ސިވިލް ސަރވެންޓުންނަކީ އެމީހަކު ގަބޫލުކުރާ ސިޔާސީ ފިކުރެއްގައި ދެމިހުރެވޭނެ މިނިވަނެއް - ރައީސް
10 ނޮވެމްބަރު 2021 | ބުދަ 17:42ސިވިލް ސަރވެންޓުންނަކީ ސިޔާސީ މަސައްކަތުގައި ވަކި ބަޔަކަށް ގުލާނުކޮއްދިނުން މަޖުބޫރު ސިޔާސީ ބައެއް ނޫން
ޖުމްހޫރީ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ރައީސް ވާހަކަފުޅުދައްކަވަނީ
ސިވިލްސަރވަންޓުންނަކީ އެމީހަކު ގަބޫލުކުރާ ސިޔާސީ ފިކުރެއްގައި ދެމިހުރެވޭނެ މިނިވަނެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެވެ.
ސިވިލް ސަރވިސް ގަވާއިދުގައިވާ މުވައްޒަފުން ސިޔާސީ މަސައްކަތްކުރާނަމަ ވަޒީފާއިން ވަކިކުރާ މައްދާ އިތުރަށް ތަފްސީލު ކުރުމާއި ގުޅިގެން އެކަމުގެ ފާޑުކިއުންތައް އަމާޒުވެފައިވާ މި ދަނޑިވަޅުގައި ޖުމްހޫރީ ދުވަހުގެ މުނާސަބަތުގައި ގައުމާއި މުހާތަބު ކުރައްވާ ރައީސް ސޯލިހު ވިދާޅުވީ ވަކި ސިޔާސީ ފިކުރަކުން މަޖުބޫރު ކުރެވޭ ސިވިލް ސަރވެންޓެއް ރާއްޖޭގައި ހުންނާކަށް އެދިވަޑައިނުގަންނަވާ ކަމަށެވެ.
އަދި ސިޔާސީ ވަކިކަމެއްގައި ނޫޅެގެން ފިޔަވަޅު އެޅި، އެކަހެރި ކުރެވި، މަގާމުން ވަކި ކުރުމުގެ ފުރުޞަތު އޮވެގެން ނުވާނެ ކަމަށެވެ. ރައީސް ވިދާޅުވީ ސިވިލްސަރވަންޓުންނަކީ އެމީހަކު ގަބޫލުކުރާ ސިޔާސީ ފިކުރެއްގައި ދެމިހުރެވޭނެ މިނިވަނެއް ކަމަށެވެ. އެއީ ސިޔާސީ މަސައްކަތުގައި ވަކި ބަޔަކަށް ގުލާނުކޮއްދިނުން މަޖުބޫރު ސިޔާސީ ބައެއް ނޫން ކަމަށެވެ.
ސިވިލް ސަރވިސް ކޮމިޝަނުން ބުނެފައިވަނީ ސިޔާސީ ކަންކަމުގައި ބައިވެރިވެގެން ވަޒީފާއިން ވަކިކުރާ ގޮތަށް ނިންމާފައިވަނީ ކުރިން ހަދާފައި އޮތް ގަވާއިދުގައި ކަމަށާއި، ނަމަވެސް ގާނޫނުގައިވާ ގޮތަށް އެއަށް ބަދަލު ގެނެސް މުވައްޒަފުންނަށް ވަޒީފާގެ ބިރުވެރިކަމެއް ނެތި އުޅެވޭނެ ގޮތަށް ގަވާއިދަށް ބަދަލު ގެނެސްފައިވާ ކަމަށް އެ ކޮމިޝަނުން ބުނެއެވެ.
ސިޔާސީ ކަންކަމުގައި ބައިވެރިވެގެން ސިވިލް މުވައްޒަފުން ވަޒީފާއިން ވަކިކުރަން ގާނޫނުގައި ހިމެނީ 2014 ވަނަ އަހަރު، ކުރީގެ ރައީސް ޢަބްދުﷲ ޔާމީންގެ ވެރިކަމުގައެވެ. ސިވިލްސަރވިސްގެ ގާނޫނަށް ބަދަލު ގެނެސް, އޭރު ސަރުކާރާ ދެކޮޅު ސިޔާސީ ހަރަކާތްތަކުގައި ބައިވެރިވި މުވައްޒަފުން ވަޒީފާއިން ވަކިކުރަމުން ގެންދިޔައެވެ. އަދި ގަވާއިދުގައި ބުނެފައިވަނީ، އެ ގަވާއިދާ ޚިލާފަށް ސިޔާސީ ހަރަކާތެއް ހިންގުން ނުވަތަ ބައިވެރިވުން ކަމުގައި ބުނެފައިވެއެވެ.
އަދި މި ގަވާއިދުގެ ދަށުން, ސަރުކާރާ ދެކޮޅު ނުވަތަ ސަރުކާރުގެ ވެރިކަން ކުރި ޕާޓީގެ ޚިޔާލާ ތަފާތު ޚިޔާލު ގެންގުޅުނު މުވައްޒަފުން ވަޒީފާއިން ވަކިކުރަމުން ގެންދިޔައެވެ. މިއީ 1 ވަނަ ދަރަޖައިގެ ކުށެއްގެ ގޮތުގައި ވަނީ ހިމަނާފައެވެ.
ނަމަވެސް ނަމަވެސް އަލުން ގަވާއިދަށް އިސްލާހު ގެނެސް ގާނޫނުގައި ބުނާ ގޮތަށް އެބައި ވަނީ ތަފްސީލުކޮށްދީފައެވެ. އަލުން ގެޒެޓް ކުރި ގަވާއިދުގައި ބުނެފައިވަނީ ސިވިލް ސަރވިސް މުވައްޒަފަކު އޭނާ ރަސްމީ މަސައްކަތުގެ ގަޑީގައި, އަދި ރަސްމީ މަސައްކަތާ ގުޅުންހުރި އެހެންކަމެއްގައި އުޅެނިކޮށް ސިޔާސީ މަސައްކަތް ނުކުރެވޭނެ ކަމަށެވެ. ނަމަވެސް ރަސްމީ މަސައްކަތާއި ރަސްމީ މަސައްކަތާ ގުޅުންހުރި ގަޑިތައް ނޫން އެހެން ގަޑިތަކުގައި އެ މުވައްޒަފަކަށް ސިޔާސީ ޚިޔާލު ފާޅުކުރުމާއި ސިޔާސީ ކަންކަމުގައި ބައިވެރިވެވޭނެ ކަމަށެވެ. އަދި ރަސްމީކަންކަމުގައި ފިޔަވައި އެހެން ވަގުތަކު މުވައްޒަފަކު ސިޔާސީ ހަރަކާތެއްގައި އުޅެގެން ވަޒީފާއިން ވަކި ނުކުރާނެ ކަމަށެވެ.
މިހާރު ގެނެވިފައިވާ ބަދަލުތަކަކީ މުވައްޒަފުން ކުރާ ކުށްތަކަށް އިސްލާހީ ފިޔަވަޅު އެޅުމުގައި ހަރުދަނާ ކަމާއެކު، ވަކި ނިޒާމެއްގެ ތެރެއިން ފިޔަވަޅު އެޅުމާއި، މުވައްޒަފުންނަށް ވާނުވާ ނޭނގޭ ގޮތަށް ކުދި ކުދި ކުށްތަކަށްވެސް އާދައިގެ ފިޔަވަޅު ނޭޅޭނެކަން ކަށަވަރުކޮށްދީ، އިދާރާތައް އަދި އިދާރާތަކުގެ ސިވިލް ސަރވިސްގެ ވެރިން ޒިންމާދާރު ކުރުވުމުގެ ގޮތުން ގެނެވިފައިވާ މުހިންމު ބަދަލުތަކެކެވެ. އަދި މުވައްޒަފުންގެ ހައްގުތައް ކަށަވަރުކޮށްދީ، އިންސާފުން މުވައްޒަފުންނާ މެދު ޢަމަލުކުރެވޭކަން މި ގަވާއިދުން ކަށަވަރުކޮށްދެއެވެ.
