ސަރުކާރުގެ ބައެއް މިނިސްޓްރީތަކުގައި ސިޔާސީ މަގާމްތަކަށް ހަމަޖައްސަވާފައިތިބި ބައެއް ކޯޑިނޭޓަރުންނާއި، ޕޮލިސީ އެކްޒެކެޓިވުންނަކީ ހެނދުނު ސޮއި ކޮށްލުމަށްފަހު އޮފީހުގެ މަސައްކަތް ނިންމާލާ ބައެއް ކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.
ނަން ނުޖެހުމަށް ޝަރުތުކޮށް ރާއްޖެއެމްވީއަށް މައުލޫމާތު ދިން ސަރުކާރުގެ މިނިސްޓްރީއެއްގެ އިސްވެރިޔަކު ވިދާޅުވި ގޮތުގައި އެ މިނިސްޓްރީގެ ވަޒީފާގައި މިފަދަ މަގާމުތަކުގައި ތިއްބެވި ބައެއް ފަރާތްތަކަކީ ކޮންމެ ދުވަހަކުވެސް ހެނދު އޮފީހަށް އައިސް ސޮއިކޮށްލުމަށްފަހު އޮފީހުން ގެއްލޭ ބައެއް ކަމަށެވެ. އަދި މިކަން ފަސޭހަ ކުރަމުން އައިސް އޭގެ ތެރޭން ބައެއް މީހުން ސޮއިކޮށްލުމަށް އޮފީހަށް އަންނަނީ ސޯޓުލައިގެންކަން މުވައްޒަފުންނަށް ފާހަގަ ވެގެން ހިތްހަމަ ނުޖެހުމާއެކު އޮފީހުގައި އެވާހަކަ ދައްކަމުންދާ ކަމަށެވެ.
ރާއްޖެއެމްވީއަށް މައުލޫމާތު ދެއްވި ސަރުކާރު އޮފީހެއްގެ އެހެން ވެރިޔަކު ވިދާޅުވީ، އެއް ގޮތަކަށްވެސް އޮފީހުން ނުފެންނަ ފަރާތްތައްވެސް އެ މިނިސްޓްރީގެ ސިޔާސީ މަގާމުތަކުގައި އެބަތިބި ކަމުގައެވެ. އޭގެ ތެރެއިން ބައެއް ފަރާތްތައް ރަސްމީ ގަޑީގައި އަމިއްލަ ވިޔަފާރީގައި އުޅެމުންދާކަން އެނގިފައިވާ ކަމަށްވެސް އޭނާ މައުލޫމާތު ދެއްވިއެވެ.
ސަރުކާރުގެ ކުންފުންޏެއްގައި މަސައްކަތް ކުރާ މުވައްޒަފުންތަކެއް، ވަޒީފާގެ ބިރަށް ނަން ހާމަ ނުކުރުމަށް ޝަރުތުކޮށް، ކިޔައިދިން ގޮތުގައި އެކުންފުނީގައިވެސް ސިޔާސީ ގޮތުން ވަޒީފާއަށް ލައްވާފައި ތިބި އެތައް ބަޔަކީ ސޮއި ކޮށްލުމަށްފަހު ގެއްލޭ ބައެކެވެ.
ސޮއިކޮށްލުމަށްފަހު އޮފީހުންދާ ބައެއް މިފަދަ ފަރާތްތަކުން ދުވާލުގެ ބާކީ ބައި މަސައްކަތް ކުރަނީ ނުފޫޒުގަދަ އަންހެން ބޭފުޅެއްގެ އޮފީހާ ގުޅޭ މަސައްކަތްކުގައި ކަމަށް ރާއްޖެއެމްވީއަށް މައުލޫމާތު ދެއްވި ސަރުކާރުގެ އޮފީހެއްގެ ވެރިޔަކު ވިދާޅުވިއެވެ.
ކުންފުނިތަކާއި ސަރުކާރުގެ އޮފީސްތަކުގައި މީގެ ކުރިން ހަމަ ނުޖައްސާހާ ގިނަ އަދަދަކަށް ސިޔާސީ މަގާމްތަކަށް މުވައްޒަފުން ހަމަޖައްސާ ދައުލަތުގެ ބަޖެޓުން އަންނަނީ މުސާރައާއި އިނާޔަތްތައް ދެމުންނެވެ.
