ކުޅުދުއްފުށީގައި 50 ޓަނުގެ އައިސް ޕްލާންޓެއް ގާއިމުކުރަނީ
10 ޑިސެމްބަރު 2021 | ހުކުރު 18:07ކުޅުދުއްފުށި ސިޓީގައި ގާއިމު ކުރުމަށް ހަމަޖެހިފައިވަނީ 50 ޓަނުގެ އައިސް ޕްލާންޓެއް
މަސްވެރިންގެ ދުވަހުގެ މުނާސަބަތުގައި ބޭއްވި ޑިނަރ ނައިޓްގައި މޭޔަރ އާތިފް ވާހަކަ ދައްކަވަނީ
އަންނަ އަހަރު ކުޅުދުއްފުށި ސިޓީގައި 50 ޓަނުގެ އައިސް ޕްލާންޓެއް ގާއިމު ކުރާނެކަމަށް މޭޔަރު މުހައްމަދު އާތިފް ވިދާޅުވެއްޖެ އެވެ.
މަސްވެރިންގެ ދުވަސް ފާހަގަކުރުމުގެ ގޮތުން ހުކުރު ދުވަހު ރޭ މަސްވެރިންނަށް ބޭއްވި ޑިނަރ ނައިޓްގައި ވާހަކަދައްކަވަމުން މޭޔަރު އާތިފް ވިދާޅުވީ، އައިސް ޕްލާންޓަކީ ފެނަކަ އާއި ސިޓީ ކައުންސިލާ ގުޅިގެން ގާއިމުކުރަން ހަމަޖެހިފައިވާ އައިސް ޕްލާންޓެއް ކަމަށެވެ. އެގޮތުން ކުޅުދުއްފުށި ސިޓީގައި 50 ޓަނުގެ އައިސް ޕްލާންޓް ގާއިމް ކުރަނީ 100 ޓަނުގެ ސްޓޯރޭޖަކާއެކު ކަމަށް އާތިފް ވިދާޅުވިއެވެ.
އައިސް ޕްލާންޓްގެ އަމަލީ މަސައްކަތް އަންނަ އަހަރުގެ ފުރަތަމަ ކުއާޓާގައި ފެށޭނެކަމުގެ ޔަގީންކަން ފެނަކަ ކޯޕަރޭޝަންގެ އެމްޑީ ދެއްވާފައިވާކަމަށް މޭޔަރު ވިދާޅުވި އެވެ. އަދި މި އައިސް ޕްލާންޓް ވެގެންދާނީ އުތުރުގައި ގާއިމުކުރެވޭ އެންމެ ރަނގަޅު އައިސް ޕްލާންޓަށް ކަމަށްވެސް މޭޔަރު ވިދާޅުވި އެވެ.
އޭނާ ވިދާޅުވީ އައިސް ޕްލާންޓް ގާއިމުކުރުމަށް ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބުދުއްލަތީފްގެ ވަރަށް ބޮޑު އެހީތެރިކަމެއް ލިބިގެންދިޔަ ކަމަށާއި އެހެންކަމުން މެމްބަރު ޔާސިރައަށާއި ފެނަކަ ކޯޕަރޭޝަންގެ އެމްޑީއަށް މޭޔަރު ޝުކުރުއަދާކުރެއްވި އެވެ.
