އަނެއްކާވެސް ގިނަ އަދަދެއްގެ ފަތުރުވެރިންނާއެކު، އައު ރެކޯޑެއް
މިމަހުގެ 5 ވަނަ ދުވަހު 6،269 ފަތުރުވެރިން އައިސްފައިވޭ
ފަތުރުވެރިން
މިމަހުގެ 5 ވަނަ ދުވަހު ރެކޯޑު އަދަދަކަށް ފަތުރުވެރިން އައިސްފައިވާކަމަށް ޓުއަރިޒަމް މިނިސްޓްރީން ބުނެފިއެވެ.
ޓުއަރިޒަމް މިނިސްޓްރީން ބުނީ މި މަހުގެ 5 ވަނަ ދުވަހު 6،269 ފަތުރުވެރިން ރާއްޖެ އައިސްފައިވާކަމަށެވެ. މިއީ 2020 ވަނަ އަހަރުގެ ޖުލައި މަހު ރާއްޖޭގެ ބޯޑަރު ހުޅުވާލި ފަހުން, އެއް ދުވަހެއްގެ މައްޗަށް އެންމެ ގިނަ ފަތުރުވެރިން ރާއްޖެ އައި ދުވަސް ކަމަށް ޓުއަރިޒަމް މިނިސްޓްރީން ބުނެފައިވެއެވެ.
މި ރެކޯޑު މުގުރާލުމުގެ ކުރިން އެންމެ ގިނަ ފަތުރުވެރިން އައިސް ރެކޯޑު ހަދާފައިވަނީ އޮކްޓޯބަރު މަހުގެ 16 ވަނަ ދުވަހުއެވެ. އެ ދުވަހު 6،172 ފަތުރުވެރިން ރާއްޖެ އައިސްފައިވެއެވެ.
ޓުއަރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުން ދައްކާގޮތުން، މިއަހަރުގެ މިހާތަނަށް 1،177،905 ފަތުރުވެރިން ވަނީ ރާއްޖެ އައިސްފައެވެ. މިމަހުގެ 1އިން 4އަށް ރާއްޖެ އައިސްފައިވަނީ 20،252 ފަތުރުވެރިންނެވެ.
މިއަހަރު އެންމެ ގިނަ އަދަދެއްގެ ފަތުރުވެރިން އައިސްފައިވަނީ ނޮވެމްބަރު މަހުއެވެ. އެއީ 144،725 ފަތުރުވެރިންނެވެ. ނޮވެމްްބަރު މަހު ދުވާލަކު 4،824 ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. ދެވަނައަށް އެންމެ ގިނަ ފަތުރުވެރިން އައިސްފައިވަނީ އޮގަސްޓު މަހުއެވެ. އެއީ 143،599 ފަތުރުވެރިންނެވެ. އޮގަސްޓު މަހު ދުވާލެއްގެ މައްޗަށް 4،632 ފަތުރުވެރިން ވަނީ އައިސްފައެވެ. މީގެ އިތުރުން އޮކްޓޯބަރު މަހު 142،066 ފަތުރުވެރިން ރާއްޖެ އައިސްފައިވާއިރު، އެމަހު ދުވާލެއްގެ މައްޗަށް ރާއްޖެ އައިސްފައިވަނީ 4،583 ފަތުރުވެރިންނެވެ.
ކޮވިޑް-19ގެ ފަހުން އެންމެ ގިނަ އަދަދެއްގެ ފަތުރުވެރިން އަންނަމުންދަނީ އިންޑިއާ މާކެޓުންނެވެ. އިންޑިއާ މާކެޓުން އަންނަ ފަތުރުވެރިންގެ 22.5 އިންސައްތަ ހިއްސާ އޮންނައިރު، ކޮވިޑް-19ގެ ކުރިން އިންޑިއާ މާކެޓުގެ އޮތީ ލިސްޓުގެ ދެވަނައިގައެވެ. ކޮވިޑް-19ގެ ފަހުން ދެވަނައަށް އެންމެ ގިނަ ފަތުރުވެރިން އަންނަމުންދަނީ ރަޝިއާ މާކެޓުން ކަމަށް ޓުއަރިޒަމް މިނިސްޓްރީން ބުނެފައިވެއެވެ. ރަޝިއާ މާކެޓުން އަންނަ ފަތުރުވެރިން 17.6 އިންސައްތަ ހިއްސާކުރާއިރު، ކޮވިޑް-19ގެ ކުރިން ރަޝިއާ އޮތީ ހަވަނައިގައެވެ. މިވަގުތު ތިންވަނައިގައި އޮތީ ޖަރުމަނު މާކެޓެވެ. އެ މާކެޓުން އަންނަ ފަތުރުވެރިންގެ 7.2 އިންސައްތަ ހިއްސާ އޮތްއިރު، ކޮވިޑް-19ގެ ކުރިން މި މާކެޓު އޮތީ 4 ވަނައިގައެވެ.
މީގެ އިތުރުން ފަތުރުވެރިންގެ އެކޮމޮޑޭޝަން ފެސިލިޓީތަކުގެ ތެރެއިން 911 ތަނަކުން ގެންދަނީ ޚިދުމަތް ދެމުންނެވެ. އެއީ 597 ގެސްޓްހައުސްއާއި، 144 ސަފާރީއާއި، 160 ރިސޯޓު އަދި 10 ހޮޓެލްއެވެ. މި 911 ތަނުގައި ޖުމްލަ 52،024 ބެޑް ކެޕޭސިޓީ އެބަހުރި ކަމަށް މިނިސްޓްރީގެ ތަފާސްހިސާބުން ދައްކައެވެ.
