މޯލްޑިވްސް ނެޝަނަލް ޕާޓީ (އެމްއެންޕީ) ގެ ޕާލިމެންޓަރީ ގްރޫޕުގެ ލީޑަރަކަށް ތިމަރަފުށީ ދާއިރާގެ މެމްބަރު އަބްދުﷲ ރިޔާޒު އައްޔަނުކޮށްފިއެވެ.

ޕީޖީ ގްރޫޕުގެ ލީޑަރަކަށް ރިޔާޒު އައްޔަނު ކުރިއިރު، ޑެޕިއުޓީ ލީޑަރަކަށް އައްޔަނު ކޮށްފައި ވަނީ ވިލިމާލޭ ދާއިރާގެ މެމްބަރު އަހުމަދު އުޝާމްއެވެ. ރައްޔިތުންގެ މަޖިލީހުގެ ދަފްތަރުގައި އެމްއެންޕީ ހިމަނާފައި ވަނީ މިމަހުގެ 27 ވަނަ ދުވަހުއެވެ.

މިއާއެކު މިހާރު މަޖިލީހުގައި ޕާޓީތައް ބެހިފައިވާ ގޮތަކީ، އެމްޑީޕީގެ 65 މެމްބަރުން، ޕީޕީއެމްގެ 7 މެމްބަރުން، ޖުމްހުރީ ޕާޓީގެ 3 މެމްބަރުން، ޕީއެންސީ 3 މެމްބަރުން، އެމްއެންޕީގެ 3 މެމްބަރުން، މޯލްޑިވްސް ޑިވެލޮޕްމެންޓް އެލައަންސްގެ 2 މެމްބަރުން، ވަކި ޕާޓީއަކަށް ނިސްބަތް ނުވާ 5 މެމްބަރުންނެވެ. މަޖިލީހުގެ ޕާޓީތަކަށް އައި ބަދަލާ ގުޅިގެން ކޮމިޓީތަކަށް އަންނަ ބަދަލު ފާސްކުރުމަށް ހުށަހަޅުއްވާނެ ކަމަށް ވެސް ރައީސް ނަޝީދު ވަނީ ވިދާޅުވެފައެވެ.

ސިޔާސީ ޕާޓީއެއް އުފެއްދުމުގެ ހުއްދަ ދެވުނުތާ 2 މަހާއި 12 ދުވަހުގެ ތެރޭގައި މޯލްޑިވްސް ނެޝަނަލް ޕާޓީ (އެމްއެންޕީ) ރަޖިސްޓްރީކުރުމަށް ބޭނުންވާ ހުރިހާ ގާނޫނީ އިޖުރާއަތްތަކެއް ފުރިހަމަކުރުމަށްފަހު ރަޖިސްޓްރީ ކުރީ މި މަހުގެ 25 ވަނަ ދުވަހުއެވެ.

އެމްއެންޕީގެ ރައީސް މުހައްމަދު ނާޒިމް ވިދާޅުވީ، ޕާޓީގެ ރަޖިސްޓްރޭޝަންގެ ކަންތައް ބާރު ސްޕީޑުގައި ކުރިޔަށްދިޔައީ ދިވެހި ރައްޔިތުން ދިން އެއްބާރުލުމުގެ ސަބަބުން ކަމަށާއި، ޕާޓީ ރަޖިސްޓްރީ ކުރެވުމާއެކު، މަސައްކަތްތައް އިތުރަށް ފުޅާވެގެންދާނެ ކަމަށެވެ. އަދި ޕާޓީން މިހާރު އަމާޒު ކަނޑައަޅާފައިވަނީ 10،000 މެމްބަރުން ހަމަކުރުމަށް ކަމަށާއި، އެކަމަށްޓަކައި ކުރަން ޖެހޭ ކަންކަން ކުރަމުންދާ ކަމަށެވެ.

އެމްއެންޕީ ސިޔާސީ ޕާޓީއެއްގެ ގޮތުގައި ރަޖިސްޓްރީކުރުމަށް ހުށަހަޅާފައިވަނީ ރާއްޖޭގެ އެކިކަންކޮޅުތަކުން 5000 މެންބަރުންނަށް ވުރެ ގިނަ ފޯމާއެކުއެވެ. އިލެކްޝަންސް ކޮމިޝަނުން, މޯލްޑިވްސް ނެޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތް ކުރުމުގެ ހުއްދަ ދީފައިވަނީ 15 ޖުލައި 2021 ގައެވެ. އެގޮތުން މިދިޔަ މަދު ދުވަސްކޮޅުގެ ތެރޭގައި އެމްއެންޕީއާ ގިނަ އަދަދެއްގެ މެންބަރުން ދިޔައީ ގުޅެމުންނެވެ.