މުބާރާތުގައި ކުޅުނު ދެމެޗުންވެސް ބަލިވުމުން, އަންހެނުންގެ ސާފް ޗެމްޕިއަންޝިޕްގެ ސެމީ ފައިނަލުގެ ފުރުސަތު ރާއްޖޭގެ ޓީމަށް ގެއްލިއްޖެއެވެ.
ނޭޕާލުގެ ދަޝްރަތު ރަންގަސާލާ ސްޓޭޑިއަމްގައި ރާއްޖެއާއި އިންޑިއާ ބައްދަލުކުރި ފުޓުބޯޅަ މެޗު އިންޑިއާއިން ކާމިޔާބުކުރީ 9-0ންނެވެ. މި މެޗުގެ ފުރަތަމަ ހާފުގައި އިންޑިއާއިން ތިން ލަނޑު ޖެހިއެވެ. ބާކީ ހަލަނޑު ޖެހީ ދެވަނަ ހާފުގައެވެ.
މުބާރާތުގައި ރާއްޖެ ކުޅުނު ފުރަތަމަ މެޗުންވެސް ވަނީ ބަލިވެފައެވެ. ފުރަތަމަ މެޗުގައި ބަންގްލަދޭޝް އަތުން ރާއްޖެ ބަލިވީ 3-0ންނެވެ. މުބާރާތުގައި ރާއްޖެއާއި އެއް ގްރޫޕެއްގައި ހިމެނެނީ ބަންގްލަދޭޝްއާއި އިންޑިއާގެ އިތުރުން ޕާކިސްތާނެވެ. މި ގްރޫޕުން ސެމީގެ ޖާގަ ކަށަވަރުކުރީ ބަންގްލަދޭޝްއާއި އިންޑިއާއެވެ. މި ދެޓީމުވެސް ފައިނަލަށް ދަތުރުކުރީ ގްރޫޕް ސްޓޭޖުގައި ބާކީ އެއްމެޗު އޮއްވައެވެ.
މިފަހަރުގެ މުބާރާތަށް ރާއްޖެ ޓީމުން ދަތުރުކުރީ ސެމީ ފައިނަލް ކުޅުމުގެ އުންމީދުގައެވެ. މުބާރާތުގައި ރާއްޖެއަށް ދެން އޮތީ ޕާކިސްތާނާއި ވާދަކުރާ މެޗެވެ. ޕާކިސްތަނާއި އިންޑިއާ ބައްދަލުކުރި މެޗު އިންޑިއާއިން ކާމިޔާބުކުރީ 3-0ންނެވެ. ބަންގްލަދޭޝް އަތުން ޕާކިސްތާނު ބަލިވީ 6-0ންނެވެ.
