ރާއްޖެ ކަޓުވާލައި ސީޝެލްސް ފައިނަލަށް

ސްރީ ލަންކާގައި މިހާރު ކުރިއަށްދާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި އަންގާރަ ދުވަހު ކުޅުނު މެޗުން ރާއްޖެއާ އެއްވަރުކޮށް ފައިނަލުގެ ފުރަތަމަ ޖާގަ ސީޝެލްސްއިން ހޯދައިފިއެވެ.

ކޮލޮމްބޯގެ ރޭސްކޯސް ސްޓޭޑިއަމުގައި ކުޅުނު މި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މި މެޗަށް ރާއްޖޭން ނުކުތީ ފުރަތަމަ އެގާރައަށް ގިނަ ބަދަލުތަކެއް ގެނެސްގެންނެވެ. އެގޮތުން މި މެޗު ރާއްޖޭން ފަށާފައިވަނީ އިތުބާރު ފޯވާޑް އަލީ އަޝްފާގު (ދަގަނޑޭ) ބެންޗުގައި ބައިންދައިގެންނެވެ. އަދި ރާއްޖޭގެ ފުރަތަމަ އެގާރައިގައި ނާއިޒް ހަސަން (ދާދު) ހިމެނި ނަމަވެސް، މެޗަށް ތައްޔާރުވާން ކުރިއަށްގެންދިޔަ ވާމްއަޕުގައި ލިބުނު އަނިޔާއަކާ ގުޅިގެން ހަސަން ރާއިފު އަޙްމަދު (ހަންނަ) އަށް ވަނީ ފުރުސަތު ދީފައެވެ. މިއީ ގައުމީ ޓީމުގެ ފުރަތަމަ އެގާރައިގައި ހިމެނިގެން ހަންނަ ކުޅުނު ފުރަތަމަ މެޗެވެ. 

މި މެޗުގެ ފުރަތަމަ ހާފުގައި ރާއްޖޭން ރަނގަޅު ކުޅުމެއް ދެއްކިއިރު، މި ހާފުގައި ރާއްޖެއަށް ވަނީ ލަނޑެއް ޖަހަން ރަނގަޅު ދެ ފުރުސަތެއް ލިބިފައެވެ. އެގޮތުން މެޗުގެ 32 ވަނަ މިނެޓުގައި އޭރިއާ ތެރެއިން ހަންނަ ބޮލުން ފޮނުވާލި ހަމަލާއެއް ސީޝެލްސްގެ ގޯލްކީޕަރު ދިފާއުކުރިއިރު، އޭގެ ތިން މިނެޓު ފަހުން އޭރިއާ ތެރެއިން ހުސެއިން ނިހާން (ނިހާޓް) ފޮނުވާލި ހަމަލާއެއް ގޯލު ރޮނގުމަތިން ސަލާމަތްކުރީ ސީޝެލްސްގެ ޑިފެންޑަރުންނެވެ.

މި މެޗުގެ ދެވަނަ ހާފުގައި ސީޝެލްސްއިން ކުޅުން ރަނގަޅުކުރި ނަމަވެސް، މި ހާފުގެ ކުރީކޮޅު ރާއްޖޭގެ އިބްރާހީމް މަހުދީ ހުސެއިން (ފޭދޫ އިއްބެ) އަށް ވަނީ ލަނޑެއް ޖަހަން ހުސް ފުރުސަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން ހުހަށްހުރެ އޭނާ ފޮނުވާލި ހަމަލާ ސީޝެލްސްގެ ގޯލްކީޕަރު ވަނީ ދިފާއުކޮށްފައެވެ. އަދި ރިބައުންސް ބޯޅައިގައި އަސަދުﷲ އަބްދުﷲ ފޮނުވާލި ހަމަލާ ދިޔައީ ގޯލުގެ ހުރަސް ދަނޑި މަތިން ބޭރަށެވެ.

އޭގެ ފަހުން ދެ ޓީމަށްވެސް މި މެޗުގައި ނުރައްކާތެރި ހަމަލާއެއް އުފެއްދިފައި ނުވާއިރު، މެޗުގެ 77 ވަނަ މިނެޓުގައި ސީޝެލްސްގެ ޖުނީނިއޯ މެތިއަޓަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ. އަދި މެޗުގެ އިތުރު ވަގުތުގައި ކުޅެން އެރި ރާއްޖޭގެ އަސްހަދު އަލީ (އަޑުބަރޭ) އަށް ވަނީ ބޯޅަ ނެތިސް ސީޝެލްސް ކުޅުންތެރިއަކަށް ފައުލުކުރުމުން ސީދާ ރަތް ކާޑެއް ދައްކާފައެވެ.

ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމު މި މުބާރާތުގެ ފައިނަލަށްދާއިރު، ތާވަލުގެ އެއްވަނައަށް ސީޝެލްސް ޖެހިލީ ކުޅުނު ތިން މެޗުން ލިބުނު ފަސް ޕޮއިންޓާއެކުއެވެ. ތާވަލުގެ ދެވަނައިގައި މި ވަގުތު އޮތް ބަންގްލަދޭޝަށް ދެ މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް ރާއްޖެއަށް ތިން މެޗުން ލިބުނީ ދެ ޕޮއިންޓެވެ. އަދި ފުލުގައި އޮތް ލަންކާއަށް ދެ މެޗުން ލިބިފައިވަނީ އެންމެ ޕޮއިންޓެކެވެ.

މި މުބާރާތުގެ ފައިނަލަށް ސީޝެލްސް ދަތުރުކުރިއިރު، ފައިނަލުގައި ސީޝެލްސް ވާދަކުރަން ޖެހޭނީ އަންގާރަ ދުވަހުގެރޭ ބަންގްލަދޭޝް އާއި ލަންކާ ބައްދަލުކުރާ މެޗުން މޮޅުވާ ޓީމަކާއެވެ. މިހާރު އޮތް ގޮތުން އެ މެޗު އެއްވަރުކޮށްލައިގެންވެސް ބަންގްލަދޭޝަށް ފައިނަލުގެ ޖާގައެއް ލިބިގެންދާނެއެވެ. އެކަމަކު ލަންކާއަށް ފައިނަލުގެ ޖާގައެއް ލިބޭނީ އެ މެޗުން ބަންގްލަދޭޝް ބަލިކޮށްގެންނެވެ.

އަންނަ ހުކުރު ދުވަހު މި މުބާރާތުގެ ފައިނަލް މެޗު ކުޅޭއިރު، އެ މެޗުގެ ޚާއްސަ މެހެމާނަކީ ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާގެ ރައީސް ޖިއާނީ އިންފަންޓީނޯއެވެ.