އައު ޓަރމިނަލާއެކު އިތުރު އެއަރލައިންތަކަށް ޖާގަ އޮތް ނަމަވެސް، މި ޕީކް ސީޒަނުގައި އައު ފްލައިޓެއް ނާދޭ: މެންބަރު ދީދީ
ދީދީ ފާހަގަކުރެއްވި ގޮތުގައި، ވެލާނާ އިންޓަނޭޝަނަލް އެއަރޕޯޓުގެ އާ ޓަރމިނަލް ހުޅުވުނު ނަމަވެސް، މި އަހަރުގެ ފަތުރުވެރިކަމުގެ ކަނޑައެޅިފައިވާ ޕީކް ސީޒަނުގައި އިތުރު ފްލައިޓްތަކެއް އޮޕަރޭޓްކުރާ ތަނެއް ނުފެނޭ. އަދި އެއަރޕޯޓް އިސްތިހާރުކޮށް ކުރިއެރުވުމަށް ސަރުކާރުން އެކަށީގެންވާ މަސައްކަތްތަކެއް ނުކުރާކަން އޭނާ ފާހަގަކުރެއްވި.
މަރަދޫ ދާއިރާގެ މެމްބަރު އަހުމަދު ދީދީ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަނީ | ރާއްޖެ އެމްވީ
ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލާއެކު ޚިދުމަތުގެ ޖާގަ ތަނަވަސްވެފައިވީ ނަމަވެސް، 2026 ވަނަ އަހަރުގެ ފަތުރުވެރިކަމުގެ ޕީކް ސީޒަން ގައި ރާއްޖެއަށް އައު ފްލައިޓެއް ޖައްސާފައި ނުވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދު ދީދީ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން މެންބަރު ފާހަގަކުރެއްވި ގޮތުގައި، މިދިޔަ ޖުލައި 26 ވަނަ ދުވަހު ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލް ޒަމާނީ ފެންވަރަށް ތަރައްގީކޮށް ހުޅުވި ނަމަވެސް، އެއަރޕޯޓު ހިންގުމުގެ ޚަރަދުތައް ނުވަތަ އޮޕަރޭޝަނަލް ކޯސްޓް ވަނީ ބޮޑުތަނުން އިތުރުވެފަ އެވެ.
އެގޮތުން ހިންގުމުގެ ޚަރަދު 30 އިންސައްތަ އާއި 40 އިންސައްތައަށް އުފުލިފައިވާއިރު، އާމްދަނީ އިތުރު ނުކޮށް އެއަރޕޯޓް ދެމެހެއްޓެނިވި ގޮތެއްގައި ނުހިންގޭނެ ކަމަށް މެންބަރު ދީދީ ފާހަގަކުރެއްވި އެވެ. އެހެން ނަމަވެސް، އެފަދަ އެއްވެސް މަސައްކަތެއް މި ސަރުކާރުން ކުރަމުން ނުދާކަމަށް ދީދީ ވިދާޅުވިއެވެ.
މިދިޔަ އަހަރު ޖުލައި 26 ގައި ހުޅުވުނު އެއަރޕޯޓުގެ މި އަހަރުގެ މި ސީޒަން، ފެށިގެން މިހާރު ޕީކް ސީޒަން ގެ މެދުތެރޭގަ މިއޮތީ. ފެބްރުއަރީ އިން ގޮސް އީސްޓަރ އާ ހިސާބަށް ޕީކް ސީޒަން ކަމަށް މި ބަލަނީ. އިތުރު ފްލައިޓެއް، މިދިޔަ އަހަރުގެ ޕީކް ސީޒަނުގަ ނުޖައްސާ އިތުރު ފްލައިޓެއް މި އަހަރު ޖެއްސި ކަމަކަށް ނުވޭ. އެކަމަކު ބޮޑުތަނުން އެއަރޕޯޓް ފެސިލިޓީ ބޮޑު ވެއްޖެ. ކެޕޭސިޓީ ބޮޑު ވެއްޖެ.ރައްޔިތުންގެ މަޖިލީހުގެ މަރަދޫ ދާއިރާ ގެ މެންބަރު އަހްމަދު ދީދީ
މީގެ އިތުރުން، އެއަރޕޯޓުގެ ޚިދުމަތްތަކުގެ ފެންވަރު ރަނގަޅުކޮށް، އެތަން ޒަމާނީ ފެންވަރަށް ތަރައްގީކުރެވިފައިވާ ކަމަށް ދީދީ ފާހަގަކުރެއްވި އެވެ. އަދި އިތުރު އެއަރލައިންތަކަށް ޚިދުމަތް ދެވޭނެ ފަދަ ޖާގަ އެތަނުގައި އޮތް ނަމަވެސް، ސަރުކާރުން އެ ވަސީލަތްތަކުގެ ބޭނުން އެންމެ އެދެވޭ ގޮތެއްގައި ހިފަމުން ނުދާކަން މެންބަރު ވިދާޅުވި އެވެ.
މެންބަރު ފާހަގަކުރެއްވި ގޮތުގައި، އެއަރޕޯޓް އިސްތިހާރުކޮށް ކުރިއެރުވުމަށް އެމްއޭސީއެލްއިން އެއްވެސް ވަރަކަށް މަސައްކަތްތަކެއް ނުކުރެ އެވެ. އޭގެ ބަދަލުގައި، އެ ކުންފުނިން ކުރާ ކަމަކީ ރައީސް މުއިއްޒު އަރިހުގައި ކުންފުނީގެ އެމްޑީ ވަޑައިގެން ފޮޓޯ ނެންގެވުން ކަމަށް ދީދީ ވިދާޅުވި އެވެ.
އެމްއޭސީއެލް އަށް ގެއްލުންވާ ގޮތަށް އެއާޕޯޓުތައް ތަރައްގީ ކުރުމުގެ މަޝްރޫއުތައް ކުރިއަށްގެންދާ ކަމަށް ބުނެ، އިދިކޮޅު ފަރާތްތަކާއި ފަތުރުވެރިކަމުގެ ދާއިރާގެ އިސް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
އިގްތިސާދީ ކަންކަން ދިރާސާ ކުރާ ފަރާތްތަކުން ފާޅުކުރާ ކަންބޮޑުވުންތަކަށް ބަލާއިރު، ރާއްޖޭގެ ރަށްތަކުގައި ކައިރިކައިރީގައި އެއާޕޯޓުތައް ތަރައްޤީކުރުމަކީ މާލީ ގޮތުން ފައިދާހުރި ކަމެއް ނޫނެވެ. އޭގެ ސަބަބުން އެމް.އޭ.ސީ.އެލް އަށް ބޮޑެތި މާލީ ގެއްލުންތަކަކާ ކުރިމަތިލާން ޖެހިދާނެ ކަމަށް ވެސް ވަނީ ލަފާކޮށްފަ އެވެ. ހަމައެއާއެކު، ކުންފުނިން ނަގާފައިވާ ލޯނުތައް އަނބުރާ ދެއްކުމަށް ދަތިވެ، އެ ލޯނުތަކަށް ފައިސާ ހޯދުމުގެ ގޮތުން އެއާޕޯޓުން ނަގާ ފީތައް ބޮޑުވެގެންދާނެ ކަމުގެ ބިރު އޮތްކަން ގިނަ ބަޔަކު ދަނީ ފާހަގަކުރަމުންނެވެ.
