އެއަރޕޯޓްގެ އައު އެޕްރޯން ހުޅުވައިފި
4 ނޮވެމްބަރު 2021 | ބުރާސްފަތި 13:27ވަގުތު ސަލާމަތްވުމުގެ އިތުރުން ޚިދުމަތް ހޯދާ ފަރާތްތަކަށް ވަރަށް ބޮޑު ލުއިފަސޭހަތަކެއް ލިބިގެންދާނެ
އެއަރޕޯޓްގެ އައު އެޕްރޯން ހުޅުވުން
ވެލާނާ އިންޓަރނޭޝަނަލް އެއަރޕޯޓްގެ އައު އެޕްރޯން ބުރާސްފަތި ދުވަހު ރަސްމީކޮށް ހުޅުވައިފިއެވެ.
މިއެޕްރޯން ތަރައްގީކުރުމުގެ މަސައްކަތް ފެށުނީ 2019 ވަނަ އަހަރުއެވެ. އެއަށްފަހު އެޕްރޯންގެ ބައިތައް ހުޅުވަމުންގޮސް މިހާރު މިވަނީ މުޅި އެޕްރޯން އެއްކޮށް ނިންމުމަށްފަހު ރަސްމީކޮށް ހުޅުވާލާފައެވެ.
އައު އެޕްރޯން ރަސްމީކޮށް ހުޅުވުމަށްފަހު ވާހަކަ ދައްކަވަމުން އެމްއޭސީއެލްގެ ސީއީއޯ ހޯޑެން އެންޑްރޫ ސްޓޭވާރޓް ވިދާޅުވީ, މިއެޕްރޯން ހުޅުވުމާއެކު ޚިދުމަތް ދިނުމުގައި ވަގުތު ސަލާމަތްވުމުގެ އިތުރުން ޚިދުމަތް ހޯދާ ފަރާތްތަކަށް ވަރަށް ބޮޑު ލުއިފަސޭހަތަކެއް ލިބިގެންދާނެ ކަމަށެވެ.
އެންޑްރޫ އިތުރަށް ވިދާޅުވީ މިއެޕްރޯންގައި ބޭނުންކުރާ ޒަމާނީ ވަސީލަތްތަކާއެކު ޚިދުމަތުގެ ފެންވަރުވެސް ރަނގަޅުވެގެންދާނެ ކަމަށެވެ. އަދި ކުރިއަށް އޮތީ ފަތުރުވެރިކަމުގެ އެންމެ ތިޔާގި ދުވަސްވަރު ކަމަށްވާތީ ޚިދުމަތްތައް ރަނގަޅު ކުރުމަށްޓަކައި އިތުރު މުއައްޒަފުންނާއި ވަސީލަތްތައް ހޯދަމުން އަންނަ ކަމަށްވެސް އެންޑްރޫ ވިދާޅުވިއެވެ.
މިގެނެެވޭ ބަދަލުތަކާއެކު ދަތުރުތައް ގަޑިއަށް ފެށުމަށް ވަރަށް ބޮޑުތަން ފަސޭހަވެގެންދާނެއެވެ. މިއާއެކު ފްލައިޓް ޑިލޭވެގެން ދިމާވާ ދަތިތަކަށް ހައްލު ލިބިގެންދާނެއެވެ.
