ބަންގްލަދޭޝް އަތްދަށުވެ ރާއްޖެއަށް އަމިއްލަ ބާރު ގެއްލިއްޖެ

ސްރީ ލަންކާގައި ކުރިއަށްދާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި ކުޅުނު ދެވަނަ މެޗުން ބަންގްލަދޭޝް އަތުން ބަލިވެ ފައިނަލުގެ ޖާގައެއް ހޯދުމަށް ރާއްޖެއަށް ހުރަސްތަކެއް ކުރިމަތިވެއްޖެއެވެ.

ކޮލޮމްބޯގެ ރޭސްކޯސް ސްޓޭޑިއަމުގައި ކުޅުނު މި މެޗުން ބަންގްލަދޭޝް މޮޅުވީ 2-1 ގެ ނަތީޖާއަކުންނެވެ. މިއީ ފާއިތުވި 18 އަހަރު ތެރޭގައި ބަންގްލަދޭޝްއިން ރާއްޖެ ބަލިކުރި ފުރަތަމަ ފަހަރެވެ.

މި މެޗުގެ ފުރަތަމަ ހާފު ފަށައިގެން ބަންގްލަދޭޝްއިން ރަނގަޅު ކުޅުމެއް ދެއްކިއިރު، މެޗުގެ 12 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ރާއްޖޭގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި މި ލަނޑު ބަންގްލަދޭޝްއަށް ކާމިޔާބުކޮށްދިނީ އެ ޓީމުގެ ކެޕްޓަން ޖަމާލް ބުޔާނެވެ. އެ ލަނޑު ޖެހިއިރު ބުޔާން އޮފްސައިޑުގައި ހުރި ކަމަށް ނިންމައި ލައިންސްމަން ދިދަ ނެގި ނަމަވެސް، ލައިންސްމަނާ މަޝްވަރާކުރުމަށްފަހު ރެފުރީ ވަނީ އެއީ ރަނގަޅު ލަނޑެއް ކަމަށް ނިންމާފައެވެ.

އެކަމަކު ފުރަތަމަ ހާފު ނިމުމުގެ ކުރިން ރާއްޖޭން ވަނީ މި މެޗުގައި ނަތީޖާ އެއްވަރުކޮށްފައެވެ. މެޗުގެ 32 ވަނަ މިނެޓުގައި ކޯނަރަކުން ކެޕްޓަން އަކުރަމް އަބްދުލް ޣަނީ ތަނަވަސްކޮށްދިން ފުރުސަތަކުން މި ލަނޑު ރާއްޖެއަށް ކާމިޔާބުކޮށްދިނީ މިޑްފީލްޑަރު މުޙައްމަދު އުމެއިރެވެ.

މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ބަންގްލަދޭޝްއިން އަލުން ލީޑު ނަގާފައިވަނީ މެޗު ނިމެން ދެ މިނެޓަށް ވެފައި ވަނިކޮށެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޓޯޕޫ ބަރްމަންއެވެ. މިއީ އޭރިއާ ތެރެއިން ބަންގްލަދޭޝްގެ ޖެވެލް ރާބާއަށް ރާއްޖޭގެ ޒުވާން ގޯލްކީޕަރު ނާޖިހު އަލީ (ނާޖީ) ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުން ރާއްޖެ ބަލިވިއިރު، މި މުބާރާތުގައި ކުޅުނު ފުރަތަމަ މެޗުން ރާއްޖެ ވަނީ ލަންކާއާ 4-4 ގެ ނަތީޖާއަކުން އެއްވަރުވެފައެވެ. އެ މެޗުގައި ލަންކާއިން ރާއްޖެއާ އެއްވަރުކުރީ، ރާއްޖޭން ހަތަރު ލަނޑުގެ ލީޑެއް ނަގާފައި ވަނިކޮށެވެ.

ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމު ފައިނަލަށްދާއިރު، ރާއްޖެ މި ވަގުތު އޮތީ ތާވަލުގެ ފުލުގައި ކުޅުނު ދެ މެޗުން ލިބުނު އެންމެ ޕޮއިންޓާއެކުއެވެ. ތާވަލުގެ އެއްވަނައިގައި އޮތް ބަންގްލަދޭޝްއަށް ދެ މެޗުން ވަނީ ހަތަރު ޕޮއިންޓް ލިބިފައެވެ. އަދި ދެވަނައިގައި އޮތް ލަންކާ އާއި، ތިންވަނައިގައި އޮތް ސީޝެލްސްއަށްވެސް އެއް ޕޮއިންޓް ލިބިފައިވާއިރު، އެ ދެ ޓީމު މިހާތަނަށް ކުޅެފައިވަނީ އެންމެ މެޗެކެވެ.

ބަންގްލަދޭޝް އަތުން ބަލިވެ ފައިނަލުގެ ޖާގައެއް ހޯދުމަށް ރާއްޖެއަށް ހުރަސްތަކެއް ކުރިމަތިވިއިރު، މި މުބާރާތުގެ ލީގު ބުރުގެ ފަހު މެޗުގައި އަންނަ އަންގާރަ ދުވަހު ރާއްޖެ ބައްދަލުކުރާނީ ސީޝެލްސްއާއެވެ. ފައިނަލުގެ ޖާގައެއް ހޯދުމުގެ އަމިއްލަ ބާރު ރާއްޖެއަށް ގެއްލިފައިވާއިރު، އެ މެޗުން މޮޅުވުން ރާއްޖެއަށް މަޖުބޫރެވެ.