ޔޫތު މިނިސްޓްރީގެ ނައިބަކަށް ޖަވާ!
ޖަވާ ވަނީ، 24 އަހަރާއި ތިން މަސް ދުވަސް ވަންދެން އެފްއޭއެމްގައި މަސައްކަތް ކޮށްފައި
އެފްއޭއެމްގެ ކުރީގެ ޖެނަރަލް ސެކްރެޓަރީ ޙުސެއިން ޖަވާޒް (ޖަވާ)
މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސްގެ ނައިބަކަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ޖެނަރަލް ސެކްރެޓަރީ ޙުސެއިން ޖަވާޒް (ޖަވާ) ޢައްޔަން ކޮށްފި އެވެ.
ގިނަ ދުވަސްތަކެއް ވަންދެން އެފްއޭއެމްގައި މަސައްކަތް ކުރުމަށްފަހު، އެފްއޭއެމްގެ ޖެނަރަލް ސެކްރެޓަރީގެ މަގާމުން ޖަވާ އިސްތިއުފާ ދިނީ މިދިޔަ އަހަރުގެ ނޮވެމްބަރު މަހުގެ ތެރޭގަ އެވެ. ފުޓުބޯޅަ އަށް ގިނަ ދުވަސްތަކެއް ވަންދެން ޚިދުމަތްކޮށްފައިވާ ޖަވާ ވަނީ، 24 އަހަރާއި ތިން މަސް ދުވަސް ވަންދެން އެފްއޭއެމްގައި މަސައްކަތް ކޮށްފަ އެވެ. ޖަވާ އަކީ ކުޅިވަރުގެ މެނޭޖުމަންޓުގެ ދާއިރާ އިން މާސްޓަސް ޑިގްރީ ހާސިލުކޮށްފައިވާ ފަރާތެކެވެ.
އެންމެ ފުރަތަމަ އެފްއޭއެމްގެ ޖެނަރަލް ސެކްރެޓަރީގެ މަގާމަށް ޖަވާ ވަޑައިގެންނެވީ ކުރީގެ ރައީސް އިލްހާމް އަޙުމަދުގެ ދައުރުގެ ފަހު ބައިގަ އެވެ. އޭގެ ފަހުން މިހާރުގެ ރައީސް ބައްސާމް އަދީލް ޖަލީލުގެ ފުރަތަމަ ދައުރުގައި އެ މަޤާމަށް ވަޑައިގެންނެވި އެވެ. އެފްއޭއެމްގެ ރައީސްކަމުގެ ދެ ވަނަ ދައުރަށް ބައްސާމް ވަޑައިގެންނެވުމުން ވެސް، އެ މަގާމުގައި ހުންނެވީ ޖަވާ އެވެ.
ޔޫތު މިނިސްޓްރީގެ ނައިބުގެ މަޤާމަށް ޖަވާ ޢައްޔަން ކޮށްފައި ވަނީ މިދިޔަ ހަފުތާގަ އެވެ. އެ މަގާމަށް ޖަވާ އައްޔަން ކުރުމާއެކު، އެ މިނިސްޓްރީގެ ނައިބުންގެ އަދަދު ވަނީ 10 އަށް އަރައިފަ އެވެ. ނަމަވެސް، ރައީސުލްޖުމްހޫރިއްޔާގެ އޮފީހުގެ ރަސްމީ ވެބްސައިޓުގައި މިހާތަނަށް ޖަވާގެ މައުލޫމާތު ހިމަނައިފައެއް ނުވެ އެވެ.
