ސްރީ ލަންކާގައި މިހާރު ކުރިއަށްދާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި އަންގާރަ ދުވަހު ރާއްޖެ އާއި ސީޝެލްސް ބައްދަލުކުރި މެޗުގައި ގައުމީ ޓީމުގެ މިޑްފީލްޑަރު އަދި ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) ސީޝެލްސް ކުޅުންތެރިއަކަށް ބޯޅަ ނެތީސް ހަމަލާ ދިނުމަކީ ހިތާމަކުރާ ކަމެއް ކަމަށާއި، އެކަމަކު އޭނާއާ މެދު ފިޔަވަޅު އަޅާނީ ވުޒާރާއިން ނޫން ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފު ވިދާޅުވެއްޖެއެވެ.

އެ މެޗުގައި ސީޝެލްސްއާ ލަނޑެއް ނުޖެހި އެއްވަރުވުމުން ރާއްޖެ ވަނީ މުބާރާތުން ކަޓާފައެވެ. އެ މެޗުގެ އިތުރު ވަގުތުގައި ބަދަލު ކުޅުންތެރިއެއްގެ ގޮތުގައި ކުޅެން އެރި އަޑުބަރޭ ވަނީ ބޯޅަ ނެތީސް ސީޝެލްސް ކެޕްޓަނުގެ މޫނުމަތީގައި ވަރަށް ބާރަށް އުޅަބޮށިން ޖަހާފައެވެ. އެއާއެކު އޭނާއަށް ރެފުރީ ވަނީ ވަގުތުން ރަތް ކާޑެއް ދައްކާފައެވެ.

ބުދަ ދުވަހު ރައްޔިތުންގެ މަޖިލީހުގައި އޮތް ސުވާލުކުރުމުގެ ދަންފަޅީގައި އަޑުބަރޭގެ އެ އަމަލާ ބެހޭގޮތުން ބިލެތްދޫ ދާއިރާގެ މެންބަރު އަދި ގައުމީ ޓީމުގެ ކުރީގެ ޑިފެންޑަރު އަޙްމަދު ހަލީމް (ދޮންބިލެތް) ސުވާލުކުރެއްވުމުން މަޚްލޫފް ވިދާޅުވީ ފުޓްބޯޅަ މެޗަކުން ދިމާވާ ކަމެއްގައި ކުޅިވަރާ ބެހޭ ވަޒީރު ފިޔަވަޅު އެޅުން ވާނީ ޖޯކަކަށް ކަމަށާއި، މިއީ ފީފާ އެޕްރޫވް މުބާރާތަކަށްވާތީ ފިޔަވަޅު އަޅާނީ ފީފާ ނުވަތަ އޭއެފްސީން ކަމަށެވެ. އަދި އަޑުބަރޭ ގައުމީ ޓީމަށް ކުޅެނީ ކުޅިވަރާ ބެހޭ ވުޒާރާ ތަމްސީލުކުރަން ނޫން ކަމަށްވާތީ، އެއީ އެ ވުޒާރާއިން ފިޔަވަޅު އަޅަން ޖެހޭ ކަމެއް ނޫން ކަމަށްވެސް ވިދާޅުވިއެވެ.

އެކަމަކު މަޚްލޫފް ވިދާޅުވީ އެ މެޗުގައި ފެނިގެން ދިޔަ ކަންތަކާ މެދު ހިތާމަކުރައްވާ ކަމަށާއި އެކަން ދިމާވާން މެދުވެރިވި ސަބަބެއް ނޭގޭ ކަމަށެވެ. އެކަމަކު އެއީ ފެނިގެންވާނެ މަންޒަރެއް ނޫން ކަމަށް ގަބޫލުކުރައްވާ ކަމަށްވެސް ވަނީ ވިދާޅުވެފައެވެ.

ފޯ ނޭޝަންސް ކަޕުގައި ފެނިގެންދިޔަ ހުތުރު އަމަލާ ގުޅިގެން އަޑުބަރޭއަށް ފާޑުކިޔުން އަމާޒުވިއިރު، މިދިޔަ މަހު މާލޭގައި ބޭއްވި "އުރީދޫ ސާފް ޗެމްޕިއަންޝިޕް 2021" ގައިވެސް އަޑުބަރޭއަށް ވަނީ ފާޑުކިޔުންތަކެއް އަމާޒުވެފައެވެ. އެގޮތުން މީގެ ކުރިން 2018 ވަނަ އަހަރުގެ މާޗު މަހުގެ ތެރޭގައި ގައުމީ ޓީމުން ރިޓަޔާކުރުމަށްފަހު މިހާރު އުމުރުން 34 އަހަރުގެ އަޑުބަރޭ އަލުން ގައުމީ ޓީމަށް ނެގުމާއެކުވެސް ގިނަ ބަޔަކު ވަނީ ފާޑުކިޔާފައެވެ. އެ ފަހަރު އޭނާ ގައުމީ ޓީމުން ރިޓަޔާކުރީ އޭރުގެ ގައުމީ ޓީމުގެ ކޯޗު ޕީޓަ ސެގާޓުގެ ކުއްލި ނިންމުމަކާ މެދު ހިތްހަމަނުޖެހިގެންނެވެ.

އަޑުބަރޭ އަލުން ގައުމީ ޓީމުގައި ހިމެނިގެން ކުޅެމުން އަންނައިރު، 2018 ވަނަ އަހަރު ކަކުލަށް ލިބުނު އަނިޔާގެ ސަބަބުން ގިނަ ދުވަސްތަކެއް ވަންދެން އޭނާ ކުޅުމާ ދުރުގައި ހުއްޓެވެ. އެއަށްފަހު އަޑުބަރޭ ވަނީ މިދިޔަ ސީޒަނުގެ މެދުތެރެއިން ކުލަބު އީގަލްސްއާ ގުޅެފައެވެ. ސާފް ޗެމްޕިއަންޝިޕުގައި ރާއްޖޭން ކުޅުނު ފުރަތަމަ މެޗުތަކުގައި އަޑުބަރޭ ފުރަތަމަ އެގާރައިގައި ހިމެނި ނަމަވެސް، މިހާރުގެ ކޯޗު އިޓަލީގެ ފްރެންސެސްކޯ މޮރިއޭރޯ މި މުބާރާތުގައި އޭނާ ފުރަތަމަ އެގާރައިގައި ބޭނުންކޮށްފައެއް ނުވެއެވެ.