ޕްރިމިއާ ލީގު: 10 އަހަރަށްފަހު ސަންޑަލޭންޑް ރެލިގޭޓްވެއްޖެ
ސަންޑަލޭންޑް އޮތީ 34 މެޗުން އެއްކުރި 21 ޕޮއިންޓާއެކު ޕޮއިންޓް ތާވަލުގެ ފުލުގައި
ސަންޑަލޭންޑްގެ ކުޅުންތެރިން ބޯންމައުތް އަތުން ބަލިވި މެޗަށް ފަހު
ޕްރިމިއާ ލީގުގައި އޭއެފްސީ ބޯންމައުތް އަތުން ބަލިވެ، 10 އަހަރަށްފަހު ސަންޑަލޭޑް ރެލިގޭޓްވެއްޖެ އެވެ.
ހޮނިހިރު ދުވަހުގެ ރޭ ބޯންމައުތްއާ ދެކޮޅަށް ކުޅުނު މެޗުން ސަންޑަލޭންޑް ބަލިވެފައިވަނީ 0-1 ގެ ނަތީޖާއަކުންނެވެ.
ސަންޑަލޭންޑް ދަނޑުގައި ކުޅުނު މި މެޗުގައި ބޯންމައުތްގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، ލަނޑު ޖަހަންވެސް އެޓީމުން ވަނީ ގިނަ ފުރުސަތުތައް މެޗުގައި ތަނަވަސްކޮށްފައެވެ.
އެހެންނަމަވެސް ފުރަތަމަ ހާފްގެ ފަހުކޮޅު ސަންޑަލޭންޑުން ވަނީ މެޗުގެ ކޮންޓްރޯލް ހޯދާ ބޯންމައުތްގެ ހާފަށް ބާރުބޮޑުކޮށް ހަމަލާ އުފައްދަން މަސައްކަތްކޮށްފައެވެ. ފުރަތަމަ ހާފް ނިމުނީ 0-0 ގެ ނަތީޖާއަކުން ދެޓީމު އެއްވަރުވެގެންނެވެ.
ދެވަނަ ހާފް ފެށިގެން ބޯންމައުތް އިން އެޓީމުގެ ކުޅުން ވަރުގަދަކުރިއިރު، ލަނޑު ޖެހުމަށް އެޓީމަށް ހުސް ގިނަ ފުރުސަތުތަކެއް ވަނީ ލިބި ބޭކާރުވެފައެވެ. މި މެޗުގައި ފެނިގެންދިޔަ ހަމައެކަނި ލަނޑު 88 ވަނަ މިނެޓުގައި ބޯންމައުތްއަށް ކާމިޔާބުކޮށްދީފައިވަނީ ޖޯޝުއާ ކިންގް އެވެ. މިއީ މި ސީޒަނުގެ ޕްރިމިއާ ލީގުގައި ކިންގް ކާމިޔާބުކުރި 15 ލަނޑެވެ.
މި ނަތީޖާއާއެކު ބޯންމައުތް ވަނީ ކުޅުނު 35 މެޗުން އެއްކުރި 41 ޕޮއިންޓާއެކު ޕޮއިންޓް ތާވަލުގެ 10 ވަނައަށް ޖެހިލާފައެވެ. މެޗުން ބަލިވި ސަންޑަލޭންޑް އޮތީ ކުޅުނު 34 މެޗުން އެއްކުރި 21 ޕޮއިންޓާއެކު ޕޮއިންޓް ތާވަލުގެ ފުލުގައެވެ.
ޕްރިމިއާ ލީގުން އެންމެ ގިނައިން ރެލިގޭޓްވި ޓީމަކަށް ސަންޑަލޭންޑް ވެގެންގޮސްފައިވާއިރު، އެޓީމު އެންމެ ފަހުން ޕްރިމިއާ ލީގުގެ މެޗަކުން މޮޅުވެފައިވަނީ މިދިޔަ އަހަރުގެ ޑިސެމްބަރު މަހު ސްވަންސީ އަތުންނެވެ.
