މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) ގައި ވާދަކުރުމަށް ރާއްޖޭގެ ގައުމީ ފުޓްބޯޅަ ޓީމު ސްރީ ލަންކާއަށް ފުރައިފިއެވެ.

ލަންކާގައި ބާއްވާ ފޯ ނޭޝަންސް ކަޕުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. މި މުބާރާތް ކުރިއަށްގެންދިޔުމަށް ނިންމާފައިވަނީ މި މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށެވެ. އެ މުބާރާތުގައި ވާދަކުރުމަށް ބުރާސްފަތި ދުވަހުގފެ މެންދުރުފަހުގެ ވަގުތެއްގައި ގައުމީ ޓީމު ވަނީ ލަންކާއަށް ފުރާފައެވެ.

ލަންކާ މުބާރާތާކީ ދާދި ފަހުން ގައުމީ ޓީމުގެ ކޯޗުގެ މަގާމާ ހަވާލުވި އުމުރުން 52 އަހަރުގެ ޓަލީގެ ކޯޗު ފްރެންސެސްކޯ މޮރިއޭރޯގެ ފުރަތަމަ މުބާރާތެވެ. ގައުމީ ޓީމުގެ އައު ކޯޗަކަށް މޮރިއޭރޯ ހަމަޖެއްސިއިރު، އޭނާ ވެފައިވަނީ މި އަހަރު ތެރޭގައި ގައުމީ ޓީމަށް ކޯޗުކަންކޮށްދޭ ތިންވަނަ ކޯޗަށެވެ. އެގޮތުން މީގެ ކުރިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ނެރުނު ދަށް ނަތީޖާތަކުގެ ސަބަބުން ނެދަލެންޑްސްގެ މާޓިން ކޫޕްމަން ވަނީ މަގާމުން ވަކިކޮށްފައެވެ. އަދި މި ފަހުން ނިމުނު "އުރީދޫ ސާފް ޗެމްޕިއަންޝިޕް 2021" ގައި ގައުމީ ޓީމުގެ ކޯޗުކަމުގެ މަގާމާ ވަގުތީ ގޮތުން ހަވާލުވީ އެސިސްޓަންޓް ކޯޗު އަލީ ސުޒޭނެވެ.

ރާއްޖޭގެ ގައުމީ ޓީމާ މޮރިއޭރޯ ހަވާލުވިއިރު، މިއީ ގައުމީ ޓީމަކަށް މޮރިއޭރޯ އިރުޝާދުދޭނެ ފުރަތަމަ ފަހަރެވެ. އަދި މިއީ އޭޝިއާގައި އޭނާ މަސައްކަތް ކުރާނެ ފުރަތަމަ ފަހަރުވެސްމެއެވެ. ލަންކާއަށް ފުރުމުގެ ކުރިން މީޑިއާތަކަށް ދިން އިންޓަވިއުއެއްގައި މޮރިއޭރޯ ބުނީ ގައުމީ ޓީމާ ހަވާލުވެ މިވީ ކުރު މުއްދަތުގެ ތެރޭގައި ކުރެވުނު މަސައްކަތާ މެދު ހިތްހަމަޖެހޭ ކަމަށާއި، އެކަމަކު ކުޑަ ވަގުތުކޮޅެއްގެ ތެރޭގައި ހުރިހާ ކަމެއް ބަދަލުކޮށްލަން އޭނާއަކީ ޖާދޫ ހަދާ މީހެއް ނޫން ކަމަށެވެ. ނަމަވެސް މުބާރާތަށް ތައްޔާރުވާން ކުރިއަށްގެންިދޔަ ފަރިތަކުރުންތަކުގައި ޓީމުގެ ކުޅުންތެރިން ވަރަށް ރަނގަޅަށް މަސައްކަތްކުރި ކަމަށާއި، އެގޮތުން ކުޅުންތެރިން 100 އިންސައްތަ ދެމުން އަންނަ ކަމަށްވެސް ބުންޏެވެ.

ލަންކާ މުބާރާތުގައި ވާދަކުރުމަށް ގައުމީ ޓީމު ފުރިއިރު، މި މުބާރާތުގައި އަނިޔާގެ ސަބަބުން ގޯލްކީޕަރު މުޙައްމަދު ފައިސަލް ނުކުޅޭނެއެވެ. އަދި އާއިލީ ކަމަކާ ގުޅިގެން މި ފަހަރުގެ ސްކޮޑުގައި ޑިފެންޑަރު މޫސާ ޔާމީން (ޔާމްބެ) ވެސް ބައިވެރިވެފައެއް ނުވެއެވެ. އެއާއެކު ގައުމީ ޓީމުގެ ސްކޮޑަށް ޒުވާން ގޯލްކީޕަރު ޔޫސުފް މީސަމް އަބްދުﷲ އާއި މިޑްފީލްޑަރު ޔަސްފާދު ހަބީބު (މުލަކޭ) ވަނީ ނަގާފައެވެ.

ލަންކާގައި ކުރިއަށްދާ ފޯ ނޭޝަންސް ކަޕުގައި ރާއްޖޭން ކުޅޭ ފުރަތަމަ މެޗުގައި މި މަހުގެ އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ. މި މުބާރާތުގެ ފައިނަލަށް ދާނީ ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމެވެ.