މިލަންދޫ އެއާޕޯޓަށް ބޭނުންވާ ބިން ހިއްކުމުގެ މަސައްކަތް މިމަހުގެ 3 ވަނަ ދުވަހު ފަށައި، 6 ވަނަ ދުވަހު ހުއްޓާލައިފި
ށ. މިލަންދޫ އެއާޕޯޓަށް ބޭނުންވާ ބިން ހިއްކުމުގެ މަސައްކަތް ފެށިތާ ތިން ދުވަސް ތެރޭގައި ހުއްޓިފައިވާތީ، އެ ރަށު ކައުންސިލާއި ރައްޔިތުން ވެސް ދަނީ ކަންބޮޑުވުން ފާޅު ކުރަމުން. މި މަޝްރޫއުގެ ނިމިފައި ވަނީ އަދި އެންމެ ތިން އިންސައްތަ މަސައްކަތް ކަމަށާއި، މަސައްކަތް ހުއްޓާލާފައިވަނީ އިންތިޚާބުތަކުން ސަރުކާރަށް ލިބުނު ނަތީޖާއާ ގުޅިގެން ކަމަށް ކައުންސިލުން ތުހުމަތުކުރޭ. މުޅި މަޝްރޫއު 30 މަސް ދުވަހުގެ ތެރޭގައި ނިންމަވާނެ ކަމަށް ރައީސް މުއިއްޒު ވައުދުވެވަޑައިގެންފައިވީ ނަމަވެސް، މިހާރު އެއްވެސް މަސައްކަތެއް ކުރިއަށް ނުދޭ.
މިލަންދޫ އެއާޕޯޓަށް ބޭނުންވާ ބިން ހިއްކުމުގެ މަސައްކަތް މިމަހުގެ 3 ދުވަހު ފަށައި، 6 ވަނަ ދުވަހު ވަނީ ހުއްޓާލާފައި. މިމަޝްރޫއު ހަވާލުކޮށްފައިވަނީ އެމްއޭސީއެލްއާ. | ރައީސް އޮފީސް
އޭޕްރީލް މަހުގެ 4 ވަނަ ދުވަހު ބޭއްވި ތިން އިންތިޚާބާ ދިމާކޮށް ށ. މިލަންދޫ އެއާޕޯޓަށް ބޭނުންވާ ބިން ހިއްކުމުގެ އަމަލީ މަސައްކަތް ފެށުމަށް ފަހު މިހާރު އެމަސައްކަތް ކުރިއަށް ނުދާ ކަމަށް އެރަށުގެ ކައުންސިލުން ބުނެފި އެވެ.
ރާއްޖެއެމްވީ އަށް މިލަންދޫ ކައުންސިލްގެ މެންބަރު އަހުމަދު ޝިޔާމް ވިދާޅުވީ އެރަށުގެ އެއަރޕޯޓަށް ބޭނުންވާ ބިން ހިއްކުމުގެ މަޝްރޫއުގެ އަމަލީ މަސައްކަތް 3 އޭޕްރީލް 2026 ވަނަ ދުުވަހު ފެށި ކަމަށާއި، ނަމަވެސް 6 އޭޕްރީލް 2026 ވަނަ ދުވަހު އަމަލީ މަސައްކަތް ހުއްޓިފައިވާ ކަަމަށެވެ. އޭގެފަހުން މިއަދާ ހަމައަށް އެއްވެސް މަސައްކަތެއް ކުރިއަށް ނުދާ ކަމަށް އޭނާ ވިދާޅުވި އެވެ.
މަސައްކަތް ކުރިއަށް ގޮސްފައިވާ ހިސާބަށް އިޝާރާތް ކުރައްވައި ޝިޔާމް ވިދާޅުވީ ގާތްގަނޑަކަށް ކުރިއަށް ދިޔައީ 3 އިންސައްތާގެ މަސައްކަތް ކަމަށެވެ.
މީގެ އިތުރުން ޝިޔާމް ވިދާޅުވީ އެރޕޯޓަށް ބޭނުންވާ ބިން ހިއްކުމުގެ މަސައްކަތް ފެށީ ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބާ ގުޅިގެން ކަމަށާއި، މި ތިން އިންތިޚާބުގައި ވެސް އެރަށުން ސަރުކާރަށް ލިބުނީ ލަދުވެތި ދެރަ ނަތީޖާއެއް ކަމަށެވެ. އަދި ވިދާޅުވީ އިންތިޚާބުގެ ނަތީޖާ އައިގޮތުން މަޝްރޫއު ހުއްޓާލީ ކަމަށް ބެލެވޭ ކަމަށެވެ.
15 އޮކްޓޫބަރު 2025 ގައި ވެސް މިލަންދޫގައި އެއާޕޯޓު އެޅުމުގެ މަޝްރޫއު މޯލްޑިވްސް އެއާޕޯޓްސް ކޮމްޕެނީއާ ހަވާލުކޮށް، އަމަލީ މަސައްކަތް ފަށާފައިވެ އެވެ.
އެ ދުވަހު ރައީސް ޑރ. މުހައްމަދު މުއިއްޒު އެރަށަށް ވަޑައިގަންނަވައި ވިދާޅުވީ، އެމްއޭސީއެލްއާ އެއާޕޯޓު އެޅުމުގެ މަޝްރޫއު ހަވާލުކުރީ 40 ހެކްޓަރުގެ ބިން ހިއްކައި، ބަނދަރު ބަދަލު ކުރުމާ ވެސް އެކުގައި ކަމަށެވެ.
އެގޮތުން ބިން ހިއްކުމުގެ މަސައްކަތް އެދުވަހުން ފެށިގެން އެންމެ ގިނަވެގެން 8 މަސް ދުވަހުގެ ތެރޭގައި ނިމޭނެ ކަމަށާއި މިއަދުން ފެށިގެން އެންމެ ގިނަވެގެން 30 މަސް ދުވަހުގެ ތެރޭގައި އެއާޕޯޓުގެ މުޅި މަޝްރޫއު ނިމޭނެ ކަމަށް ރައީސް މުއިއްޒު ވިދާޅުވި އެވެ.
އާދެ. ބިން ހިއްކުމުގެ އަމަލީ މަސައްކަތް މިއަދުން ފެށިގެން އެންމެ ގިނަވެގެން ވެސް އަށް މަސް ދުވަހުގެ ތެރޭގައި ނިމިގެންދާނެ. މިއަދުން ފެށިގެން 30 މަސް ދުވަހުގެ ތެރޭގައި، މާނައަކީ ދެ އަހަރާއި ބައި އެންމެ ގިނަވެގެން ވެގެންދާނީ މި އެއާޕޯޓު ނިންމަން. އެހެންވީމަ މިއަދުން ފެށިގެން އެންމެ ގިނަވެގެން 30 މަސް ދުވަހުގެ ތެރޭގައި މިދެންނެވި ބަނދަރު ބަދަލު ކުރުމާއި އާ ބަނދަރު ހެދުން ވެސް ހިމެނޭ ގޮތަށް މި ރަށުގައި އެއާޕޯޓު ހަދާ އިރާދަކުރެއްވިއްޔާ ނިންމާ ހުޅުވާނަން.މިލަންދޫ ކައުންސިލްގެ މެންބަރު އަހުމަދު ޝިޔާމް
ރައީސް މުއިއްޒު ވައުދުވެވަޑައިގެންނެވި ގޮތަށް އެއާޕޯޓުގެ މަޝްރޫއާއެކު، ތަރައްގީގެ އެހެނިހެން މަޝްރޫއުތައް ވެސް ކުރިއަށް ނުގެންދާތީ އެރަށުގެ ރައްޔިތުން ދަނީ ކަންބޮޑުވުން ފާޅު ކުރަމުންނެވެ. މިލަންދޫ އެއާޕޯޓަކީ އެ ރަށަށް ވި އެންމެ ބޮޑު ވައުދު ކަމަށް ވާއިރު، އެއީ އެ ރަށާއި އެ ސަރަހައްދަށް ތަރައްގީ ގެނައުމަށް ވަރަށް މުހިންމު މަޝްރޫއެކެވެ.
