15 އަހަރަށްފަހު އުރުގުއޭއިން ޓަބަރޭޒް ވަކިކޮށްފި

އުރުގުއޭ ގައުމީ ފުޓްބޯޅަ ޓީމަށް 15 އަހަރު ވަންދެން އިރުޝާދުދިން މަޝްހޫރު ކޯޗު އޮސްކާ ޓަބަރޭޒް މަގާމުން ދުރުކޮށްފިއެވެ.

އުމުރުން މިހާރު 74 އަހަރުގެ ޓަބަރޭޒް އެންމެ ފުރަތަމަ އުރުގުއޭގެ ކޯޗުގެ މަގާމު އަދާކޮށްފައިވަނީ 1988 ވަނަ އަހަރު ސެޕްޓެމްބަރު މަހުން ފެށިގެން 1990 ވަނަ އަހަރުގެ ޖޫން މަހުގެ ނިޔަލަށެވެ. އޭގެ ފަހުން ބޮކަ ޖޫނިއާސް އާއޮ އޭސީ މިލާނަށްވެސް އިރުޝާދުދިން ޓަބަރޭޒް އަލުން އުރުގުއޭގެ ގައުމީ ޓީމާ ހަވާލުވީ 2006 ވަނަ އަހަރުގެ ފެބްރުއަރީ މަހުގެ ތެރޭގައެވެ.

ޓަބަރޭޒްގެ ކޯޗުކަމުގައި އުރުގުއޭއިން ވަނީ 2010 ވަނަ އަހަރު ދެކުނު އެފްރިކާގައި ބޭއްވި ވޯލްޑް ކަޕުގެ ސެމީ ފައިނަލުގައި ކުޅުމުގެ އިތުރުން 2011 ވަނަ އަހަރުގެ ކޮޕަ އެމެރިކާ ފުޓްބޯޅަ މުބާރާތް ކާމިޔާބުކޮށްފައެވެ.

އެކަމަކު ޓަބަރޭޒް މަގާމުން ވަކިކުރަން ހުކުރު ދުވަހު އުރުގުއޭ ފުޓްބޯޅަ އެސޯސިއޭޝަނުން ނިންމީ އަންނަ އަހަރު ގަތަރުގައި ބާއްވާ ފީފާ ވޯލްޑް ކަޕަށް އުރުގުއޭ ކޮލިފައިނުވެދާނެ ކަމުގެ ބިރު ބޮޑުވުމުން، އައު ކޯޗަކާ ޓީމު ހަވާލުކުރުމުގެ ގޮތުންނެވެ. އެގޮތުން މި ފަހަރުގެ ވޯލްޑް ކަޕުގެ ދެކުނު އެމެރިކާ ކޮލިފައިންގައި އުރުގުއޭގެ ނަތީޖާތަށް ދަށްވެފައިވާއިރު، އުރުގުއޭ ވަނީ ކޮލިފައިންގައި އެންމެ ފަހުން ކުޅުނު ހަތަރު މެޗުންވެސް ބަލިވެފައެވެ.

ދެކުނު އެމެރިކާ ކޮލިފައިންގެ ގަދަ ހަތަރު ޓީމަށް ވޯލްޑް ކަޕުގެ ޖާގަ ލިބޭއިރު، އެއްވަނައިގައި އޮތް ބްރެޒިލާއި ދެވަނައިގައި އޮތް އާޖެންޓީނާއިން ވަނީ ވޯލްޑް ކަޕުގެ ޖާގައެއް ކަށަވަރުކޮށްފައެވެ. ތިންވަނައިގައި އޮތް އެކުއެޑޯއަށް 14 މެޗުން 23 ޕޮއިންޓް ލިބިފައިވާއިރު، ހަތަރުވަނައިގައި އޮތް ކޮލަމްބިއާއަށް 14 މެޗުން ވަނީ 17 ޕޮއިންޓް ލިބިފައެވެ. ކޮލިފައިންގައި ބާކީ ހަތަރު މެޗު އޮތްއިރު، އުރުގުއޭ އޮތީ ހަތްވަނައިގައި 14 މެޗުން 16 ޕޮއިންޓާއެކުއެވެ.

އުރުގުއޭއިން އެ ޓީމުގެ ކޯޗުގެ މަގާމުން ޓަބަރޭޒް ވަކިކުރިއިރު، އޭނާއަކީ ގައުމީ ޓީމަކަށް އެންމެ ގިނަ މެޗު އިރުޝާދުދިނުމުގެ ރިކޯޑު އޮންނަ ކޯޗެވެ. އެގޮތުން އުރުގުއޭގެ ކޯޗުގެ މަގާމުގައި ހޭދަކުރި 15 އަހަރާއި 8 މަހުގެ ތެރޭގައި އޭނާ ވަނީ އުރުގުއޭއަށް 221 މެޗުގައި ކޯޗުކޮށްދީފައެވެ.