އަޑުބަރޭއަށް 12000 ރުފިޔާގެ ޖޫރިމަނާއަކާއެކު ހަ މެޗުގެ ސަސްޕެންޝަނެއް

ސްރީ ލަންކާގައި ކުރިއަށްދިޔަ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި ރާއްޖެ އާއި ސީޝެލްސް ބައްދަލުކުރި މެޗުގައި ސީޝެލްސް ކުޅުންތެރިއަކަށް ބޯޅަ ނެތީސް ހަމަލާދިން މައްސަލައިގައި ގައުމީ ޓީމުގެ މިޑްފީލްޑަރު އަސްހަދު އަލީ (އަޑުބަރޭ) 12،000 ރުފިޔާއިން ޖޫރިމަނާކޮށް، ހަ މެޗަށް ސަސްޕެންޑުކޮށްފިއެވެ.

މިދިޔަ ނޮވެމްބަރު މަހު ސީޝެލްސްއާ ދެކޮޅަށް ކުޅުނު މެޗުން މޮޅުވެގެން ފައިނަލަށް ދިޔުމުގެ ފުރުސަތު އޮތް ނަމަވެސް، އެ މެޗުން ލަނޑެއް ނުޖެހި އެއްވަރުވުމުން ރާއްޖެ ވަނީ ކަޓާފައެވެ. އެ މެޗުގެ އިތުރު ވަގުތުގައި ބަދަލު ކުޅުންތެރިއެއްގެ ގޮތުގައި ކުޅެން އެރި އަޑުބަރޭ ވަނީ ބޯޅަ ނެތީސް ސީޝެލްސް ކެޕްޓަން ސްޓީވް ބެނޯއީ މޫނުމަތީގައި ވަރަށް ބާރަށް އުޅަބޮށިން ޖަހާފައެވެ. އެއާއެކު އޭނާއަށް ރެފުރީ ވަނީ ވަގުތުން ރަތް ކާޑެއް ދައްކާފައެވެ.

އެ މައްސަލަ އެފްއޭއެމުގެ ޑިސިޕްލިނަރީ ކޮމިޓީން ބެލިއިރު، ކޮމިޓީއަށް ދިން ބަޔާނުގައި އުމުރުން 34 އަހަރުގެ އަޑުބަރޭ ބުނެފައިވަނީ އެ މެޗުގައި ސީޝެލްސް ކެޕްޓަނުގެ މޫނުމަތީގައި ޖަހާފައި ވަނީ "ފްރަސްޓޭޓް" ވެގެން ކަމަށެވެ. އަދި "ފްރަސްޓޭޓް" ވާން ދިމާވީ ބަދަލު ކުޅުންތެރިޔެއްގެ ގޮތުގައި ކުޅެން އަރަން ތައްޔާރުވެގެން ބެންޗު ކައިރީގައި 15 މިނެޓު ހުންނަން ޖެހުމުން ކަމަށާއި، އަދި އެގޮތަށް ހުންނަން ޖެހުމުން އެކަމުގެ ޝަކުވާ ކޯޗުން ކައިރީގައި ކުރި ކަމަށްވެސް ވަނީ ބުނެފައެވެ.

އެއާއެކު މައްސަލަ ބެލުމަށްފަހު އެފްއޭއެމުގެ ޑިސިޕްލިނަރީ ކޮމިޓީން މިހާރު ވަނީ އަޑުބަރޭ 12،000 ރުފިޔާއިން ޖޫރިމަނާކޮށް، ހަ މެޗަށް ސަސްޕެންޑުކޮށްފައެވެ. އެ ކޮމިޓީގެ ނިންމުމުގައިވާ ގޮތުން އެ ފިޔަވަޅު އަޅަން ނިންމީ އިދިކޮޅު ކުޅުންތެރިއެއްގެ ހަށިގަނޑަށް ގެއްލުންވާ ފަދަ ހަމަލާއެއް ދީފައިވާތީ އާއި ގައުމީ ޓީމުގެ ކުޅުންތެރިއެއްގެ ގޮތުގައިހުރެ ގައުމު ތަމްސީލުކުރި މެޗެއްގައި އެފަދަ އަމަލެއް ހިންގާފައިވާތީއެވެ. އަދި ހަ މެޗުގެ ސަސްޕެންޝަނަކީ އެ މެޗުގައި ދެއްކި ރަތް ކާޑުގެ ސަސްޕެންޝަން ހިމެނޭ ގޮތަށް ކަނޑައަޅާފައިވާ ސަސްޕެންޝަނެއް ކަމަށްވެސް ވަނީ ނިންމާފައެވެ.

ފޯ ނޭޝަންސް ކަޕުގައި ފެނިގެންދިޔަ ހުތުރު އަމަލާ ގުޅިގެން ކުޅިވަރާ ބެހޭ ވުޒާރާގެ ސްޓޭޓް މިނިސްޓަރެއްގެ މަގާމުވެސް އަދާކުރައްވަމުން އަންނަ އަޑުބަރޭއަށް ފާޑުކިޔުން އަމާޒުވިއިރު، އޮކްޓޯބަރު މަހު މާލޭގައި ބޭއްވި "އުރީދޫ ސާފް ޗެމްޕިއަންޝިޕް 2021" ގައިވެސް އަޑުބަރޭއަށް ވަނީ ފާޑުކިޔުންތަކެއް އަމާޒުވެފައެވެ. އެގޮތުން މީގެ ކުރިން 2018 ވަނަ އަހަރުގެ މާޗު މަހުގެ ތެރޭގައި ގައުމީ ޓީމުން ރިޓަޔާކުރުމަށްފަހު އަޑުބަރޭ އަލުން ގައުމީ ޓީމަށް ނެގުމާއެކުވެސް ގިނަ ބަޔަކު ވަނީ ފާޑުކިޔާފައެވެ. އެ ފަހަރު އޭނާ ގައުމީ ޓީމުން ރިޓަޔާކުރީ އޭރުގެ ގައުމީ ޓީމުގެ ކޯޗު ޕީޓަ ސެގާޓުގެ ކުއްލި ނިންމުމަކާ މެދު ހިތްހަމަނުޖެހިގެންނެވެ.

އަޑުބަރޭ އަލުން ގައުމީ ޓީމުގައި ހިމެނިގެން ކުޅެމުން އަންނައިރު، ސާފް ޗެމްޕިއަންޝިޕުގައި ރާއްޖޭން ކުޅުނު ފުރަތަމަ މެޗުތަކުގައި ފުރަތަމަ އެގާރައިގައި ހިމެނިގެން އަޑުބަރޭ ކުޅުނެވެ. އެކަމަކު ލަންކާގައި ބޭއްވި މުބާރާތުގައި މިހާރުގެ ކޯޗު އިޓަލީގެ ފްރެންސެސްކޯ މޮރިއޭރޯ އަޑުބަރޭއަށް ފުރަތަމަ އެގާރައިން ފުރުސަތުދީފައެއް ނުވެއެވެ.