އެމެރިކާގެ ރައީސްކަމުގެ ބާރުތައް ލިބިވަޑައިގަންނަވާ ފުރަތަމަ ބޭކަނބަލަކަށް ކަމަލާ

އެމެރިކާގެ ރައީސް ޖޯ ބަައިޑެން ސިއްހީ ގޮތުން ހައްދަވަން ޖެހިވަޑައިގަންނަވާ ޗެކަޕްތަކެއް ހައްދަވާތީ، އެމެރިކާގެ ރައީސްކަމުގެ ބާރުތައް ލިބިވަޑައިގަންނަވާ ފުރަތަމަ ބޭކަނބަލަކަށް، ނައިބު ރައީސާ ކަމަލާ ހެރިސް ވެވަޑައިގެންފިއެވެ.

"ކޮލޮނޯސްކޯޕީ"އަކަށް، ހޭނައްތާ އިންޖެކްޝަން ބައިޑެންއަށް ދެއްވާތީ، ވަގުތީ ގޮތުން ކަމަލާއަށް ރައީސް ކަމުގެ ބާރުތައް ހަވާލު ކުރެއްވުމަށް ރައީސް ބައިޑެން ނިންމެވީއެވެ. އެގޮތުން އެމެރިކާގެ އަސްކަރިއްޔާގެ ނިންމުންތައްވެސް މި މުއްދަތުގެ ތެރޭގައި ނިންމަވާނީ ކަމަލާ ކަމަށް ބޭރުގެ ނޫސްތަކުން ވަނީ ރިޕޯޓު ކޮށްފައެވެ.

މި މުއްދަތުގެ ތެރޭގައި އެކަމަނާ މަސައްކަތްތައް ކުރައްވަމުން ގެންދަވާނީ ވައިޓްހައުސްގެ ހުޅަނގު ވިންގުގައި ހުންނަ އެކަމަނާގެ އޮފީހުގައިކަމަށް ވައިޓްހައުސްގެ ޕްރެސް ސެކެޓަރީ ޖެންސާކީ ވަނީ ވިދާޅުވެފައެވެ.

އިންޑިއާ-ޖެމެއިކާއަށް ނިސްބަތްވެވަޑައިގަންނަވާ ކަމަލާ އަކީ އެމެރިކާގެ ފުރަތަމަ އަންހެން ނައިބު ރައީސާއަކަށް ވެވަޑައިގަތުމުގެ އިތުރުން، "މިކްސްޑް ރޭސް" އަކަށް ނިސްބަތްވެވަޑައިގަންނަވާ ފުރަތަމަ ނައިބު ރައީސްވެސް މެއެވެ. ހަމައެއާއެކު، ކަމަލާއަކީ އެމެރިކާގެ ކަޅު ނަސްލުގެ ފުރަތަމަ ނައިބު ރައީސެވެ.