ރާއްޖެއިން މަސައްކަތްކުރަނީ ތިމާވެއްޓާ ރައްޓެހި ގޮތަކަށް ފަތުރުވެރިކަން ކުރިއަރުވަން ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ހާމަކުރައްވައިފިއެވެ.
ވޯލްޑް ޓޫރިޒަމް އޯގަނައިޒޭޝަންއާއި، ވޯލްޑް ޓްރެވަލް އެންޑް ޓޫރިޒަމް ކައުންސިލުން ބޭއްވި ވޯލްޑް ޓްރެވަލް މާކެޓް ލަންޑަން 2021 ގެ މިނިސްޓަރުންގެ ސަމިޓުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ ބައިވެރިވެވަޑައިގެންފައެވެ.
މި ސަމިޓުގައި ބައިވެރިވެވަޑައިގެން މައިގަނޑުގޮތެއްގައި ދެކެވުނު ވާހަކަތަކާ ގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބުދެއްވަމުން މިނިސްޓަރ މައުސޫމް ވިދާޅުވީ، ރާއްޖެއިން ތިމާވެއްޓާ ރައްޓެހި ގޮތަކަށް ފަތުރުވެރިކަން ކުރިއަރުވަން ކުރާ މަސައްކަތްތައް ހިއްސާކުރައްވާފައިވާކަމަށެވެ. އެގޮތުން ރާއްޖެއަކީ ފެށުނީއްސުރެ ވެސް ތިމާވެއްޓާ ރައްޓެހި ފަތުރުވެރިކަމެއް ހިންގަމުން އަންނަ ގައުމެއް ކަން ފާހަގަކުރެއްވި ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ގައުމުތަކުގެ ފަތުރުވެރިކަން މައިގަނޑުގޮތެއްގައި ގުޅިފައި އޮންނަނީ ގުދުރަތީ ވަސީލަތްތަކަށް ކަމަށްވުމާއެކު، ރާއްޖެއިން ވެސް މި އިންޑަސްޓްރީގައި މަސައްކަތްކުރާ މީހުން ރާއްޖޭގެ ގުދުރަތީ މާހައުލު ރައްކާތެރިކުރުމަށް މަސައްކަތްތަކެއް ކުރިއަށްގެންދަން ބޭނުންވާކަމަށެވެ. މިގޮތުން ރާއްޖޭގެ ގުދުރަތީ ނިޒާމު އިތުރަށް ފުރިހަމަކުރުމަށް މުރަކަ އާލާކުރުމުގެ މަސައްކަތްތައް ފަދަ ގިނަ ދުވަސް ނަގާ މަސައްކަތްތަކެއް ކުރަންޖެހޭކަމަށް މިނިސްޓަރ ވިދާޅުވިއެވެ.
ރާއްޖެއަކީ ފަތުރުވެރިކަމުގެ ދާއިރާގައި ލާމަސީލު ގައުމެއް ކަމަށާއި، މިކަން މިގޮތުގައި ކުރިއަށްގެންދަން ސަރުކާރުން މަގުދައްކާކަމަށް މިނިސްޓަރ ވަނީ މިނިސްޓަރުންގެ ސަމިޓުގައި ވިދާޅުވެފައެވެ. އެހެންކަމުން މިގޮތުން 2030 ވަނަ އަހަރުގެ ކުރިން ނެޓް ޒީރޯއަށް ވާސިލްވުމަށް ކަނޑައަޅުއްވާފައިވާކަމާއި، ސިންގަލް ޔޫސް ޕްލާސްޓިކް ބޭނުންކުރުން ހުއްޓުވުމަށް ކުރަމުންދާ މަސައްކަތްތައް ވެސް މިނިސްޓަރ ވަނީ ފާހަގަކުރައްވާފައެވެ.
މިނިސްޓަރ ޑރ. މައުސޫމް ވިދާޅުވީ މި ބައްދަލުވުމުގައި ބައިވެރިވެވަޑައިގެން ހުރިހާ މިނިސްޓަރުން ވެސް ތިމާވެއްޓާ ރައްޓެހި ގޮތަކަށް ފަތުރުވެރިކަން ގެންދިއުމަށް މަސައްކަތްތަކެއް ކުރަންޖެހޭކަން ވަރަށް ބޮޑަށް ފާހަގަކުރެއްވިކަމަށެވެ.
ވޯލްޑް ޓްރެވަލް މާކެޓަކީ ދުނިޔޭގައި ފަތުރުވެރިކަމުގެ ދާއިރާއިން ބައިނަލްއަގުވާމީ ފެންވަރުގައި ކުރިޔަށްގެންދާ އެންމެ މުހިންމު އަދި އެންމެ ބޮޑު އެއް ހަރަކާތެވެ. މިއަހަރު އެ ހަރަކާތް ކުރިޔަށްގެންދަނީ ހައިބްރިޑް ހަރަކާތެއްގޮތަށެވެ. މިގޮތުން މި ހަރަކާތުގެ އަމަލީ ބައި ކުރިޔަށްގެންދިޔައީ ނޮވެމްބަރު 1 ވަނަ ދުވަހުން 3 ވަނަ ދުވަހަށް އެކްސެލް ލަންޑަންގައެވެ. އަދި މި ހަރަކާތުގެ ވަރޗުއަލް ބައި ކުރިޔަށް ގެންދިޔުމަށް ހަމަޖެހިފައިވަނީ ނޮވެމްބަރު 8 ވަނަ ދުވަހުން 9 ވަނަ ދުވަހަށެވެ.
ކޮވިޑް-19 ގެ ސަބަބުން 2020 ވަނަ އަހަރު މުޅި ވޯލްޑް ޓްރެވަލް މާކެޓް ވެސް ބާއްވާފައިވަނީ ވަރޗުއަލްކޮށެވެ. މި އަހަރު ވޯލްޑް ޓްރެވަލް މާކެޓް ބްރޭންޑްކޮށްފައިވަނީ އަންނަން އޮތް ފަތުރުވެރިކަމުގެ ޖީލުތައް ކުރިއަރާނެގޮތަށް ވިސްނައިގެން، އާ ޚިޔާލުތަކާއި އާ ޓެކްނޮލޮޖީ އަދި ކުދިބޮޑު ހުރިހާ ކަމަކަށް ހައްލު ހޯދުމުގެ މައްޗަށެވެ.
