ގެވެށި އަނިޔާ ލިބޭ މީހުންގެ 75 އިންސައްތައަކީ އަންހެނުން

ގެވެށި އަނިޔާ އާއި ވަކި ޖިންސަކަށް ނިސްބަތްވީތީ އަނިޔާ ލިބޭ މީހުންގެ ތެރެއިން ގާތްގަނޑަކަށް 75 އިންސައްތަ މީހުންނަކީ އަންހެނުންނާ، އަންހެން ކުދިން ކަމަށް ފެމިލީ ޕްރޮޓެކްޝަން އޮތޯރިޓީ (އެފްޕީއޭ)ގެ ސީއީއޯ އިބްރާހިމް ތައްޔިބު ވިދާޅުވެއްޖެއެވެ.

ގެވެށި އަނިޔާ އާއި ވަކި ޖިންސަކަށް ނިސްބަތްވީތީ ލިބޭ އަނިޔާއާ ދެކޮޅަށް ހިންގާ ކެމްޕެއިނުގެ ޓްރެއިނަރުން ތަމްރީނުކުރުމަށް ކުރިއަށްގެންދާ ޕްރޮގްރާމް ފެށުމުގެ ރަސްމިއްޔާތުގައި ތައްޔިބު ވިދާޅުވީ ކޮންމެ ދުވަހަކީވެސް ކޮންމެވެސް މީހަކަށް މިފަދަ އަނިޔާތަކެއް ލިބެމުންދާ ދުވަހެއް ކަމަށެވެ. އަދި މިދިޔަ އަހަރާ، މިއަހަރުގެ މިހާތަނަށް ހެދިފައިވާ ތަފާސްހިސާބުތައް ދައްކާ ގޮތުން މިފަދަ އަނިޔާ ލިބޭ މީހުންގެ ތެރެއިން ގާތްގަނޑަކަށް 75 އިންސައްތަ މީހުންނަކީ އަންހެނުންނާ، އަންހެން ކުދިން ކަމަށެވެ.

މި ރަސްމިއްޔާތުގެ ޝަރަފުވެރި މެހެމާނު މިނިސްޓަރ އޮފް ސްޓޭޓް ފޯރ ޖެންޑަރ ފެމިލީ އެންޑް ސޯޝަލް ސާވިސަސް ޒިފްނީނާ ހަސަން ވިދާޅުވީ އެފްޕީއޭއިން މިނިސްޓްރީއާ ގުޅިގެން މިފަދަ ޕްރޮގްރާމެއް ހިންގުމަކީ ވަރަށް އުފާކުރާ ކަމެއް ކަމަށެވެ. އަދި މިފަދަ ޓްރެއިނިން ޕްރޮގްރާމެއް ހިންގުމުގެ މައިގަނޑު މަގުސަދަކީ މިނިސްޓްރީއާ، މިނިސްޓްރީގެ ދަށުން ހިނގާ އެކިއެކި އިދާރާތަކުގައި މަސައްކަތް ކުރައްވާ ކޭސް ވޯކަރުންގެ މައުލޫމާތާ ހުނަރު އިތުރުކުރުން ކަމަށެވެ. ހަމައެހެންމެ މި ޕްރޮގްރާމުގެ ސަބަބުން އަނިޔާ ލިބޭ ފަރާތްތަކަށް ބޭނުންވާ ރައްކާތެރިކަން އަވަހަށް ފޯރުކޮށްދޭނެ އިންތިޒާމުތައް ތަރުތީބު ކުރެވިގެންދާނެ ކަމަށެވެ.

އެއީ އެ އަނިޔާ ތަހައްމަލުކުރާ މީހުނަށް ކުރާ އަސަރު އެންމެ ގާތުން ފެންނާނީ ނުވަތަ އަނިޔާ ލިބޭ ކަމުގެ ނިޝާންތައް ފާހަގަ ކުރެވޭނީ އެމީހުންނަށް ކަމަށް ވާތީ ކަމަށް ވިދާޅުވިއެވެ.

މިނިސްޓްރީއަށް ހުށަހެޅޭ ގެވެށި އަނިޔާގެ މައްސަލަތަކުގައި އަނިޔާ ލިބޭ ފަރާތްތަކަށް އެންމެ ބޮޑަށް ދިމާވާ މައްސަލައަކީ ރައްކާތެރި ކުރުމުގެ އަމުރު ލިބުމުގައާ، ވަރިވުމަށް އެދޭ ހާލަތުގައި އެ މަސައްކަތް ދިގުދެމިގެން ދިއުން ކަމަށް ޒިފްނީން ފާހަގަކުރެއްވިއެވެ. އަދި މި ދިގުލައިދިއުމުގެ ސަބަބުން އަނިޔާވެރި އަމަލުތަކުގެ ތެރޭގައި އުޅުމަށް މަޖުބޫރު ވެގެންދާ ހާލަތުވެސް އަންނަ ކަމަށެވެ.

އެހެންކަމުން ގާނޫނު ތަންފީޒުކޮށް، އަނިޔާ ލިބޭ ފަރާތްތަކަށް އިންސާފު ލިބޭނެ މަގު އަވަސް ކުރުމަށް ކޭސް ވޯކަރުންގެވެސް މުހިންމު ދައުރެއް އެބައޮތް ކަމަށް ޒިފްނީން ވިދާޅުވިއެވެ. ޚާއްސަކޮށް ރިސްކް ހުރި މިންވަރު ބެލުމާ، ރައްކާތެރިކަމުގެ ޕްލޭންތައް މިހާރަށްވުރެ ހަރުދަނާކޮށް އެކުލަވާލާ ތަންފީޒު ކުރެވޭނެ ގޮތް ހޯދުން މުހިންމު ކަމަށެވެ.

ޒިފްނީން ވިދާޅުވީ މި ޕްރޮގްރާމުގެ ތެރޭގައި މިފަދަ ކަންތައްތައް އިތުރަށް ހަރުދަނާ ކުރާނެ ގޮތްތަކެއް ކިޔަވައިދެވިގެންދާނެ ކަމަށެވެ. އަދި މީގެ ސަބަބުން މި މަސައްކަތަށް ރަނގަޅު ކުރިއެރުމެއް ލިބިގެންދާނެ ކަމަށެވެ.