަ ދުވަހު ހިދުމަތް ކުރެއްވި މައިޒާން އިބްރާހިމް މަނިކު ސްރީ ލަންކާގައި އަވަހާރަވެއްޖެ އެވެ.

އުމުރުފުޅުން 84 އަހަރުގައި އިބްރާހިމް މަނިކު އަވަހާރަވީ ލަންކާ ހޮސްޕިޓަލުގައި އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް އާދީއްތަ ދުވަހުގެ ރޭގަ އެވެ. އިބްރާހިމް މަނިކު ފަރުވާ ހޯއްދަވަމުން ގެންދެވީ ލޭގެ އާލާސްކަފުޅަކަށް ރާއްޖެއެމްވީއަށް ވަނީ އެނގިފަ އެވެ.

ކަސްޓަމްސްގެ ވަޒީފާއިން ސަރުކާރަށް ހިދުމަތް ކުރައްވަން ފެއްޓެވި އިބްރާހިމް މަނިކު، ގިނަ ދުވަސްތަކެއް ވަންދެން ޑިޕާޓްމެންޓް އޮފް ޕަބްލިކް ވޯކްސްގައި ވެސް ވަޒީފާ އަދާކުރެއްވެވި އެވެ.

އޭރު ޕަބްލިކް ވޯކްސް ހިންގުމާ ހަވާލުވެ ހުންނެވި އަބްދުﷲ ކަމާލުއްދީން ވިދާޅުވި ގޮތުގައި މާލޭގެ ބިން ހިއްކުމާއި ރަށްރަށުގައި ފަޅުފުންކުރުމުގެ މަސައްކަތް ކުރުމުގައި އިބްރާހިމް މަނިކު ވަރަށް އިސް ދައުރެއް އަދާކުރެއްވި އެވެ.

"އިބްރާހިމް މަނިކަކީ ވަރަށް ގިނަ ވަގުތު ވަޒީފާގައި އުޅުއްވާ ބޭފުޅެއް. ވަރަށް މުރާލި ވަރަށް މީހުންނާ ގުޅޭ ބޭފުޅެއް. ރާއްޖޭގެ ތަރައްގީގެ ގިނަ މަސައްކަތްތަކެއްގައި އޭނާގެ ބައިވެރިވުން ވަރަށް ބޮޑު. ހާއްސަކޮށް، މާލެ ހިއްކުމުގެ މަސައްކަތާއި ރަށްރަށުގައި ބަނދަރު ހަދަން ފެށުމުގައި،" ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި މިނިސްޓަރުކަން ކުރެއްވި އަބްދުﷲ ކަމާލުއްދީން ވިދާޅުވި އެވެ.

އިބްރާހިމް މަނިކަކީ މަޝްހޫރު ސީޕްރިއާ ކުންފުނީގެ ހިއްސާދާރެކެވެ.

އިބްރހިމް އަވަހާރަވިއިރު، ހަތަރު އަންހެން ބޭފުޅަކާއި ދެ ފިރިހެން ބޭފުޅަކު ދުނިޔޭގައި އެބަތިއްބެވި އެވެ.

އިބްރާހިމް މަނިކު ފަސްތާނުލައްވާނީ އަންގާރަ ދުވަހުގެ އަސުރު ނަމާދަށް ފަހު އެވެ.

ކުރީގެ ރައީސް މުހައްމަދު ނަޝީދު ކުރެއްވި ޓްވީޓެއްގައި ވިދާޅުވެފައިވަނީ އިބްރާހިމް މަނިކަކީ މަސައްކަތްތެރި ކަމާއި ކުޅިވަރު ކުރިއެރުވުމުގައި ލާމަސީލު ހިދުމަތްތެރިއެއް ކަމަށެވެ.