ސްރީ ލަންކާގައި ބޭއްވުމަށް ހަމަޖެހިފައިވާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި ރާއްޖޭގެ އަމާޒަކީ ޑިފެންޑިން ޗެމްޕިއަނުންގެ ހައިސިއްޔަތުން ތަށި ދިފާއުކުރުން ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވެއްޖެއެވެ.

ލަންކާ މުބާރާތުގައި ވާދަކުރުމަށް ފުރުމުގެ ކުރިން ގައުމީ ޓީމަށް ހިތްވަރުދިނުމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވަނީ އަންގާރަ ދުވަހު ހޮޓެލް ޖެންގައި ޚާއްސަ ރަސްމިއްޔާތެއް ބާއްވާފައެވެ. އެ ރަސްމިއްޔާތުގައި ވާހަކަ ދައްކަވަމުން ޖަވާ ވިދާޅުވީ ނިމިދިޔަ "އުރީދޫ ސާފް ޗެމްޕިއަންޝިޕް 2021" ގައި ރާއްޖޭން ދެ އަމާޒެއް ކަނޑައެޅި ކަމަށާއި، އޭގެ ތެރެއިން ފުރަތަމަ އަމާޒަކީ ތަށި ދިފާއުކުރުން ކަމަށެވެ. އަދި ދެވަނަ އަމާޒަކީ ގެއްލެމުންދާ ފުޓްބޯޅައިގެ ފޯރި އަލުން ނަގައި ގައުމު އެއްބައިވަންތަ ކުރުން ކަމަށްވެސް ވިދާޅުވިއެވެ.

އެ މުބާރާތުގެ ތަށި ރާއްޖެއަށް ދިފާއު ނުކުރެވުނު ނަމަވެސް، އެ މުބާރާތުގައި ކަނޑައެޅި ދެވަނަ އަމާޒު ރާއްޖެއަށް ހާސިލުވި ކަމަށާއި، އެގޮތުން ސާފް ޗެމްޕިއަންޝިޕުގައި ދަނޑު ތެރެއިން ފެނެގެންދިޔަ މަންޒަރު ފެނި އުފަލުން ރޮވޭވަރުވި ކަމަށްވެސް ވިދާޅުވިއެވެ.

ސާފް ޗެމްޕިއަންޝިޕަށްފަހު ރާއްޖެއިން ލަންކާގައި ބާއްވާ މަހިންދަ ރާޖަޕަކްސަ ޓްރޮފީއަށް ނުކުންނައިރު، މީގެ ކުރިން 2012 ވަނަ އަހަރު ބޭއްވި މި މުބާރާތުގެ ޗެމްޕިއަންކަން ރާއްޖޭން ވަނީ ހޯދާފައެވެ. އެކަމަކު އެ ފަހަރު އެ މުބާރާތް ކުރިއަށްގެންދިޔައީ 23 އަހަރުން ދަށުގެ މުބާރާތެއްގެ ގޮތުގައެވެ.

ޖަވާ ވިދާޅުވީ މި މުބާރާތަށް ރާއްޖެ ނުކުންނަނީ ޑިފެންޑިން ޗެމްޕިއަނުންގެ ހައިސިއްޔަތުން، މުބާރާތް ކާމިޔާބުކުރުމުގެ އަމާޒުގައި ކަމަށެވެ. އަދި ގައުމީ ޓީމުގެ ކުޅުންތެރިން މި މުބާރާތް ކާމިޔާބުކޮށް ދިވެހިން އުފާ ކޮށްދިނުމަށް ފެން ބޮވައިގެންފަ ކަމަށާއި، ގައުމީ ޓީމުގެ ރޫހަށް އެއްވެސް ބަދަލެއް ނާންނަ ކަމަށްވެސް ވިދާޅުވިއެވެ.

މީގެ އިތުރުން ޖަވާ ވިދާޅުވީ ސާފް ޗެމްޕިއަންޝިޕުގެ އިތުރުން ލަންކާގެ މުބާރާތަށް ދާއިރު އެންމެ ބޮޑު އެއްބާރުލުމެއް ލިބިގެންދަނީ ސަރުކާރުގެ ފަރާތުން ކަމަށާއި، ޚާއްސަކޮށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ނައިބު ރައީސްގެ އިތުރުން ކުޅިވަރާ ބެހޭ ވަޒީރު އަޙްމަދު މަޚްލޫފުގެ ވަރަށް ބޮޑު އެއްބާރުލުމެއް ލިބިގެންދާ ކަމަށެވެ.

ލަންކާގައި ބާއްވާ ފޯ ނޭޝަންސް ކަޕާ ރާއްޖެ ކުރިމަތިލާއިރު، އޭޝިއަން ކަޕުގެ ކޮލިފައިންގެ ފައިނަލް ބުރުގެ މެޗުތައް މިހާރު ވަނީ އަންނަ އަހަރުގެ ޖޫން މަހަށް ތާވަލުކޮށްފައެވެ. އޭޝިއަން ކަޕުގެ ކޮލިފައިންގެ ފައިނަލް ބުރުގެ މެޗުތައް ސެންޓްރަލައިޒްކޮށް ކުރިއަށް ގެންދަން އޭޝިއާގެ ފުޓްބޯޅައިގެ މައި އިދާރާ، އޭއެފްސީން ނިންމާފައިވާއިރު، ރާއްޖޭގެ އެންމެ ބޮޑު އަމާޒަކީ މުޅިން އަލަށް އެ މުބާރާތަށް ކޮލިފައިވުމެވެ.