ޝަހްސު އޮޅުވާލީ ޕީއޭއިން އައިސް ތިބި މީހުން، ފާރިސްއެއް ނޫން: މައުމޫން
"ޕީޕީއެމް ވަނީ ޕީއޭ ކިޔާ ބަޔަކު އައިސް ހައިޖެކް ކޮށްފައި"
ރައީސް މައުމޫން އަބްދުލް ގައްޔޫމް
ދިއްގަރު ދާއިރާގެ މެމްބަރު އަހްމަދު ފާރިސް މައުމޫންގެ މައްޗަށް ދައުވާކޮށް ޝަރީއަތް ހިންގަމުންދާއިރު، ޝަހްސު އޮވާލީ ފާރިސްއެއް ނޫން ކަމަށާއި ޕީޕީއެމްގައި ތިއްބެވި ޕީޕަލްސް އެލަޔަންސް (ޕީއޭ)ގެ މީހުން ކަމަށް، ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.
ގުޅިފައިވާ ޕާޓީތަކުން މ. ކުނޫޒުގައި ބޭއްވި ޖަލްސާގައި ރައީސް މައުމޫން ވިދާޅުވީ "ޕީއޭ ވަނީ ޕީޕީއެމް ހައިޖެކްކޮށްފައި" ކަމަށެވެ.
ރައީސް އަބްދުﷲ ޔާމީން އުފެއްދެވި ޕީޕަލްސް އެލަޔަންސް (ޕީއޭ)ގެ މެމްބަރުން ޕީޕީއެމްގެ މެމްބަރުން ކަމަށް ހެދިގެން ޕާޓީގެ ތެރެއަށް ވަދެ، މަޖިލީހުން ގޮނޑިވެސް ހޯދާފައިވާ ކަމަށް ރައީސް މައުމޫން ވިދާޅުވި އެވެ. ނަމަވެސް އެ ބޭފުޅުން އަމަލުކުރައްވަމުން ގެންދަވަނީ ޕީޕީއެމްގެ އުސޫލްތަކާ ހިލާފަށް ކަމަށެވެ.
" އަޅުގަނޑަށް ހީވަނީ، ޝަހްސު އޮޅުވާލުމުގެ ތުހުމަތު، އޮޅުވާލެއްވީ އެބޭފުޅުންހެން. ޝަހްސު އޮޅުވާލައިގެން،ހަގީގަތް ފޮރުވައިގެން، އެހެން ސިފައެއް ޖެހިގެން، އެހެން ގަމީހެއް ލައްވައިގެން، އެހެން ހެދުމެއް ތުރުކުރައްވައިގެން ވަޑައިގެން ރައްޔިތުންގެ ކުރިމަތީގައި ޕީޕީއެމްއޭ ކިޔައިގެން އެންމެންގެ ސަޕޯޓް ހޯއްދަވާ، ގޮނޑި ކާމިޔާބު ކުރުމަށްފަހު މިހާރު ވަނީ އަސްލަށް ރުޖޫއަވެފަ." ރައީސް މައުމޫން ވިދާޅުވި އެވެ.
އެހެންވެ، ޝަހްސު އޮޅުވާލުމުގެ ދައުވާ ކުރަންވީ ޕީޕީއެމްގައި ތިބި ޕީއޭ މީހުންނަށް ކަމަށް ވެސް ރައީސް މައުމޫން ވިދާޅުވި އެވެ.
"ޝަހްސު އޮޅުވާލި ބަޔަކީ އެއީ، ފާރިސް މައުމޫނެއް ނޫން،" އެ މަނިކުފާނު ވިދާޅުވި އެވެ.
ކުނޫޒުގައި ބޭއްވި ޖަލްސާގައި އެ މަނިކުފާނަށް ޕީޕީއެމްގެ ރައީސޭ މުހާތަބު ކުރެއްވި ބޭފުޅާއަށް ވެސް ޝަހްސު އޮޅުވާލުމުގެ ދައުވާ ކުރުން އެކަށީގެންވާ ކަމަށް ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ، އެމަނިކުފާނަކީ ބޮޑު އަޣުލަބިއްޔަތާއެކު ޕީޕީއެމްގެ ރައީސް ކަމުގެ މަޤާމަށް ވަޑައިގެންނެވި ބޭފުޅެއް ކަމަށެވެ. ޕީޕީއެމްގެ ރައީސް ކަމުން ވަކިވާނެފަދަ އެއްވެސް އަމަލެއް ހިންގާފަނުވާނެ ކަމަށާއި އެފަދަ ފިޔަވަޅެއްވެސް އެޅިފައިނުވާ ކަމަށް އެމަނިކުފާނު ވިދާޅުވި އެވެ. އެހެން ނަމަވެސް އެމަނިކުފާނަށް "ޕީޕީއެމްގެ ރައީސް" އޭ ގޮވައިފި ނަމަ، ޝަހްސު އޮޅުވާލިކަމަށް ނިންމާފާނެ ކަމަށެވެ.
މިއަދު އެކަން ކުރިމަތިވެގެން އުޅެނީ ފާރިސް ކަަމަށް ބުނެ ޕީޕީއެމް އުފެއްދުމުގައި ފާރިސް އެންމެ އިސް ސަފުގައި ކުރެއްވި މަސައްކަތްތައް ރައީސް މައުމޫން ފާހަގަކުރެއްވި އެވެ.
" ދިއްގަރު ދާއިރާގެ މެންބަރު ފާރިސް މައުމޫނަކީ، ޕީޕީއެމް އުފެއްދުމުގައި އެންމެ އިސްކޮށް މަސައްކަތް ކުރެއްވި އެކަކު. އިލެކްޝަންސް ކޮމިޝަނަށް ފުރަތަމަ 50 މެންބަރުންގެ ސޮޔާއި އެކު ދިޔައީވެސް ފާރިސް މައުމޫން. އެންމެ ފުރަތަމަ ޕީޕީއެމްގެ މުއައްސިސުގެ ގޮތުގައިވެސް ރަޖިސްޓްރީ ކޮށްފައިވަނީ ފާރިސް މައުމޫން." ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ ފާރިސްއާމެދު އަމަލުކުރަމުން ގެންދަނީ ޖިނާއީ އިޖުރާއަތުގެ ގާނޫނާ ހިލާފަށް ކަމަށެވެ.
