ބަޔާން މިއުނިކްގެ ކޯޗުގެ މަޤާމުން އަންޗެލޯޓީ ވަކިކޮށްފި

ޖަރުމަނުގެ ޗެމްޕިއަން ބަޔާން މިއުނިކްގެ ކޯޗުގެ މަޤާމުން ކާލޯ އަންޗެލޯޓީ ވަކިކޮށްފި އެވެ.

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ފްރާންސްގެ ޗެމްޕިއަން ޕެރިސް ސެއިންޓް ޖަމައިން (ޕީއެސްޖީ) އަތުން ލަދުވެތި ނަތީޖާއަކުން ބަލިވި މެޗަށްފަހު 24 ގަޑިއިރުވެސް ނުވަނީސް، ބަޔާން މިއުނިކްގެ ކޯޗުގެ މަޤާމުން އަންޗެލޯޓީ ވަކިކުރިކަން އެކްލަބުން ހާމަކޮށްފައި ވަނީ ބުރާސްފަތި ދުވަހު ނެރުނު ބަޔާނެއްގަ އެވެ.

ޔުއެފާ ޗެމްޕިއަންސް ލީގުގެ މިސީޒަނުގެ ފެވަރިޓުންގެ ތެރޭގައި ހިމެނުނު ބަޔާން، ރަށުން ބޭރުގައި ޕީއެސްޖީ އަތުން ބަލިވީ ތިން ލަނޑު ސުން ލަނޑުންނެވެ.

ފާއިތުވި ސީޒަނުގައި ޖަރުމަނު ބުންޑަސްލީގާގެ ތަށި ހޯދައިދިން ކޯޗު މަޤާމުން ވަކިކުރިކަން ހާމަކުރުމަށް ފަހު ކްލަބުގެ އެގްޒެކެޓިވް ޗެއަރމަން ކާލް ހެއިންޒް ރުމެނިގާ ބުނީ، ސީޒަނުގެ ކުރީކޮޅުން ފެށިގެން މެނޭޖްމަންޓުން އުއްމީދުކުރި ނަތީޖާއެއް ނެރެވިފައިނުވާ ކަމަށެވެ.

އަންޗެލޯޓީގެ އިރުޝާދުގެ ދަށުން ކުޅުނު ފުރަތަމަ ސީޒަނުގައި ބަޔާން އިން ލީގު ކާމިޔާބު ކުރި ނަމަވެސް، މިސީޒަނުގައި އެދެވޭ ނަތީޖާއެއް ނެރެވިފައެއް ނުވެއެވެ. އެގޮތުން ލީގުގައި މިހާތަނަށް ކުޅުނު ހަމެޗުގެ ތެރެއިން ބަޔާން ވަނީ އެއް މެޗުން ބަލިވެ، އެއް މެޗުން އެއްވަރުވެފައެވެ. ބަޔާން މިވަގުތު އޮތީ ވާދަވެރި ބޮރޫޝިއާ ޑޯޓްމުންޑަށް ވުރެ ތިން ޕޮއިންޓް މަދުން ލިބިގެން، ބުންޑަސްލީގާ ތާވަލްގެ ތިން ވަނާގައެވެ.

އަދި ޕެރިހުގައި ކުޅުނު މެޗަށް ފަހު، ކްލަބުގެ ސްޕޯޓިންގ ޑިރެކްޓަރާއެކު އަންޗެލޯޓީ އާ ބައްދަލުކޮށް، ކްލަބުގެ ނިންމުމާއިމެދު މަޝްވަރާ ކޮށްފައިވާ ކަމަށް ރުމެނިގާ ބުންޏެވެ.

އަދި ބަޔާން އަށް އަންޗެލޯޓީ ކޮށްދިން ޚިދުމަތަށް ޝުކުރު އަދާކުރާ ކަމަށާއި، މިއީ ކްލަބުގެ މަސްލަހަތަށްޓަކައި ނިންމި ނިމްމެއް ކަމަށް އޭނާ ބުންޏެވެ. މީގެ އިތުރުން ރުމެނިގާ ވަނީ މިކަމަށް ކްލަބުގެ ކުޅުންތެރިން އިޙްތިރާމްކޮށް މިސީޒަނަށް ކަނޑައަޅާފައިވާ އަމާޒަށް ވާޞިލްވުމަށް ކުޅުންތެރިންގެ ކިބައިން އެދިފައެވެ.

ބަޔާންގެ ކޯޗުގެ މަޤާމާއި ދެން ހަވާލުވާނެ ކަމަށް ބެލެވެނީ ހޮފެންހެއިމްގެ ކޯޗު ޖޫލިއަން ނަގެލްސްމަން ނުވަތަ ބަޔާންގެ ކުރީގެ ކޯޗު ވިލީ ސެންޔޯލް އެވެ. ދާއިމީ ކޯޗެއް ހަމަޖެހެންދެން އެކްލަބަށް އިރުޝާދު ދޭނީ ސެންޔޯލް އެވެ.