ބޮޑުކަންނެލީގެ މަސްވެރިކަމުން ނަފާވާނީ ރާއްޖޭގައި ޕްރޮސެސް ކުރުން އިތުރު ކުރެވިގެން - ރައީސް
10 ޑިސެމްބަރު 2021 | ހުކުރު 17:37އޮއިވާލި ކަނދުފަނތި ވުޖޫދުވީ ހިސާބުން ފެށިގެން ރާއްޖޭގައި މިހާތަނަށް އެޅިފައިވަނީ 56 ކަނދުފަތި
ބޮޑު ކަންނެލި މަސްވެރިން ކުރިއަށްގެންދިޔަ މުޒާހަރާގައި ރައީސް ބައިވެރިވެވަޑައިގެންނެވުން
ހަގީގަތުގައި ބޮޑުކަންނެލީގެ މަސްވެރިންނަށްވެސް ނަފާ އިތުރު ކުރެވޭނީ އެކުވި-އަގުގެ އުފެއްދުންތެރިކަން އިތުރުކުރެވިގެން ކަމަށާއި, ރާއްޖޭގައި ޕްރޮސެސް ކުރުން މަތިކުރެވިގެން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މަސްވެރިންގެ ދުވަހުގެ ޚާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ, މަސް ޕްރޮސެސް ކުރުމަށްޓަކައި ކަނޑުއޮތްގިރި އިތުރަށް ތަރައްގީކޮށް، ސްޓޯރޭޖާއި ޕެކޭޖިންގ ކެޕޭސިޓީ އިތުރުކުރުމަށް އަންނަނީ ތައްޔާރުވަމުން ކަމަށާއި, މި މަސައްކަތް ނިމުމުން އަމިއްލަ ފަރާތްތަކަށް މި ފެސިލިޓީގައި ބޮޑު ކަންނެލި އެކްސްޕޯޓްކުރުމަށް ޕެކޭޖިންގެ މަސައްކަތް ކުރިއަށް ގެންދެވޭނެ ކަމަށެވެ.
މަސްނުކިރެނީ ކިރާމަސް ފިނިކޮށް ޕްރޮސެސް ކުރާނެ ޖާގަ ފުލްވާތީ ކަމަށް މަސްވެރިން ކުރަމުން އައި ޝަކުވާ މަދުވެގެންދާނެ ގޮތަކަށް މަސައްކަތް ބަށްޓަން ކުރައްވާ ކަމަށް ރައީސް ވިދާޅުވިއެވެ. ރައީސް ވިދާޅުވީ, ހުރި މައްސަލަތަކަށް ދާއިމީ ހައްލެއް ހޯދުމުގެ މަސައްކަތް ކުރެވެމުންދާއިރު، ވަގުތީ ހައްލުތަކެއް ވެސް ގެނެވިއްޖެ ކަމަށާއި, މިފްކޯއަށް މަސް ގަތުމުގެ ކެޕޭސިޓީ މިހާރު ވަނީ އިތުރުކުރެވިފައި ކަމަށެވެ.
ދުވާލަކު 100 ޓަނު މަސްފިނި ކުރެވޭ، އަދި 300 ޓަނު މަސް ސްޓޯރ ކުރެވޭ ބޯޓެއް މުޅިން އަލަށް ހޯދާ ވަނީ ޚިދުމަތަށް ނެރެން ތައްޔާރުވެފައި ކަމަށާއި, އަދި މަސް އެކްސްޕޯރޓް ކުރުމަށް 2400 ޓަނުގެ ރީފާރ ކެރިއަރެއް ގަނެ، މިފްކޯއިން ވަނީ ދާދިފަހުން ރާއްޖެ ގެނެސްފައިކަން ރައީސް ފާހަގަކުރެއްވިއެވެ.
ރައީސް ވިދާޅުވީ, މިއަހަރުގެ ތިންވަނަ ކުއަރޓަރގެ ނިޔަލަށް މަހުގެ އެކްސްޕޯރޓް ވެސް މިވަނީ ބޮޑު ކުރިއެރުމެއް ހޯދާފައި ކަމަށެވެ. އަދި 2020 ވަނަ އަހަރުގެ މި މިމުއްދަތާ އަޅާ ބަލާއިރު، ދިވެހިރާއްޖެއިން މަސް އެކްސްޕޯޓްކޮށްފައިވާ މިންވަރު 37.9 އިންސައްތައަށް އިތުރުވެފައިވާ ކަމަށް ރައީސް ވިދާޅުވިއެވެ.
އައިސް އަޅައިގެން ނުވަތަ ކޯލްޑް ސްޓޯރޭޖްގައި މަސްބެހެއްޓެނީ އަދި އެކްސްޕޯރޓް ކުރެވެނީ ވެސް މަސްބޭނިގެން ކަމަށާއި, މަސްބޭނުމަށްޓަކާ އޮއިވާލި ކަނދުފަތީގެ މުހިންމު ކަމާ، އެކަމަށް މަސްވެރިން އެދެމުންދާ ދިއުމަށް ސަރުކާރުން އިޖާބަދެއްވާނެ ކަމަށް ރައީސް ވިދާޅުވިއެވެ. ކަނދުފަތީގެ ފަސޭހަތަކާ އޭގެސަބަބުން ތެލަށް ކުރާޚަރަދު ލުއިވާ މިންވަރު ބޮޑު ކަމަަށެވެެ.
އޮއިވާލި ކަނދުފަނތި ވުޖޫދުވީ ހިސާބުން ފެށިގެން ރާއްޖޭގައި މިހާތަނަށް އެޅިފައިވަނީ 56 ކަނދުފައްޗެވެ. ރައީސް ވިދާޅުވީ, 56 ކަނދުފަތީގެ މިވިއުގައަށް 30 ކަނދުފަތި އިތުރުކޮށް، ޖުމްލަ 86 އޮއިވާލި ކަނދުފަތިން މަސްކަނޑުތައް ގަތާލާ ގުޅާލުމަކީ، އަމާޒެއް ކަމުގައެވެ. މި މަސައްކަތް އަންނަ އަހަރު ފެށުމަށް ތައްޔާރުވަމުން އަންނަ ކަމަށެވެ. ދެމެހެއްޓެނިވި މަސްވެރި ދިވެހިރާއްޖެއަކަށް، ވިސްނުން ބަދަލު ކުރަން ޖެހޭ ކަމަށާއި, ކުރެވެން ހުރި ކަންކަމާ، އެކުވި-އަގުގެ އުފެއްދުންތައް ފުޅާކުރެވޭނެގޮތްތައް ދެނެގަތުން މުހިންމު ކަމަށް ރައީސް ވިދާޅުވިއެވެ. މަސްވެރިކަން، އިތުރުކޮށް އައު މާކެޓްތަކަށް އުފުލާލާ ހުޅުވާލުމުގެ ފުރުސަތުތައް ހޯދުމުގެ މަސައްކަތްތައް ނޫ-ރާއްޖެ ޕްރޮގްރާމް މެދުވެރިކޮށް ކުރިޔަށްދާ ކަމުގައި ރައީސް ފާހަގަކުރެއްވިއެވެ.
ކޯވިޑް-19 ގެ ޢާލަމީ ބަލިމަޑުކަމުން އާމްދަނީ ދަށްވި މަސްވެރި ފަރާތްތަކަށް އިންކަމް ސަޕޯރޓް އެލަވެންސް ސަރުކާރުން ދީފައިވާ ކަމަށާއި, ކަޅުބިލަ މަހާއި ބޮޑު ކަންނެލީގެ ސިނާޢަތުގެ 98 ފަރާތަކަށް 1.2 މިލިއަން ރުފިޔާގެ އެހީވެވުނު ކަމަށް ރައީސް ވިދާޅުވިއެވެ. ފަރުމަހުގެ މަސްވެރިކަން ކުރާ 1394 ފަރާތަކަށް ޖުމްލަ 30 މިލިއަނަށްވުރެ ގިނަ ރުފިޔާގެ އެހީ ސަރުކާރުން ދީފައިވެއެވެ. އަދި ހުއިފިލަނޑައާއި އިހީގެ ފަރުވެރިކަމުގައި އުޅުނު 362 ފަރާތަކަށް 8 މިލިއަނަށްވުރެ ގިނަ ރުފިޔާގެ އެހީ ސަރުކާރުން ދޫކޮށްފައިވެއެވެ. މިއާއެކު 1854 ފަރާތަށް ޖުމްލަ 39.3 މިލިއަން ރުފިޔާގެ އެހީ ސަރުކާރުން ވަނީ ފޯރުކޮށްދީފައެވެ. ބޮޑުކަންނެލީގެ މަސްގަންނަ 5 ކުންފުންޏަކަށް 55.4 މިލިއަން ރުފިޔާގެ ލޯން ސަރުކާރުން ދީފައިވެއެވެ.
އެސްޑީއެފްސީ މެދުވެރިކޮށް، މަސްވެރިކަމުގައި ހަރަކާތްތެރިވާ 102 ފަރާތަކަށް 144.3 މިލިއަން ރުފިޔާގެ ލޯން މިހާތަނަށް ސަރުކާރުން ވަނީ ދޫކޮށްފައިކަން ރައީސް ފާހަގަކުރެއްވިއެވެ.
މި ޖަލްސާގައި ވަނީ މިދިޔަ އަހަރު އެންމެ ގިނައިން ބޮޑު ކަންނެލި ކިރާފައިވާ ދޯނިތަކަށް ޚާއްސަ ހަނދާނީ ފިލާވެސް ދީފައެވެ.
