އަންގްސަން ސޫކީގެ މައްޗަށް އިންތިޚާބުގައި އޮޅުވާލިކަމުގެ ދައުވާވެސް އުފުލައިފި
ސޫކީގެ އިތުރުންވެސް އިތުރު 15 މީހެއްގެ މައްޗަށް ދައުވާ އުފުލާފައިވޭ
އަންގްސަން ސޫކީ / މަގާމުން ދުރުކޮށްފައިވާ މިޔަންމާގެ ލީޑަރު
މަގާމުން ދުރުކޮށްފައިވާ މިޔަންމާގެ ލީޑަރު އަންގްސަން ސޫކީގެ މައްޗަށް އިތުރު ދައުވާތަކެއް ކުރުމަށް އެގައުމުގެ އަސްކަރީ ސަރުކާރުން ނިންމާފައިވާކަން ހާމަކޮށްފައިވަނިކޮށް، އިންތިޚާބުގައި އޮޅުވާލުމުގެ ދައުވާ އުފުލައިފިއެވެ.
އަންގާރަ ދުވަހު ސޫކީގެ މައްޗަށް އިތުރު ދައުވާތަކެއް އުފުލާފައިވާއިރު، ސޫކީގެ އިތުރުންވެސް 15 މީހެއްގެ މައްޗަށް ދައުވާ އުފުލާފައިވެއެވެ. އަލަށް އުފުލި ދައުވާގައި ބުނެފައިވަނީ ނިމިދިޔަ އިންތިޚާބު ސޫކީ ކާމިޔާބު ކުރެއްވީ އޮޅުވާލައިގެން ކަމަށެވެ. އެހެންނަމަވެސް، އިންތިޚާބުގެ ކަންކަން މޮނިޓަރ ކުރެއްވި މިނިވަން އޮބްޒާވަރުން ވަނީ އިންތިޚާބުގެ ކަންކަން ދިޔައީ އެންމެ ފުރިހަމައަށްކަން ފާހަގަ ކުރައްވައި އެ ދައުވާތަކަކީ ސިޔާސީ ދައުވާތަކެއްގެ ގޮތުގައި ސިފަކުރައްވާފައެވެ.
އަދި އޭނާގެ މައްޗަށް ވަނީ، ގާނޫނާ ޚިލާފަށް ވޯކީ ޓޯކީ ރޭޑިއޯ މިޔަންމާއަށް އެތެރެކޮށް ގެންގުޅުމުގެ ދައުވާގެ އިތުރުން، ޑިޒާސްޓަރ މެނޭޖްމަންޓް ގާނޫނުގެ ދަށުން ކޮވިޑާދެކޮޅަށް އަޅާފައިވާ ފިޔަވަޅުތަކާ ޚިލާފުވި ކަމުގެ ދައުވާ ވެސް އުފުލާފައެވެ. މި ދައުވާތައް ކޮށްފައިވަނީ ވެރިރަށް ނައިޕިޓޯގައެވެ.
ޔަންގޮން ކޯޓުގައި، އޭނާގެ މައްޗަށްވަނީ، މިޔަންމާގެ އޮފިޝަލް ސީކްރެޓް ގާނޫނާ ޚިލާފުވުމުގެ ދައުވާވެސް ކޮށްފައެވެ. މި ދައުވާތައް އޭނާގެ މައްޗަށް ސާބިތު ވެއްޖެނަމަ 14 އަހަރު ދުވަހުގެ ޖަލު ހުކުމެއް އަންނާނެއެވެ.
އަންގްސަން ސޫކީގެ ގާނޫނީ ވަކީލުންގެ ޓީމުންވަނީ މި ހުރިހާ ދައުވާތަކަށް ވެސް އިންކާރުކޮށްފައެވެ.
ސޫކީގެ ދަރިންނާއި އަވަހާރަވެފައިވާ ފިރިކަލުންނަކީ، ގައުމުން ބޭރުގެ ރައްޔިތުކަން އޮންނަ ބަޔަކަށް ވާތީ އޭނާއަށް އެގައުމުގެ ރައީސްކަމަށް ވާދަކުރުމުގެ ފުރުސަތުވަނީ ގެއްލިފައެވެ. ބަޣާވާތަކުން ވެރިކަން ބަދަލުކޮށްލުމުގެ ކުރިން އޭނާވަނީ މިޔަންމާގެ ސްޓޭޓް ކައުންސިލަރުކަން އަދާ ކުރައްވާފައެވެ.
