ލީބިޔާގެ ކުރީގެ ރައީސް މުޢައްމަރުލް ޤައްޒާފީގެ ދަރިކަލުން ސައިފުލް އިސްލާމް އަލް ޤައްޒާފީ ޑިސެމްބަރ މަހު ލީބިޔާގައި އޮންނަ ރިޔާސީ އިންތިޚާބުގައި ވާދަކުރައްވަން ނިންމަވައިފިއެވެ.
ފާއިތުވި ދިހަ އަހަރު ތެރޭ ފުރަތަމަ ފަހަރަށް ސައިފުލް އިސްލާމް އާންމުންނަށް ފެނިފައިވަނީ އާދިއްތަ ދުވަހު ރިޔާސީ އިންތިޚާބުގައި ވާދަކުރެއްވުމަށް ރަޖިސްޓްރީވެވަޑައިގަތުމުގެ ތެރޭގައި، އިލެކްޝަން ކޮމިޝަންގެ ތެރެއިންނެވެ. ދެކުނުގެ ޓައުނެއް ކަމުގައިވާ ސާބާގައި އިލެކްޝަން ސެންޓަރަށް ވަޑައިގެން އިންތިޚާބުގައި ވާދަކުރުމަށް ބޭނުންވާ ޑޮކިޔުމެންޓްތަކުގައި އޭނާ ވަނީ ސޮއިކުރައްވާފައެވެ.
ސައިފުލް އިސްލާމް ވެގެންދާނީ ކުރިޔަށް އޮތް ރިޔާސީ އިންތިޚާބުގައި ވާދަކުރައްވާ އެންމެ އިސް އެއް ބޭފުޅަކަށެވެ. މީގެއިތުރުން ދެން އިންތިޚާބުގައި ވާދަކުރައްވަނީ އިރުމަތީ އަސްކަރިއްޔާގެ ކޮމާންޑަރ ޚަލީފާ ހަފްތާރު، ބޮޑުވަޒީރު ޢަބްދުލްޙާމިދު އަލް ބެއިބާ، އަދި ގާނޫނު ހަދާ މަޖިލީހުގެ ރައީސް އަގުއިލާ ސަލާހްއެވެ.
2011 ވަނަ އަހަރު ޤައްޒާފީގެ ވެރިކަން ނިމުމާ ހަމައަށް ސައިފުލް އިސްލާމް ވަނީ ލީބިޔާގެ ސިޔާސަތުތައް ބައްޓަންކުރުމުގައި ފެނިގެންގޮސްފައެވެ. ނަމަވެސް ޤައްޒާފީގެ ވެރިކަން ނިމުމަކަށް އައުމަށްފަހު ފާއިތުވި ދުވަސްތަކުގައި ސައިފުލް އިސްލާމް ފެނިފައިވަނީ ވަރަށްވެސް މަދުންނެވެ. އެންމެފަހުން ސައިފް ފެނިފައިވަނީ ވީޑިއޯއަކުންނެވެ. އެއީ ޓްރިޕޮލީގެ ކޯޓަކުން އޭނާއަށް މަރުގެ ހުކުން އިއްވުމުގެ ކުރިންނެވެ.
އެހުކުމަށްފަހުވެސް ސައިފް، ޒިންޓަން ސަރަހައްދުގެ ފަރުބަދަތައް ދޫކޮށް ގޮސްފައެއްނުވެއެވެ.
ސައިފްގެ ކެންޑިޑެންސީ ގަބޫލުކުރުމާމެދު ވެސް އަންނަނީ ސުވާލުތަކެއް އުފައްދަމުންނެވެ. އެގޮތުން ލީބިޔާގެ އަސްކަރީ ޕްރޮސެކިޔުޓަރ ވަނީ، އިލެކްޝަން ކޮމިޝަނަށް ސައިފްގެ ކެންޑިޑެންސީ ބަލައިގަތުން މަޑުޖައްސާލުމަށް އަންގާފައިކަމަށް ލީބިޔާގެ ސަރުކާރުގެ ޑިފެންސް މިނިސްޓްރީން ބުނެއެވެ.
ލީބިޔާގައި ރިޔާސީ އިންތިޚާބު ބޭއްވުމަށް ހަމަޖެހިފައިވަނީ ޑިސެމްބަރ މަހުގެ 24 ވަނަ ދުވަހުއެވެ. ލީބިޔާގައި އުފެދިފައިވާ އެކި ފެކްޝަންތަކުގެ މެދުގައި އިންތިޚާބުގެ ކަންކަން ކުރިޔަށްދާނެ ގޮތަކާއި، ވާދަކުރެވޭނެ މީހުން އަދިވެސް ކަނޑައަޅާފައެއްނުވެއެވެ. ހުކުރު ދުވަހު ޕެރިސްގައި ކުރިޔަށް ގެންދިޔަ ކޮންފަރެންސްގައި އެއްބަސްވެފައިވަނީ ވޯޓަށް ހުރަސް އަޅާ ކޮންމެ ބަޔަކަށްވެސް ދަތިކުރުމުގެ ފިޔަވަޅުތައް އެޅުމަށެވެ. ނަމަވެސް އަދިވެސް ސަރުކާރު ހިންގާނެ ބަޔަކާއި ރައީސް ކަމަށް ވާދަކުރެވޭނެ މީހުން ކަނޑައެޅުމުގައި އެއްބަސްވުމަކާ ހަމައަށް އާދެވިފައެއްނުވެެވެ.
