މި މަހު ސްރީ ލަންކާގައި ބޭއްވުމަށް ހަމަޖެހިފައިވާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" އަށް ކުރިމަތިލާނީ މުބާރާތް ކާމިޔާބުކުރުމުގެ އަމާޒުގައި ކަމަށް ރާއްޖޭގެ ގައުމީ ފުޓްބޯޅަ ޓީމާ ދާދި ފަހުން ހަވާލުވި އިޓަލީގެ ކޯޗު ފްރެންސެސްކޯ މޮރިއޭރޯ ބުނެފިއެވެ.

ލަންކާގައި ބާއްވާ ފޯ ނޭޝަންސް ކަޕުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. މުބާރާތް ކުރިއަށްގެންދިޔުމަށް ނިންމާފައިވަނީ މި މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށެވެ.

އެ މުބާރާތާ ކުރިމަތިލާއިރު، ދާދި ފަހުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ގައުމީ ޓީމުގެ ކޯޗުގެ މަގާމަށް އުމުރުން 52 އަހަރުގެ މޮރިއޭރޯ ހަމަޖައްސާފައެވެ. މައުލޫމާތު ލިބޭ ގޮތުން މޮރިއޭރޯ ރާއްޖޭގެ ގައުމީ ޓީމާ ހަވާލުވީ އެއް އަހަރުގެ އެއްބަސްވުމެއްގެ ދަށުންނެވެ. ރާއްޖޭގެ ގައުމީ ޓީމާ މޮރިއޭރޯ ހަވާލުވިއިރު، މިއީ ގައުމީ ޓީމަކަށް މޮރިއޭރޯ އިރުޝާދުދޭނެ ފުރަތަމަ ފަހަރެވެ. އަދި މިއީ އޭޝިއާގައި އޭނާ މަސައްކަތް ކުރާނެ ފުރަތަމަ ފަހަރުވެސްމެއެވެ.

ގައުމީ ޓީމުގެ އައު ކޯޗަކަށް މޮރިއޭރޯ ހަމަޖެއްސިއިރު، އޭނާ ވެފައިވަނީ މި އަހަރު ތެރޭގައި ގައުމީ ޓީމަށް ކޯޗުކަންކޮށްދޭ ތިންވަނަ ކޯޗަށެވެ. އެގޮތުން މީގެ ކުރިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ނެރުނު ދަށް ނަތީޖާތަކުގެ ސަބަބުން ނެދަލެންޑްސްގެ މާޓިން ކޫޕްމަން ވަނީ މަގާމުން ވަކިކޮށްފައެވެ. އަދި މި ފަހުން ނިމުނު "އުރީދޫ ސާފް ޗެމްޕިއަންޝިޕް 2021" ގައި ގައުމީ ޓީމުގެ ކޯޗުކަމުގެ މަގާމާ ވަގުތީ ގޮތުން ހަވާލުވީ އެސިސްޓަންޓް ކޯޗު އަލީ ސުޒޭނެވެ.

ލަންކާ މުބާރާތުގައި ވާދަކުރުމަށް ފުރުމުގެ ކުރިން ގައުމީ ޓީމަށް ހިތްވަރުދިނުމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވަނީ އަންގާރަ ދުވަހު ހޮޓެލް ޖެންގައި ޚާއްސަ ރަސްމިއްޔާތެއް ބާއްވާފައެވެ. އެ ރަސްމިއްޔާތުގައި ވާހަކަ ދައްކަމުން މޮރިއޭރޯ ބުނީ އޭނާ ރާއްޖޭގައި ކުރާ ކޮންމެ މަސައްކަތެއްގައި 100 އިންސައްތަ ފޯކަސް އަކީ ރާއްޖޭގެ ފުޓްބޯޅަ މިހާރަށް ވުރެ މައްޗަށް ގެންދިއުން ކަމަށާއި، އެހެންކަމުން ކުރިއަށް އޮތް މުބާރާތަށް ދާނީ އެ މުބާރާތް ކާމިޔާބުކުރުމުގެ އަމާޒުގައި ކަމަށެވެ.

އަދި ގައުމީ ޓީމާއެކު މިވީ ކުޑަ ދުވަސްކޮޅުތެރޭގައި ފެނިގެންދިޔަ މަންޒަރަށް ބަލާއިރު، ރާއްޖޭގެ ފުޓްބޯޅައިގެ މާހައުލާ މެދު ވަރަށް ބޮޑަށް ހިތްހަމަޖެހޭ ކަމަށްވެސް ބުންޏެވެ. އެހެންކަމުން ކުރިއަށް އޮތްތަނުގައި ރާއްޖޭގައި ރަނގަޅު މަސައްކަތްތަކެއް ކުރެވޭނެ ކަމުގެ އުއްމީދު އެބައޮތް ކަމަށްވެސް މޮރިއޭރޯ ވަނީ ބުނެފައެވެ.

ލަންކާ މުބާރާތަށް ތައްޔާރުވުމަށް މޮރިއޭރޯއާއެކު ގައުމީ ޓީމުން ފަރިތަކުރުންތައް ފަށާފައިވާއިރު، އެ މުބާރާތުގައި ރާއްޖޭން ކުޅޭ ފުރަތަމަ މެޗުގައި މި މަހުގެ އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ. މި މުބާރާތުގެ ފައިނަލަށް ދާނީ ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމެވެ.