ޕީޖީގެ އިންސާނިއްޔަތުކަމެއް ނެތް: ރޮޒައިނާ
ފްރީ އެން ފެއަރ ޖަސްޓިސް ސިސްޓަމެއް އެކަމަނާ ބޭނުން ނުވާ މިންވަރު އެކަމުން ހާމަވަނީ
ރާާއްޖެޓީވީގެ ދެ ނޫސްވެރިން، ސަން އޮންލައިންގެ ނޫްސްވެރިޔަކާއެކުގައި ކްރިމިނަލް ކޯޓު ސަރަހައްދުގައި މަޑުކޮށްލައިގެން
ރާއްޖެޓީވީގެ ދެ ނޫސްވެރިން ޖަލަށްލުމަށް ޕްރޮސިކިއުޓަރ ޖެނެރަލްގެ ފަރާތުން ކޯޓުގައި އެދުމުން ހާމަވަނީ، ޕީޖީގެ އިންސާނިއްޔަތު ކަމެއް ނެތް މިންވަރުކަމަށް އެމްޑިޕީގެ ޕާލިމެންޓްރީ ގުރޫޕުގެ ނައިބް ލީޑަރު ރޮޒައިނާ އާދަމް ވިދާޅުވެއްޖެ އެވެ.
ރާއްޖެޓީވީގެ ދެ ނޫސްވެރިން ކަމަށްވާ ލީވާން އަލީ ނާސިރާ، މުހައްމަދު ވިސާމްގެ މައްޗަށް އަންގާރަ ދުވަހު ހުކުމް އިއްވާއިރު، ރާއްޖެޓީވީގެ "ފަލަސުރުހީ" ޕްރޮގްރާމްގައި އައްޑޫ މިދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ، ރައީސް އަބްދުﷲ ޔާމީންގެ ސަރުކާރުގައި ޖަލަކީ ޒުވާނުންނަށް އޮތް އެންމެ ބޮޑު ފުރުސަތު ކަމަށެވެ. ރޮޒައިނާ ވިދާޅުވީ މި ސަރުކަރުގެ ތެރެއިން ޒުވާނުންނަށް ނުހައްގު އެތައް އަދަބެއް ދެމުންދާ ކަމަށެވެ.
ލީވާން އާއި ވިސާމްގެ މައްޗަށް ކުށް ސާބިތުވާކަމަށް ކޯޓުން ނިންމާފައިވާއިރު، އަދަބު ކަނޑައެޅުމަށް ވަކި ޝަރީއަތެއް ބޭއްވުމަށް ވަނީ އަންގާރަ ދުވަހަށް ތައާވަލްކޮށްފަ އެވެ. އަދި ޕްރޮސިކިއުޓަރ ޖެނެރަލްގެ ފަރާތުން ކޯޓުގައި އެދިފައިވަނީ ރާއްޖެޓީވީގެ ދެ ނޫސްވެރިން ޖަލަށްލައިދިނުމަށެވެ. އެކަމަށް އިޝާރަތްކުރައްވާ ރޮޒައިނާ ވިދާޅުވީ، ނޫސްވެރިޔަކު، ނޫސްވެރިޔާގެ ވާޖިބު އަދާކުރުމުން އޭނާ ޖަލަށްލުމަށް ޕްރޮސިކިއުޓަރ ޖެނެރަލް މަސައްކަތްކުރައްވާނީ، އެކަމަނާގެ "ގޮތެއް ފޮތެއް ނެތުމުން" ކަމަށެވެ.
"އެކަމުން ހާމަވަނީ، އެކަމަނާގެ އިންސާނިއްޔަތުކަމެއް ނެތް މިންވަރު. ފްރީ އެން ފެއަރ ޖަސްޓިސް ސިސްޓަމެއް އެކަމަނާ ބޭނުން ނުވާ މިންވަރު އެކަމުން ހާމަވަނީ. އަޅުގަނޑުމެންނަށް ފެންނަނީ އެކަމަނާ ދެކޭގޮތުގައި ފުލުހުންގެ މުއައްސަސާއަކީވެސް ރައްޔިތުންނަށް އަނިޔާކުރަން ހުންނަ ތަނެއް ކަމަށް ޕީޖީން ބޭނުންވާ މިންވަރު" ރޮޒައިނާ ވިދާޅުވި އެވެ.
ވިސާމާއި ލީވާންގެ މައްޗަށް މިދިޔަ އަހަރުގެ އޭޕްރީލް މަހު އެ ދައުވާ އުފުލާފައިވަނީ، 2015 ވަނަ އަހަރުގެ ނޮވެމްބަރު ދެ ވަނަ ދުވަހުގެ ރޭ ފުލުހުންނާއި ސިފައިން މާލޭގައި ހިންގި ހާއްސަ އޮޕަރޭޝަނެއްގައި މާފަންނު ސްޓޭޑިއަމް ސަރަހައްދުން ރާއްޖެޓީވީގެ ސީއޯއޯ ހުސެއިން ފިޔާޒް މޫސާ ހައްޔަރުކުރުމަށް ފުލުހުން މަސައްކަތް ކުރަމުން ދަނިކޮށް، އެކަން ހުއްޓުވުމަށް ލީވާނާއި ވިސާމް މަސައްކަތްކޮށް ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅި ކަމަށް ބުނެއެވެ. އެކަމަށް ވިސާމާއި ލީވާން ވަނީ އިންކާރުކޮށްފަ އެވެ.
ދެ ނޫސްވެރިންގެ މައްޗަށް ހިންގާ ޝަރީއަތުގައި އެންމެ ފަހުން އަޑުއެހުމެއް ބާއްވާފައިވަނީ މިދިޔަ ޑިސެމްބަރު މަހުގެ 19 ވަނަ ދުވަހު އެވެ. އެ އަޑުއެހުމުގައި ޝަރީއަތުން ވަނީ ވިސާމާއި ލީވާނުގެ މައްޗަށް އުުފުލާފައިވާ ގާނޫނު ތަންފީޒްކުރާ މުވައްޒަފެއްގެ މަސައްކަތަށް ގަސްދުގައި ހުރަސް އެޅުމުގެ ކުށުގެ ދައުވާ ސާބިތުވާ ކަމަށް ކަނޑައަޅާފަ އެވެ.
ދައުވާ ސާބިތުވާކަމަށް ޝަރީއަތުން ކަނޑައެޅުމުން ދައުލަތުގެ ވަކީލު ވަނީ ދެ ނޫސްވެރިންނަށް ފުލުހުންގެ ގާނޫނުގައި ބުނެފައިވާ އެންމެ ބޮޑު އަދަބު ދިނުމަށް ހުށަހަޅާފަ އެވެ. އެއީ ހަތަރު މަހާއި 24 ދުވަހުގެ ޖަލު ހުކުމެކެވެ.
