ވަޒީފާއިން ވަކިކުރަން ނޯޓިސް ދިނީ އަހަރު ދުވަސް ވަންދެން އިތުރުގޮތްތައް ހޯދަން ފުރުސަތު ދީފައި - ޖެންޑަރ މިނިސްޓްރީ
1 ޑިސެމްބަރު 2021 | ބުދަ 12:49މުވައްޒަފުން އެހެން ތަންތަނަށް ބަދަލުވުމަށް 1 އަހަރަށް ވުރެ ގިނަ ދުވަހުގެ މުއްދަތެއް ދިން
ކުޑަކުދިންގެ ހިޔާ
ޖެންޑާ މިނިސްޓްރީގެ ބެލުމުގެ ދަށުން ހިންގަމުން އަންނަ ހިޔާގައި މަސައްކަތް ކުރާ 21 މުވައްޒަފަކު ވަޒީފާއިން ވަކިކުރަން ނޯޓިސް ދީފައިވަނީ މިނިސްޓްރީގެ އެހެން ތަންތަނަށް ބަދަލުވާ ފުރުސަތު ދިނުމަށްފަހުގައި ކަމަށް ޖެންޑަރ މިނިސްޓްރީން ބުނެފިއެވެ.
ޖެންޑަރ މިނިސްޓްރީގެ 21 މުވައްޒަފަކު ވަޒީފާއިން ވަކި ކުރަން ކުއްލި ގޮތަކަށް ނޯޓިސް ދިން ކަމަށް ބައެއް ނޫސްތަކުން ރިޕޯޓްކުރުމާއި ގުޅިގެން، ޖެންޑާ މިނިސްޓްރީން ބުނީ ނޯޓިސް ދީފައިވަނީ ހިޔާގައި މަސައްކަތް ކުރާ 21 މުވައްޒަފުންނަށް ކަމަށެވެ. އަދި އެމީހުންނަށް ނޯޓިސް ދީފައިވަނީ ހިޔާގައި ތިބި ކުދިންތައް އަތޮޅު ތެރޭގެ އަމާންވެށިތަކަށް ބަދަލުކުރުމުން އެމީހުންގެ ޒިންމާތަކެއް ނެތި މަސައްކަތް ކުރަމުން އަންނާތީ، މިނިސްޓްރީގެ އެހެން މަސައްކަތްތައް ކުރުމަށް ބަދަލުވުމުގެ ފުރުސަތު ދިނުމަށްފަހު ކަމަށެވެ. އަދި އެ ފުރުސަތު ދިންތާ އަހަރަކަށްވުރެ ގިނަ ދުވަސްވެފައިވާ ކަމަށެވެ.
ޖެންޑާ މިނިސްޓްރީން ބުނީ 71 މުވައްޒަފުންގެ ތެރެއިން ތިން މީހުން ޝައުގުވެރިކަން ފާޅުކުރީ އަތޮޅުތަކުގެ އަމާންވެށިތަކުގައި މަސައްކަތްކުރުމަށް ކަމަށާއި، ހިޔާގެ 43 މުވައްޒަފަކު އަންނަނީ އެކި ތަންތަނުގައި މަސައްކަތް ކުރަމުން ކަމަށެވެ. އަދި އަމިއްލައަށް ބޭނުންވެގެން ހަތް މުވައްޒަފަކު ވަޒީފާއިން ވަކިވެފައިވާ ކަމަށެވެ. ނަމަވެސް ބާކީ 21 މުވައްޒަފުން ވަޒީފާއިން ވަކިކުރަން ނޯޓިސް ފޮނުވީ ސިވިލް ސާވިސްގެ އުސޫލުގެ ދަށުން ކަމަށް ޖެންޑަރ މިނިސްޓްރީން ބުނެއެވެ.
21 މުވައްޒަފުން ވަޒީފާއިން ވަކިކުރަން ނޯޓިސް ދީފައިވަނީ ސިވިލް ސަރވިސް ކޮމިޝަނުން ބަލަންޖެހޭ ކަންކަން ބެލުމަށްފަހުގައި ކަމަށް ޖެންޑަރ މިނިސްޓްރީން ބުނެއެވެ.
