މީގެ ކުރިން ބާސެލޯނާއަށް ކުޅުނު ސްޕެއިނުގެ ތަޖުރިބާކާރު މިޑްފީލްޑަރު ތިއާގޯ އަލްކަންޓާރާ އަލުން އަނބުރާ އެ ޓީމަށް ގެންދަން ބާސާގެ އައު ކޯޗު ޒަވީ ހެނާންޑޭޒް ބޭނުންވާ ކަމަށް ރިޕޯޓުތައް ބުނެފިއެވެ.

ދާދި ފަހުން ބާސާއިން ވަނީ ޒަވީގެ އެދުމުގެ މަތިން މީގެ ކުރިން އެ ޓީމަށް ކުޅުނު ބްރެޒިލުގެ ތަޖުރިބާކާރު ޑިފެންޑަރު ޑެނީ އަލްވޭސްގެ ސޮއި ހޯދާފައެވެ. ރިޕޯޓުތައް ބުނާ ގޮތުން އަލްވޭސް ގެންނަން ޒަވީ ބޭނުންވި އެންމެ ބޮޑު ސަބަބަކީ އެ ކުލަބުގެ އެންމެ ކާމިޔާބު ދުވަސްވަރު ޓީމަށް ކުޅުނު ކުޅުންތެރިއަކު އަލުން ގެނެސް، މިހާރު އޮތް ޒުވާން ސްކޮޑަށް ނަމޫނާ ދައްކާނެ ލީޑަރެއް ހޯދުމުގެ ބޭނުމުގައި ކަމަށެވެ.

ސްޕެއިނުގެ މީޑިއާ ރިޕޯޓުތައް ބުނާ ގޮތުން ޒަވީ ދެން ބޭނުންވާ ކުޅުންތެރިއަކީ މިހާރު ލިވަޕޫލަށް ކުޅެމުން އަންނަ މިޑްފީލްޑަރު ތިއާގޯއެވެ. ބާސާއިން 2009 ވަނަ އަހަރު ސީނިއާ ކެރިއަރު ފެށި ތިއާގޯ ވަނީ 2013 ވަނަ އަހަރާ ހަމައަށް އެ ޓީމަށް ކުޅެފައެވެ. އެހެންކަމުން އުމުރުން މިހާރު 41 އަހަރުގެ ޒަވީ އާއި އުމުރުން 30 އަހަރުގެ ތިއާގޯ އަކީ މީގެ ކުރިން އެކުގައި ބާސާއަށް ކުޅުނު ދެ ކުޅުންތެރިންނެވެ.

މީގެ ކުރިން ބާސާއަށް ކުޅެދިން 101 މެޗުގައި ތިއާގޯ 11 ލަނޑު ޖަހާފައިވާއިރު، އޭނާ ވަނީ ބާސާއާއެކު 10 ތަށި ކާމިޔާބުކޮށްފައެވެ. އޭގެ ތެރޭގައި ސްޕެނިޝް ލީގު ހަތަރު ފަހަރު އަދި ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކާމިޔާބުކުރުން ހިމެނެއެވެ.

ބާސާއަށް ކުޅުމަށްފަހު 2013 ވަނަ އަހަރު ތިއާގޯ ބަދަލުވީ ބަޔާން މިއުނިކަށެވެ. އަދި އެ ޓީމުގައި ކާމިޔާބު ހަތް ސީޒަން ހޭދަކުރުމަށްފަހު، މިދިޔަ އަހަރު ތިއާގޯ ވަނީ ލިވަޕޫލަށް ބަދަލުވެފައެވެ. އެކަމަކު ލިވަޕޫލަށް ބަދަލުވި ފަހުން ތިއާގޯއަށް އަނިޔާގެ ގިނަ މައްސަލަތަކެއް ކުރިމަތިވެފައިވާއިރު، އޭނާއަށް އެ ޓީމުގައި އެންމެ އެދެވޭ ކުޅުމެއް އަދި މިހާތަނަށް ދެއްކިފައެއް ނުވެއެވެ.